Máló a efisi watteen chúúpwúl me letipeta. Ina popun Paipel a eita ngeni, chón oput. (1 Korint 15:26) Lón Lesen 27, ka káé pwe Jiowa epwe unusen amóeló ena chón oput. Nge met epwe fis ngeni ekkewe aramas mi fen máló? Lón ei lesen, kopwe káé ekkóch pwóróus usun pwal eú án Jiowa pwon mi amwarar, ina an epwe amanawasefáli fite billion aramas pwe repwe eáni manaw mi pwapwa tori feilfeiló. I epwe amanawasefáliir! A tongeni wesewesen fis ena? Atun repwe manawsefál, repwe manaw lón láng are wóón fénúfan?

1. Met Jiowa a mochen féri ngeni attongeach kewe mi fen máló?

Jiowa a fókkun atapwalato ewe fansoun epwe amanawasefáli ekkewe mi máló. Emén mwán mi watte an lúkú itan Hiop, a lúkúlúk pwe ika a máló, Kot esap fókkun ménúki. Iei met a ereni Kot: “En kopwe köriei, nge ngang üpwe pälüenuk [seni lón ewe leenien sotup].”​—Álleani Hiop 14:13-15.

2. Pwata sia silei pwe ekkewe mi máló ra tongeni manawsefál?

Atun Jesus a nóm fénúfan, Kot a fang ngeni an we manaman pwe epwe tongeni amanawasefáli aramas. Jesus a amanawatá emén nengngin 12 ierin, me emén át néún emén fefin mi má pwúlúwan. (Markus 5:41, 42; Lukas 7:12-15) Mwirin och fansoun, chiechien Jesus we itan Lasarus a máló. Inaamwo ika Lasarus a fen máló me nóm lón peiasan ren úkúkún rúáánú rán, nge Jesus a amanawasefáli. Mwirin án Jesus iótek ngeni Kot, a erá: “Lasarus, kopwe towu!” Iwe, “Lasarus a towu.” Ena mwán mi fen máló, a manawsefál! (Johannes 11:43, 44) Anchangei úkúkún pwapwaan chón án Lasarus we famili me chiechian kewe!

3. Met ka tongeni ápilúkúlúkú fán iten attongeom kewe mi máló?

Paipel a pwonei pwe ekkewe mi máló “repwe manausefäl.” (Föför 24:15) Chókkewe Jesus a amanaweretá atun a nóm fénúfan, rese feitá láng. (Johannes 3:13) Ra pwapwa ren án Jesus amanaweretá ar repwe manaw wóón ei fénúfan. Ekiseló chék, Jesus epwe amanawasefáli fite billion aramas ar repwe manaw wóón ei fénúfan tori feilfeiló. A erá pwe repwe manawsefál meinisin chókkewe Kot a chechchemeniir, pwal mwo nge chókkewe aramas rese chúen chechchemeniir.​—Johannes 5:28, 29.

 KÚTTAFICHI

4. Jesus a ánnetatá pwe a tongeni amanawasefáli ekkewe mi máló

Ppii pwal ekkóch pwóróus usun met Jesus a féri fán iten chiechian we Lasarus. Álleani Johannes 11:14, 38-44, me mwirin pwóróusfengen wóón ekkeei kapas eis:

• Pwata sia silei pwe Lasarus a wesewesen máló?​—Ppii wokisin 39.

• Ika Lasarus a feitá láng, óm lúkú nge Jesus epwe amanawa pwe epwe manaw wóón fénúfan?

Fichi ei VIDEO.

5. Chómmóng aramas repwe manawsefál!

Álleani Kölfel 37:29, me mwirin pwóróusfengen wóón ei kapas eis:

• Ia repwe nóm ie ekkewe fite billion aramas repwe manawsefál?

Jesus epwe amanawasefáli chómmóng aramas nge esap chék ekkewe chón fel ngeni Jiowa. Álleani Föför 24:15, me mwirin pwóróusfengen wóón ei kapas eis:

• Ié ka mochen kúna an epwe manawsefál?

• Ifa usun pwóróusen ewe manawsefál a oururu me apéchékkúla letipen semen me inen Phelicity kewe?

 MENLAPAN

Ewe Paipel a pwonei pwe fite billion aramas mi fen máló repwe manawsefál. Jiowa a mochen ar repwe manawsefál, ina popun a fang ngeni Jesus ewe manaman an epwe amanawasefáliir.

Enniwili

• Met meefien Jiowa me Jesus ren ar repwe amanawasefáli ekkewe mi máló?

• Ia ekkewe fite billion aramas repwe manawsefál repwe manaw ie, lón láng are wóón fénúfan? Pwata ka erá ena?

• Met a alúkúlúkú ngonuk pwe attongeom kewe ra tongeni manawsefál?