Thihnak nih ngaihchiatnak le lungfahnak a chuahter. Cucaah Baibal nih thihnak kha ral tiah a auh. (1 Korin 15:26) Cawn Dingmi 27 ah Jehovah nih mah ral a tei lainak kong kha kan rak cawn cang. Asinain a thi cangmi hna kong he aa tlaiin tah zeitin? Mah cawn dingmi chungah a thi cangmi mi nuai thong tampi cu zungzal nunnak hmuh awkah ka thawhter ṭhan hna lai timi Jehovah i a ṭha tukmi a biakam kong kha kan cawn lai. Jehovah nih a thawhter ṭhan hna lai. Mah cu a si kho taktak maw? An thawh ṭhan tikah vancung ah maw an nun lai asiloah vawleicung ah dah?

1. Jehovah nih kan dawtmi a thimi hna caah zeidah tuahpiak a duh hna?

Jehovah nih a thimi hna nunter ṭhan lai caan kha aa ngaih tuk. Zumhfekmi Job zong nih a thih tikah Pathian nih a ka philh lai lo ti kha a zumh. Pathian sinah hitin a ti: “Na ka auh lai i [thlan chungin] kaan leh lai.”—Job 14:13-15 rel.

2. A thimi hna cu an tho ṭhan lai ti kha zeitindah kan hngalh?

Jesuh cu vawleicung a um lioah Pathian nih mithi thawhter khawhnak ṭhawnnak a rak pek. Jesuh nih kum 12 ngakchianu le nuhmeinu fapa kha a thawhter hna. (Marka 5:41, 42; Luka 7:12-15) A hnuah Jesuh a hawikom Lazaruh cu a rak thi. An vuinak nili a si cang ko nain Jesuh nih a rak thawhter ṭhan. Pathian sinah thla a cam dih hnuah Jesuh nih aw thangpi in “Lazaruh rak chuak tuah” tiah a ti. Mah tikah ‘mithi pa cu a hung chuak’ i a nung. (Johan 11:43, 44) Lazaruh chungkhar le a hawile cu zeitlukin dah an i nuamh lai ti kha na mitthlam ah cuanter hmanh.

3. Na dawtmi a thimi hna caah zei ruahchannak dah a um?

Baibal nih hitin bia a kan kamh: “Thihnak in kan tho ṭhan dih lai.” (Lamkaltu 24:15) Jesuh nih a rak thawhter ṭhanmi hna cu vancung ah an kai lo. (Johan 3:13) Annih cu vawleicung ah an rak thawh ṭhan caah an i nuam tuk. Cu bantukin a rauhhlan ah Jesuh nih mi nuai thong tampi cu vawlei paradis ah zungzal nun dingin a thawhter ṭhan hna lai. Mi nih an philh cang hna hmanhah Pathian nih cun a philh hna lo caah “thlan chung i a ummi mithi vialte” cu a thawhter ṭhan hna lai tiah Jesuh nih a ti.—Johan 5:28, 29.

 TAM DEUH IN HLATHLAI

4. Jesuh nih mithi pawl a thawhter khawh hna ti kha a langhter

Jesuh nih a hawi Lazaruh cungah a tuahmi kong kha tam deuh in hlathlai. Johan 11:14, 38-44 rel law mah biahalnak hna hi i ruah u:

• Lazaruh cu a thi taktak ti kha zeitindah kan hngalh khawh? —Caang 39 ah zoh.

• Lazaruh cu vancung ah a kai ahcun Jesuh nih vawleicung ah a thawhter ṭhan lai tiah na ruat maw?

VIDEO kha piah.

5. Mi tampi cu an tho ṭhan lai

Salm 37:29 rel law mah biahalnak hi i ruah u:

• A tho ṭhanmi mi nuai thong tampi cu khoika ah dah an um lai?

Jesuh nih Jehovah a biami hna lawng si loin mi tampi kha a thawhter ṭhan hna lai. Lamkaltu 24:15 rel law mah biahalnak hi i ruah u:

• A tho ṭhan dingmi hna lakah ahodah hmuh lai naa ngaih?

• Phelicity nulepa kha thawhṭhannak ruahchannak nih zeitindah thazaang le hnemhnak a pek hna?

 A TAWINAK

Baibal nih a thimi mi nuai thong tampi cu an tho ṭhan lai tiah bia a kan kamh. Jehovah nih thawhter ṭhan a duh hna i Jesuh kha mithi thawhter khawhnak ṭhawnnak a pek.

I Ruahṭi Ṭhannak

• Jehovah le Jesuh nih a thimi pawl thawter ṭhan an duh hna ti kha zeitindah kan hngalh khawh?

• A tho ṭhanmi mi nuai thong tampi cu khoika ah dah an um lai? Vancung ah maw asiloah vawleicung ah dah? Zeicah cutin na chim khawh?

• Na dawtmi a thimi hna cu an tho ṭhan lai ti kha zeinihdah aan zumhter?