KALANSEN 30

I bɛ se ka i diyanyemɔgɔ salenw ye tuguni!

A BILA A LA

Saya bɛ dusukasiba ani ɲɛnasisiba lase mɔgɔw ma. O de kama Bibulu b’a fɔ ko saya ye an jugu ye. (1 Kɔrɛntekaw 15:26) Kalansen 27nan kɔnɔ, i y’a ye ko Jehova bɛna se sɔrɔ o jugu kan. Nka mɔgɔ minnu sara kabini tuma jan fo ka na se bi ma, mun de bɛna kɛ olu ye? Nin kalansen in kɔnɔ, i bɛna fɛn caman kalan Jehova ka layidu ɲumanba wɛrɛ ko la. O layidu ye ko, a bɛna mɔgɔ salen miliyari caman lasegin ɲɛnamaya la walasa u ka ɲɛnamaya kɛ nisɔndiya la fo badaa. A bɛna u lakunun! Yala o bɛ se ka kɛ tiɲɛ yɛrɛ la wa? Yala u bɛna lakunun walasa ka ɲɛnamaya kɛ sankolo la walima dugukolo kan wa?

1. Jehova b’a fɛ ka mun kɛ an diyanyemɔgɔ salenw ye?

A nege bɛ Jehova la ka mɔgɔ salenw lasegin ɲɛnamaya la. Cɛ dɔ, min tɔgɔ tun ye Job, ale tun dalen b’a la ko Ala tɛna ɲinɛ a kɔ ni a sara. A y’a fɔ Ala ye ko: “I na weleli kɛ, ne na jaabili kɛ [kaburu kɔnɔ]”.—Job 14:13-15 kalan.

2. An b’a dɔn cogo di ko mɔgɔ salenw bɛ se ka lakunun?

Ka Yesu to dugukolo kan, Ala ye se di a ma a ka suw lakunun. Yesu ye dennin dɔ su lakunun min si tun bɛ san tan ni fila la. A ye muso cɛ salen dɔ denkɛ fana su lakunun. (Marka 5:41, 42; Luka 7:12-15) O kɔfɛ, Yesu terikɛ Lazarɛ fana sara. Hali k’a sɔrɔ Lazarɛ tun sara ani a su tun donna a bɛ tile naani bɔ, Yesu y’a lasegin ɲɛnamaya la. Yesu kɛlen kɔ ka Ala deli, a pɛrɛnna dɔrɔn kaburu fan fɛ k’a fɔ ko: “Lazarɛ, bɔ kɛnɛma.” O la, “su bɔra”. Lazarɛ ɲɛnamayara! (Yuhana 11:43, 44) E ka miiri Lazarɛ somɔgɔw ani a teriw ka nisɔndiya la!

3. Jigiya jumɛn bɛ i diyanyemɔgɔ salenw ye?

Bibulu ye layidu ta ko: “mɔgɔw bɛɛ suw na kunun”. (Kɛwalew 24:15) Ka Yesu to dugukolo kan, a ye mɔgɔ minnu suw lakunun, olu ma taa sankolo la. (Yuhana 3:13.) U nisɔndiyalen kɛra ka segin ɲɛnamaya la dugukolo kan yan yɛrɛ. O cogo kelen na, yanni sɔɔni Yesu bɛna mɔgɔ miliyari caman suw lakunun u ka ɲɛnamaya kɛ nisɔndiya la fo badaa alijinɛ kɔnɔ dugukolo kan. “A y’a fɔ ko mɔgɔ minnu bɛɛ bɛ Ala hakili la, olu bɛɛ suw bɛna lakunun hali ni mɔgɔ si hakili tɛ u la.”—Yuhana 5:28, 29.

DƆ FARA I KA DƆNNIYA KAN

An ka daliluw sɛgɛsɛgɛ Bibulu kɔnɔ, minnu b’a jira ko mɔgɔ salenw bɛ se ka lakunun ani ko u bɛna lakunun. An k’a lajɛ fana cogo min na su kununni bɛ se ka i dusu saalo ani ka jigiya di i ma.

4. Yesu y’a jira ko a bɛ se ka suw lakunun

Yesu ye min kɛ a terikɛ Lazarɛ ye, a ɲini ka fɛn caman dɔn o kan. Yuhana 11:14, 38-44 kalan, o kɔ aw ka baro kɛ nin ɲininkaliw kan:

An b’a dɔn cogo di ko Lazarɛ tun sara tiɲɛ yɛrɛ la?—Tilayɔrɔdennin 39 lajɛ.
Ni Lazarɛ tun taara sankolo la, yala e hakili la, Yesu tun bɛna a lasegin ɲɛnamaya la dugukolo kan wa?

A’ye WIDEYO lajɛ.

WIDEYO: Yesu bɛ Lazarɛ su lakunun (1:16)

5. Mɔgɔ caman suw bɛna lakunun

Zaburu 37:29 kalan, o kɔ aw ka baro kɛ nin ɲininkali kan:

Mɔgɔ miliyari caman minnu suw bɛna lakunun, olu bɛna ɲɛnamaya kɛ yɔrɔ jumɛn?

Yesu bɛna mɔgɔ caman suw lakunun, hali mɔgɔ minnu tun tɛ Jehova bato, olu sen bɛ o mɔgɔw la. Kɛwalew 24:15 kalan, o kɔ aw ka baro kɛ nin ɲininkali kan:

A bɛ diya i ye ka jɔni su lakununnen ye?

I miiri nin na: Yesu bɛ se ka mɔgɔ su lakunun nɔgɔya la iko denfa bɛ se ka a den lakunun ka bɔ sunɔgɔ la cogo min na

6. Su kununni bɛ se ka i dusu saalo ani ka jigiya di i ma

Mɔgɔ minnu dusu kasilen don u diyanyemɔgɔ saya kosɔn, Jayirus denmuso ka maana ye olu caman dusu saalo ani ka dusu don u kɔnɔ. O maana ye tiɲɛ ye, o ko kalan Luka 8:40-42, 49-56 kɔnɔ.

Sani Yesu ka Jayirus denmuso su lakunun, a y’a fɔ a ye ko: “I kana siran. Dannaya kɛ dɔrɔn”. (Tilayɔrɔdennin 50 lajɛ.) Su kununni jigiya bɛ se ka i dɛmɛ cogo di ni . . .

i diyanyemɔgɔ dɔ sara?
i ka ɲɛnamaya bɛ farati la?

A’ye WIDEYO lajɛ, o kɔ aw ka baro kɛ nin ɲininkali kan:

WIDEYO: Su kununni jigiya bɛ jagɛlɛya di—Cogo jumɛn na? (3:21)

Su kununni jigiya ye Phelicity bangebagaw dusu saalo ani ka dusu don u kɔnɔ cogo di?

MƆGƆ DƆW B’A FƆ KO: “A ka gɛlɛn ka d’a la ko mɔgɔ salenw bɛ se ka lakunun walasa u ka ɲɛnamaya kɛ dugukolo kan.”

I hakilina ye mun ye?
I bɛ se ka baara kɛ ni tɛmɛsira jumɛn de ye walasa k’a jira ko su kununni bɛna kɛ?

BAKURUBAFƆLI

Bibulu ye layidu ta ko mɔgɔ miliyari caman minnu sara, olu suw bɛna lakunun. Jehova b’a fɛ u ka ɲɛnamaya kɛ tuguni ani a ye se di Yesu ma o ka u lakunun.

Seginnkanni

An b’a dɔn cogo di ko Jehova ni Yesu kɔrɔtɔlen don ka mɔgɔ salenw lasegin ɲɛnamaya la?
Mɔgɔ salen miliyari caman minnu bɛna lakunun, olu bɛna ɲɛnamaya kɛ yɔrɔ jumɛn—sankolo la walima dugukolo kan? Mun na e y’o fɔ?
Mun de y’a to e dara a la ko i bɛ se ka i diyanyemɔgɔ salenw ye tuguni?

Kalansen banna don min na:

A ɲini ka nin kɛ

Ni i bɛ mɔgɔ dɔ dɔn min dusu kasilen bɛ a diyanyemɔgɔ dɔ ka saya kosɔn, i ka su kununni jigiya fɔ a tigi ye waati bɛnnen na.

Fɛn wɛrɛ:

Your other goal