Mayde adday mettu-ɓernde ko tiiɗi. Ko sabu ɗun Deftere Alla nden noddi mayde gaɲo (1 Korenti 15:26). Ka toɓɓere 27, on jannguno wonndema Yahuwah Alla muloyay on gaɲo. Kono ko honɗun o waɗoyta fii maayuɓe ɓen ? E nder ndee toɓɓere, on ɓeyday janngugol fii fodoore Yahuwah Alla fotunde fii immintingol miliyaarji yimɓe fii no ɓe heɓira ngurndan welɗan haa poomaa. Ko fii Yahuwah Alla immintinoyay ɓe ! Dun no waawi waɗude tigi tigi ? Mayɓe ɓen immintinoyte ka kammu kaa ka hoore leydi ?

1. Ko honɗun Yahuwah Alla faalaa waɗande yimɓe mayɓe ɓe yiɗuɗen ɓen ?

Yahuwah Alla no faalaa moƴƴa immintingol mayɓe ɓen. Gorko gomɗinooɗo ko tiiɗi, noddaaɗo Ayyuuba, no hoolinoo Alla yejjitoytaa mo si o maayii. O wi’i Alla : « A nodday lan, e min mi noototo ma [gila ka gaburu] » (janngee Ayyuuba 14:13-​15).

2. Ko honno anndirɗen mayɓe ɓen immintinoyte ?

Fewndo annabi Iisaa wonunoo ka hoore leydi, Alla okkuno mo bawgal immintingol mayɓe. Annabi Iisaa immintinno jiwun kun duuɓi 12 e ɓiɗɗo keynguujo (Markuusa 5:41, 42 ; Luuka 7:12-15). Ɓawto ɗun, giɗo annabi Iisaa on Laazaru maayi. Fii kala Laazaru hari maayii e surraama ko yahata balɗe nay, annabi Iisaa immintinno mo. Annabi Iisaa torii Alla, o fewti gaburu ndun e o ewnii : « Laazaru, yaltu ! » Onsay « mayɗo on yalti », himo wuuri ! (Yuuhanna 11:43, 44). Miijitee weltaare nde ɓeynguure Laazaru nden e yiɓɓe makko ɓen heɓunoo !

3. Ko tanƴinaare honnde maruɗon fii mayɓe ɓe yiɗuɗon ɓen ?

Deftere Alla nden no fodi : « Ummutal feewuɓe ɓen e ɓoyliiɓe ɓen » (Kuuɗe sahaabaaɓe ɓen 24:15). Ɓee ɓe annabi Iisaa immintinnoo ɓen yahaano ka kammu ɓawto ko ɓe maayi (Yuuhanna 3:13). Hari hiɓe weltii fii ko ɓe immintinaa kon e hoore ndii leydi. Ko wano non, neeɓataa annabi Iisaa immintina miliyaarji yimɓe ka aljanna e hoore ndii leydi. O wi’uno « wonɓe ka genaale ɓen fow » immintinoyte—hay ɓee ɓe yejjituɗen fii mun, ɓayri fii maɓɓe no ka miijo Alla (Yuuhanna 5:​28, 29).

 LUGGINEE

4. Annabi Iisaa holluno himo waawi immintinde mayɓe

Ɓeydee anndugol fii ko annabi Iisaa waɗani Laazaru giɗo makko on. Janngee Yuuhanna 11:14, 38-​44 e yewton fii ɗee lanndaale :

• Ko honno anndirɗen Laazaru maayuno tigi tigi ? (Ndaaree aaya 39).

• Si tawii ɓawto ko Laazaru maayi o yahuno ka kammu, hiɗon miijii haray annabi Iisaa forsuno mo artugol ka hoore leydi ?

Fijinee VIDIO on.

5. Miliyaarji yimɓe immintinoyte !

Janngee Zabuura 37:29 (VPFJ) e yewton fii ngal lanndal :

• Ko honto immintinoyteeɓe ɓen wuuroyta ?

Annabi Iisaa immintinoytaa tun rewooɓe Yahuwah Alla ɓen. Janngee Kuuɗe sahaabaaɓe ɓen 24:15 e yewton fii ngal lanndal :

• Ko hommbo faaleteɗon yi’ude no immintinaa ?

• Ko honno tanƴinaare ummutal ngal ɓuttiniri ɓernde mawɓe Phelicity ɓen e okkiri ɓe wakkilaare ?

 RAWNOODE

Deftere Alla nden no fodi wonndema miliyaarji yimɓe maayuɓe immintinoyte. Yahuwah Alla no faalaa yo ɓe wuuritu e o okki annabi Iisaa bawgal immintingol ɓe.

Ndartannde

• Ko honno Yahuwah Alla e annabi Iisaa miijori fii immintingol mayɓe ɓen ?

• Ko honto miliyaarji yimɓe immintinaaɓe wuuroyta ? Ka kammu kaa ka hoore leydi ? Fii honɗun innanton ɗun ?

• Ko honɗun fellintini on yimɓe ɓe yiɗuɗon ɓen wuuritay ?