BEƊEA 30
¡Bʉ cuariara beuɗarã poya ʉ̃rẽbaɗida!
Ẽberã beubʉrʉɗe jãʉ̃gʉra pua ɓʉda idjaɓa sopuabadada. Maʉ̃ bẽrã Ãcõrẽ Beɗeaba jara ɓʉda dadji beuira dji quĩrũ quĩrãca ɓʉda (1 Corinto 15:26). Dji beɗea 27ɗe, bʉa cawasida Ãcõrẽba dadji beuira jõbiya. Baribʉrʉ, ¿cãrẽda mãwãsida dadji beuɗarãme? Naʉ̃ beɗeaɗe poya cawaida Ãcõrẽba oira. Ãcõrẽba ʉ̃rẽbabiya zocãrã ẽberãrãra naʉ̃ ẽjũãne dãrã panani carea. ¡Wãya zocai pananida! ¿Wãrã arada jãʉ̃gʉra mãwãida? Idjaɓa ¿ʉ̃rẽbaɗida bajãne wa ẽjũãne?
1. ¿Jeowaba cãrẽda oida ẽberãrã beuɗarã carea?
Jeowaba wãrã arada ʉ̃rẽbabi quĩrĩã ɓʉda ẽberãrãa. Joba bio ĩjã ɓasida Jeowaɗera, Joba bio cawa ɓasida Jeowaba idjira quĩrãdoaẽ́da beuɗa carera idjira “joubadamae” ɓʉmĩna. Idjia Ãcõrẽa jarasia: “Bʉa trʉ̃ibʉrʉ, mʉ̃a wãya panuya” (Leadua Job 14:13-15).
2. ¿Sãwã cawa panʉda beuɗarã ãdjirãra wãya ʉ̃rẽbaɗida?
Jesura naʉ̃ ẽjũãne ɓasiɗe, Ãcõrẽba ʉɓʉada diasida ʉ̃rẽbabi carea ẽberã beuɗarã. Maʉ̃ carea Jesuba ʉ̃rẽbabisida wẽrãcau 12 poara eroɓasida idjaɓa dji pẽdra warrara (Marco 5:41, 42; Luca 7:12-15). Dãrã ɓaɗacarea Jesu dji bia Lazaro beusida. Idji jaiɗaɗara ewari quĩmãrẽ ɓaɗamĩna idjaɓa tʉɓariɗamĩna Jesuba ʉ̃rẽbabisida idjira. Jesuba ʉ̃taa dji idipeɗa Ãcõrẽa jĩgua trʉ̃ jarasia: “¡Lazaro, dajadaa zedua!”, ara maʉ̃da “Lazaro beu ɓaɗada dajadaa zesia”, ¡wãya zocai ɓesi! (Juaʉ̃ 11:43, 44). ¡Quĩchadua dji cuariara dji biarã siɗa sãwã ɓʉsriɗa panasiɗada!
3. ¿Bʉ beuɗarãra wãya zocai pananida?
Ãcõrẽ Beɗeaba jara ɓʉda “Ãcõrẽba [ẽberãrã] ʉ̃rẽbabida” (Hecho 24:15). Ẽberã beu ɓaɗada Jesuba ʉ̃rẽbabisida ʉ̃taa wãnaẽ́ basía (Juaʉ̃ 3:13). Jũmarãda ɓʉsriɗa panasiɗada wãya naʉ̃ ẽjũãne panani carea. Aɓari quĩrãca Jesuba ʉ̃rẽbabida zocãrã ẽberãrãra dãrã panani carea naʉ̃ ẽjũã quĩrãwãrẽãne. Idjia jarasida “jou ɓeara jũma quĩrãnebaɗida”, jãʉ̃ jãwã jara quĩrĩã ɓʉda, ẽberãrã Ãcõrẽ quĩchaɗe ɓʉra wãya jiruãbẽrã ʉ̃rẽbaɗida; ẽberãrãra ni aɓaʉba quĩrãnebaɗaẽ́mĩna Ãcõrẽba quĩrãneba ɓʉda (Juaʉ̃ 5:28, 29, TNM beɗea eɗaare).
BIO CAWAƊIDA NAɄ̃ BEƊEAƊE
Bio quĩrãcuita ununida Ãcõrẽ Beɗeaba jara ɓʉra cawaɗi carea wãrã arada Ãcõrẽba ẽberãrãa ʉ̃rẽbabida, jãʉ̃gʉra wãrã arada mãwãida bẽrã. Idjaɓa acʉdua jãʉ̃gʉba sãwã poya carebaida sobiabi carea idjaɓa carebaida ne bia jʉ̃ãi carea.
4. Jesuba acʉbisida poya ʉ̃rẽbabida beuɗarãra
Mĩga cawaɗida Jesuba oɗara carebai carea dji bia Lazaroɗeba. Leaɗapeɗa Juaʉ̃ 11:14, 38-44, beɗeaɗadua:
-
¿Sãwã cawa panʉda wãrãda Lazarora beuɗa ɓasida? (Acʉɗadua dji caibea 39).
-
Wãrãda Lazarora bajãa wãnabara, ¿Jesuba careba ɓacasia wãya ʉ̃rẽbabisiɗe ẽjũãne?
5. ¡Zocãrã baraa wãya zocai pananida!
Leaɗapeɗa Salmo 37:29, beɗeaɗadua:
-
¿Sãmabʉrʉ pananida zocãrã ẽberãrãba wãya ʉ̃rẽbabʉdaɗe?
Jesuba ʉ̃rẽbabiya Ãcõrẽ ĩjãbadarãra idjaɓa wãya piradrʉbiɗida zocãrã ẽberãrãra zocai panani carea. Leaɗapeɗa Hecho 24:15, beɗeaɗadua:
-
Ãcõrẽba ʉ̃rẽbabʉdaɗe ẽberãrãra, ¿bʉa caida wãya unu quĩrĩã ɓʉda?
Naʉ̃gʉ quĩchadua: Dji zezemaarã zareaẽ́ ɓʉda piradrʉida idji warrara, ara maʉ̃ quĩrãca Jesumaarã oicha ɓʉa ʉ̃rẽbabi carea ẽberã beuɗarãra
6. Dji ʉ̃rẽbaɗa poya carebaida bʉ́a sobiabi ɓai carea idjaɓa ne bia jʉ̃ãi carea
Dji nẽbʉrʉɗada Jairo cau jãʉ̃ beubariɗaɗeba, jãʉ̃gʉba bio careba ɓʉda dadji ẽberãrãra dji cuariada beubari panʉbʉrʉ sobiabi carea idjaɓa necai ɓamãrẽã. Leaɗadua jãʉ̃ nẽbʉrʉɗada wãrãda mãwãsida Ãcõrẽ Beɗeaɗe Luca 8:40-42, 49-56.
Jesuba wãya piradrʉbi naẽna Jairo caura idjia jarasia: “Ne wayarãdua. Bʉa soɗeba [ĩjãdua]” (Acʉɗadua dji caibea 50). Jʉ̃ã ɓʉbʉrʉ wãrãda Ãcõrẽba wãya piradrʉbiya ẽberã beuɗarã, jãʉ̃gʉba ¿sãwã poya careba ɓʉda bʉra...
-
...bʉ cuaria beubʉrʉɗe?
-
... bʉ ne minijĩchia mãwã ɓʉɗe?
Acʉɗapeɗa dji VIDEODA, beɗeaɗadua.
-
Jãʉ̃ jʉ̃ã panʉ ʉ̃rẽbaɗiba Phelicity, jãʉ̃gʉba ¿sãwã careba ɓʉda dji zezera?
ẼBERÃRÃBA JARA PANɄRA: “Mʉ̃maarã zarea ɓʉda ĩjãi carea beuɗarãra wãya zocai pananida naʉ̃ ẽjũãne”.
-
¿Bʉa cãrẽda quĩcha ɓʉ?
-
¿Bʉa cãrẽ textoba Ãcõrẽ Beɗeaɗebemada poya acʉbida jaradiai carea wãrã arada ẽberã beuɗarãba ʉ̃rẽbaɗida naʉ̃ ẽjũãne?
JŨMA BEƊEAƊA
Ãcõrẽ Beɗeaba jara ɓʉda zocãrã ẽberãrãra ʉ̃rẽbaɗida. Jeowaba bio quĩrĩã ɓʉda jãʉ̃ ẽberã beuɗarãba wãya zocai pananida, maʉ̃ bẽrã dji ʉɓʉada diasida Jesua ʉ̃rẽbabi carea.
Cawaɗara
-
¿Sãwã cawa panʉda Jeowaba Jesu biɗa ʉ̃rẽbabi quĩrĩã panʉda ẽberãrãra wãya zocai panani carea?
-
¿Sãmabʉrʉ pananida ẽberã beuɗarãra ʉ̃rẽbabʉdaɗe: bajãne wa ẽjũãne? ¿Cãrẽ cãrẽã jãʉ̃ jãwã quĩcha ɓʉda?
-
Bʉmaarã, ¿cãrẽ cãrẽã wãrãda poya cawaida bʉ cuariara beuɗada wãya poya zocai pananida?
CAWADUA MÃSA
Leadua ʉ̃rãga biada sobiabi ɓamãrẽã bʉ cuaria beubʉrʉmĩna.
“Naʉ̃gʉba poya carebaida dji cuariara beuɗacare” (¡Despertad!, 2018, núm. 3)
¿Ãcõrẽ Beɗeaba poya carebaida aɓaʉba djuburia ɓʉbʉrʉ dji cuariara beuɗa bẽrã?
¿Sãwã poya carebaida warra zaquerã dji cuariara beubʉrʉɗe?
¿Aɓaʉba ʉ̃rẽbabiya bajãne? ¿Aɓaʉba ʉ̃rẽbaẽ́a?
