LÈSON 30
Ou ké pé wouvwè fanmi a-w é zanmi a-w !
Lè nou ka pèd on moun kè nou enmé, sa ka fann tchè an nou. Sé pousa Labib ka di kè lanmò sé on lènmi (1 Korentyen 15:26). An Lèson 27 la, nou vwè kè Jéova ké fè lanmò disparèt. Men é sé moun-la ki ja mò la aprézan, ka i ké fè ba yo ? Adan lèson-lasa, nou ké aprann plis biten asi on pwomès èstraòwdinè Jéova ka fè-nou. I ka di-nou kè i ké wouba onpakèt moun lavi. Yo osi, yo ké pé viv pou touttan pas Jéova ké résisité-yo ! Men ka i ka montré-nou kè sé on biten ki pé fèt ? Ki koté sé moun-mò la ké résisité, an syèl-la oben asi latè ?
1. Ka Jéova anvi fè pou fanmi an nou é zanmi an nou ki ja mò ?
A pa ti anvi Jéova anvi résisité moun ki ja mò ! Jòb, on misyé ki té ka fè Jéova konfyans toubònman, té sèten kè i té’é sonjé-y apré i mò. Mi sa Jòb di Bondyé : « Ou ké kriyé, é an ké réponn-vou [dépi an tonm-la] » (li Jòb 14:13-15).
2. Kijan nou fè sav kè moun-mò pé résisité ?
Lè Jézi té asi latè, Bondyé ba-y pouvwa pou i té résisité moun-mò. Jézi résisité on tifi ki té ni 12 an é gason a on madanm ki té pèd mari a-y (Mawk 5:41, 42 ; Lik 7:12-15). Plita, on bon zanmi a Jézi mò. Non a-y sé té Laza. Magré sa té ja ka fè 4 jou yo té téré Laza, sa pa anpéché Jézi résisité-y kanmenm. Jézi priyé Bondyé, é apré i di : « Laza, vin déwò-la ! » É « nonm-la ki té mò la sòti ». I té vivan ! (Jan 11:43, 44). Mété-w an plas a fanmi a Laza é zanmi a-y ! A pa ti kontan yo dwèt té kontan !
3. Ki èspwa ki ni pou fanmi an nou é pou zanmi an nou ki ja mò ?
Mi sa Bib-la ka pwomèt-nou : « I ké ni on rézirèksyon » (Akt 24:15). Sé moun-la Jézi résisité la pa monté an syèl-la (Jan 3:13). Jézi résisité-yo pou yo té wouviv asi latè é a pa ti kontan yo té kontan ! Menmjan-la, talè, Jézi ké résisité onpakèt moun pou yo viv pou touttan adan on paradi asi latè. Jézi di kè « touséla ki adan sé tonm-la » ké résisité—menm séla ponmoun pa’a sonjé la. Pou ki rézon ? Pas li Bondyé, i po’o jen oubliyé-yo (Jan 5:28, 29).
AN-NOU FOUYÉ PI FON
Grasa sa nou ka li an Bib-la, nou pé sèten kè Jézi pé résisité moun-mò é kè i ké fè-y. Anplisdisa, sa nou ka li an Bib-la anrapò èvè larézirèksyon ka konsolé-nou é ka ban-nou on bèl èspwa. An-nou vwè tout sé lidé-lasa ansanm.
4. Jézi montré kè i pé résisité moun-mò
An-nou pran tan réfléchi asi sa Jézi fè pou zanmi a-y Laza. Li Jan 11:14, 38-44 é fè on ti kozé asi sé kèsyon-lasa :
-
Ka i ka montré kè Laza té mò poubon ? (gadé vèwsé 39 la).
-
Si apré Laza mò, i monté an syèl-la, ou ka di Jézi té’é fòsé-y wouvin asi latè ?
5. Ni plizyè milya moun ki ké résisité !
Li Sòm 37:29 é fè on ti kozé asi kèsyon-lasa :
-
Ola sé moun-la ki ké résisité la ké viv ?
A pa enki moun ki adoré Jéova, Jézi ké résisité. Li Akt 24:15 é fè on ti kozé asi kèsyon-lasa :
-
Kimoun ki ja pati é kè ou té’é byen enmé wouvwè ?
Si on papa bizwen lévé on timoun a-y ki an sonmèy, sé on ti afè pou-y. Menmjan-la, pa ni pon pwoblèm pou Jézi résisité on moun-mò.
6. Larézirèksyon pé konsolé-w é pé ba-w on bèl èspwa
Jézi résisité fi a Jayir. Ni onlo moun ki té andèy ki li istwa-lasa an Bib-la. Sa konsolé-yo toubònman é sa ba-yo bon fòs ! Li sa ki pasé an Lik 8:40-42, 49-56.
Avan i té résisité tifi-la, Jézi di Jayir : « Pa pè, enki ni fwa » (gadé vèwsé 50 la). Ou sav ké ni on rézirèksyon. Kijan sa pé édé-w…
-
lè ou péd on fanmi a-w oben on bon zanmi a-w ?
-
lè vi a-w andanjé ?
Gadé VIDÉO-la é fè on ti kozé asi kèsyon-la ki ka vin la.
-
Kijan èspérans a larézirèksyon konsolé é ankourajé fanmi a Phelicity ?
MI SA MOUN KA DI : « An pa’a gè kwè moun-mò ké résisité. »
-
Ka ou ka di dè sa ?
-
Ki vèwsé ou té’é pé pran pou montré kè i ké ni on rézirèksyon ?
ON TI RÉZIMÉ
Labib ka di kè ni plizyè milya moun ki ké résisité. A pa ti anvi Jéova anvi résisité moun ki mò ! É i ba Jézi pouvwa pou i fè sa.
Ka ou woutyenn
-
Kijan nou fè sav kè Jéova é Jézi présé présé pou yo résisité moun-mò ?
-
Ola tout pakèt moun-la ki ké résisité la ké viv, an syèl-la oben asi latè ? Poukwa ou ka di sa ?
-
Poukwa ou sèten kè sé moun-la ou enmé la pé rivé a résisité ?
AY GADÉ SA OSI :
Déotwa konsèy pou édé-w lè ni on mòwtalité an fanmi a-w.
« Quand on perd quelqu’un qu’on aime » (Réveillez-vous ! no 3 a 2018)
Èskè sé prensip-la ki an Bib-la pé édé on moun ki andèy ?
Lè sé timoun-la ka pèd on fanmi a yo oben on zanmi a yo, ka ki pé édé-yo ?
Ès ni moun ki ké résisité an syèl-la ? Kimoun ki pé ké résisité ?
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
