TOLI 30
Den sama fu u di dede o weki baka
Sani á de di hati enke te wan sama di i lobi dede. Neen meke Beibel e kai dede wan gaan feyanti (1 Korentesama 15:26). Aini toli 27, u be leli taki Yehofa o puu a feyanti ya. Ma san o pasa anga den sama di dede kaba? Yehofa paamisi u wan taa moin sani. A taki ao weki miliyunmiliyun sama di dede fu den sa piisii fu teego. Ma a sani ya o pasa tuutuu? Pe Gadu o weki den sama di dede, a hemel efuso goontapu? A dati wo luku aini a pisi ya.
1. San Yehofa e angii fu du gi den sama fu u di dede?
Yehofa e angii fu weki den sama fu u di dede baka. Wan man den e kai Yopu be e biibi taki Gadu naw feegete en te a be o dede. A be taigi Gadu taki: ‘Yo kai mi da mi o piki i aini geebi.’—Leisi Yopu 14:13-15.
2. Faw du sabi taki den sama di dede sa weki baka?
Di Yesesi be de a goontapu, Gadu be gi en a kaakiti fu weki dedesama. A be weki wan meisyo fu twalufu yali, anga wan boi fu wan uman di man be dede kaba (Malikisi 5:41, 42; Lukasi 7:12-15). Bakaten wan mati fu Yesesi di den e kai Lasalesi be dede. A man ya be dede fo dei kaba te den beli en, toku Yesesi weki en baka. Yesesi waka go na a geebi, a begi Gadu neen a taki: ‘Lasalesi, kon a doo. Neen a man di be dede waka kon a doo’ (Yohanisi 11:43, 44). Pakisei fa den mati anga den famii fu Lasalesi be e poolo, di den si en libilibi baka.
3. Sowtu howpu de gi den sama fu u di dede?
Beibel taki: ‘Gadu o weki dedesama baka’ (Toli fu den apostel 24:15). Den sama di Yesesi be weki, á be go a hemel di den be dede (Yohanisi 3:13). Den be e piisii di Yesesi be weki den fu libi a goontapu ya baka. Dyonson moo, Yesesi o weki miliyunmiliyun sama fu libi fu teego aini wan paladeisi a goontapu ya. A paamisi taki ‘ala den sama di de aini den geebi o weki baka’. Gadu á feegete den sama di dede omen tenti yali pasa kaba. Di a yuu o doo ao weki den baka.—Yohanisi 5:28, 29.
LUKU A TOLI YA MOO FINI
Wo si aini Beibel saide u sa biibi taki den sama fu u di dede o weki baka. Wo si tu fa a sani ya e toosutu u.
4. Yesesi soi taki a poi weki sama di dede
Kow luku san Yesesi be du gi en mati Lasalesi. Leisi Yohanisi 11:14, 38-44, da i luku efii poi piki den akisi ya:
-
Faw du sabi taki Lasalesi be dede tuutuu? Luku vers 39.
-
Efu a hemel Lasalesi be go di a be dede, i si enke Yesesi be o tyai en kon a goontapu baka?
5. A omen sama di dede, o weki baka
Leisi Psalm 37:29, da i luku efii poi piki a akisi ya:
-
Pe den miliyunmiliyun sama di o weki baka o tan?
A ná den sama di e dini Yehofa wawan Yesesi o weki. Leisi Toli fu den apostel 24:15, da i luku efii poi piki a akisi ya:
-
Sama fii di dede i wani si baka?
Pakisei a toli ya: Leti enke fa wan dda poi weki wan pikin fi en di e siibi, a letiso Yesesi poi weki den sama di dede baka
6. A sabi di u sabi taki den sama fu u di dede o weki baka e toosutu u
A omen sama di be e tyali fu di wan lobiwan fu den dede, fende taanga-sikin di den leisi a toli fu a umanpikin fu Yairus. A toli ya pasa tuutuu. Leisi Lukasi 8:40-42, 49-56.
Fosi Yesesi weki a umanpikin fu Yairus di be dede, a taigi Yairus taki: ‘Ná feele, a biibi namo i mu biibi.’ (Luku vers 50.) Fa a howpu di wi abi taki den sama di dede o weki baka e yeepi u . . .
-
te wan sama fu u dede?
-
te u de fu dede?
Pee a FELON, da i luku efii poi piki a akisi ya.
-
Fa a biibi di Phelicity mma anga en dda e biibi taki ao weki baka e toosutu den?
SON SAMA E TAKI: ‘Mi á si enke wan sama di dede kaba o man weki baka ye.’
-
Fa ye si a toli ya?
-
Sowtu tekisi i be o leisi fu soi a sama taki den sama di dede o weki baka?
SAI LELI?
Beibel taki Gadu o weki miliyunmiliyun sama di dede. Yehofa e angii fu weki den baka, neen meke a gi Yesesi a makiti fu weki dedesama.
Sai be o piki?
-
Fai du sabi taki Yehofa anga Yesesi e angii fu weki den sama di dede baka?
-
Pe den miliyunmiliyun sama di dede o weki baka, a hemel efuso goontapu? Saide i taki so?
-
Saide ye biibi taki den sama fii di dede o weki baka?
MOO SANI FU A TOLI YA
A artikel ya e soi sai sa du te ye tyali fu di wan sama fii dede.
Beibel poi toosutu wan sama di de anga buduufu na ati?
San sa yeepi pikinnengee te wan sama di den lobi dede?
Na ala sama o weki baka fu go a hemel? Sama a den sama di naw kon a libi moo?
