Barüti óunweni saragu íruni luma igarigu. Ligía tariñagunbei Bíbülia aban lan ágani óunweni (1 Korintuna 15:26). Furendeitün lidan arufudahani 27 lagumuchuba lan Heowá lau ágani le. Agia gürigia ha hilaguaañabaña? Kaba asusereda houn? Lidan arufudahani le, hafurendeiruba luagu ábanya lubuidun füramasei le ladügübei Heowá: láguyuguagüdüba lan saragu míñunu gürigia lun hawinwandun lun súnwandan. Habagaridayaba! Inarüni san gayara lan lasuseredun le? Siéluba san háguyugua o ya ubouagu?

1. Ka labusenrubei Heowá ladügün hawagu waduheñu ha hilaguaañabaña?

Memeniha lanigi Heowá láguyuguagüdüniña gürigia ha hilaguaañabaña. Chouru lumuti meha aban wügüri weiri tafiñen gíriti Hobu mabulieidagunbei lan Bungiu luéi danme le lounwen. Ariñagati lun Bungiu: “Bagúaruba nun, ábame nóunabunibu [lídangiñe umúahaü]” (Hobu 14:13-15, TNM, aliiha huméi lídangiñe abürüdǘni). a

2. Ida liña wasubudiruni gayara lan háguyugun hilaaña?

Dan meha le ya lubéi Hesusu ubouagu, ruti Bungiu ubafu lun lun láguyuguagüdün hilaaña. Ligía aba lubéi meha láguyuguagüdün Hesusu aban irahü to duusu irumu tau luma tiráü aban würi hilaali túmari (Márükosu 5:41, 42; Lúkasi 7:12-15). Dan lárigiñe, aba lounwen aban lumada Hesusu gíriti Lásaru. Íbini meha barühali lan Lásaru gádürü weyu lidan umúahaü, aba láguyuguagüdüni Hesusu. Lárigiñe lafurieidun Hesusu lun Bungiu, aba lagúaragun luagun umúahaü: “Lásaru, furiba ñéingiñe!”, ábati láfuridun le buga hilaalibei, wínwanñu! (Huan 11:43, 44). Gayaraati san hasaminarun luagun lueirin ugundani le hasandirubei liduheñu hama lumadagu Lásaru?

3. Habagaridayaba san hiduheñu hama humadagu ha hilaguaañabaña?

Füramaseti “Bungiu [...] lásaaragüdübaña lan hilaaña” (Adügaü 24:15). Mama meha siéluñanu gürigia ha láguyuguagüdübaña Hesusu (Huan 3:13). Saragüdawatiña lunya hawinwandun ya ubouagu ani gúndaatiña meha lau lira. Kei meha lasuseredun lidan dan ligira, málühali Hesusu águyuguagüda saragu míñunu gürigia lun hawinwandun lun súnwandan lidan aban paraísu ya ubouagu. Ariñagati haganbubei lan sun hilaguaaña lumalali ani ábame lan “háfuridunga lídangiñe hamúaha”. Háguyuguba sun ha lídanbaña laritagun Bungiu, íbini ha bulíei hamaañabaña amu (Huan 5:28, 29).

 SIGÍ HUMÁ AFURENDEIRA

4. Arufuda lumuti Hesusu gayara lan lásaaragüdüniña hilaaña

Furendei humá amu katei luagu le ladügübei Hesusu luagu Lásaru le lumada. Aliiha huméi Huan 11:14 luma 38-44, ábameti hayanuhan luagu álügüdahani burí le:

• Ida liña wasubudiruni le lan meha lúgubu hilá lan Lásaru? (Ariha huméi bérusu 39).

• Lun hamuga meha ñüdün lan Lásaru sielun, larariragüdüñein hamuga san Hesusu ñéingiñe?

Ariha huméi BIDÉU.

5. Habagaridayaba saragu gürigia!

Aliiha huméi Sálumu 37:29, ábameti hayanuhan luagu álügüdahani le:

• Halíaba hawinwanda saragu míñunu gürigia ha lúnbaña háguyugun?

Mámarügübaña ha meha áhuduragubaña lun Heowá láguyuguagüda Hesusu, láguyuguagüdüba giñe saragu amu gürigia. Aliiha huméi Adügaü 24:15, ábameti hayanuhan luagu álügüdahani le:

• Ka gürigia habusenrubei harihin danme le háguyugun hilaaña?

• Ida liña líchugun emenigini lánina águyuguni gurasu luma dǘgüdaguaü houn tagübürigu Phelicity?

 LE HAFURENDEIRUBEI

Füramasetu Bíbülia háguyuguba lan saragu míñunu gürigia. Ayumahati Heowá lunya habagaridun hilaaña ani rúhali ubafu lun Hesusu lun láguyuguagüdüniña.

Águyuguagüdüni

• Ida liña wasubudiruni busén lan Heowá luma Hesusu háguyuguagüdüniña hilaaña?

• Halíaba san hawinwanda saragu míñunu gürigia ha lúnbaña háguyugun: sielu o ubouagu? Ka uagu hóunaba ítara?

• Ka íchugubei ichouruni hun luagu háguyuguba lan hiduheñu hama humadagu ha hilaañabaña?