Éyòng ndinding waan o he wu, nnem waan o bele mintié ai olun. Asu té ndò Bibel a kat na awu a ne nzinzing waan (1 Kòrinti 15:26). Ayègè 27, bi nga yen na Yéhova a yi dzang’la awu. Ye a yi bò dzom zing asu é ba be nga wu? A ayègè di, wò yi yen abui mam mefe me bebege abeng ngaaga Yéhova a nga kaa na a yi dugen sò ai minkunda mibot énying. Bò fe be ne nying kòm amu Yéhova a yi bò womolo! Ve, ye nala a ne fò dzam bòben? Ye bewu ba yi womo ba yi nying a si mu ngeki a yob?

1. Dzé Yéhova a yi na a bò asu mindinding miaan mi nga man wu?

Yéhova a yi na a dugen sò ai bewu énying. Yiob a ne é mot a nga be a bele ngul mbunen, a nga tòbò ndi na Yéhova a seki nyè dzam vuen éyòng a yi wu. A nga dzo ai Zamba na: “Wò yi me loé, ai ma yi wò yalen [a sòng été]” (Lang’a Yiob 14:13-15).

2. Bia yem ai dzé na bewu ba yi bare sò énying?

Éyòng Yésus a nga be a si mu, Yéhova a nga ve nyè ngul ya womolo bewu. Yésus a nga womo man mininga a toa mimbu 12 ai mòn nkus mininga (Markus 5:41, 42; Lukas 7:12-15). Amvus hala, nde mvoé dzié Lazar a nga wu. Tò ane a nga be a wuya melu menyi be dzeb fe nyè, Yésus a nga bare sò ai nyè énying. Yésus a nga kogelen ai Zamba nde a loé nyè a yob été: “Lazar zaa a nseng mu!” Ai “é mot a nga wu nyò a nga kui a nseng” a vee! (Yohannes 11:43, 44). Tam tsog mintak nda bot ai bemvoé be Lazar be nga wog!

3. Afiri afé o bele asu mindinding mié mi nga man wu?

Bibel a kaa na: “awomo da yi bò” (Mimbòen mi apostel 24:15). É bot Yésus a nga womo be nga ndziki ke nying a yob (Yohannes 3:13). Be nga be mintak ya bare sò nying a si mu. Dzam deda fe, Yésus a mbeme womo bizug bibot asu yi na be nying kòm a si mu, a paradis. A nga dzo na “é ba bese be ne a mesòng” ba yi womo—tò é ba ya be nga maneya vuen, amu be ne a ntsogen Zamba (Yohannes 5:28, 29).

 TUENE FAG

4. Yésus a nga lere na a ne dzam womo bewu

Bia zu yen mam mefe Yésus a nga bò asu mvoé dzié Lazar. Lang’a Yohannes 11:14, 38-44 ai yalen minsili mi tsaa mi:

• Dzé ya lere na Lazar a nga be a wuya fò? (Bebege éfus 39).

• Nge amvus awu dié Lazar a ke a yob, ye wò tsog na Yésus a nga yi nyè bi a ngul asu yi na a bare zu a si?

Bebege VIDÉO.

5. Bizug bibot bia yi womo!

Lang’a Salmen 37:29 ai yalen a nsili hi:

• Bizug bibot bia yi man kui a mesòng bia yi nying avé?

Yésus a yi ki womo ve é ba be nga sié Yéhova. Lang’a Mimbòen mi apostel 24:15 ai yalen a nsili hi:

• Za wò yi na wa bare yen akulsòng?

• Akia afé afiri yi na bewu ba yi bare sò énying o nga wono bebondé be Phelicity?

 OBALBAS

Bibel a kaa na bakura bebot ba yi womo. Yéhova a yi na be bare sò énying, dzom té nde a nga ve Yésus ngul ya womolo bò.

Dzé bia baala

• Dzé Yéhova ban Yésus ba woren éyòng ba tsog na ba yi womo bewu?

• Bizug bibot bia yi womo bia yi nying avé—ye a yob, ye a si? Asu dzé wò tsog nala?

• Asu dzé o bele ndi na mindinding mié mia yi bare nying?