Ú ólò domà kà agẹbá tã̀àgã̀ bùlà nè bììla nyíe. Níà nú ea náa vaá Kpá Káí à kolíe neǹ ọ́bvẹ́. (1 Kọ́rìnt 15:26) Mm̀ 27 Nu Gè Nò, o beè nó kọọ̀ Jìhóvà é bé èlbá neǹ ọ́bví. Sõò éé ní ea é nááá ló gbò e ba beè ù e? Mm̀ nakà nu gè nòí, òó nó nú ea kil ló dõòna kà zìgànù Jìhóvà, ea dú gè kẽee gã́bug gãà gbò e ba beè ù lọl kemà ú kọbé bà dé kpéè ló dùm dọ̀ọ̀mà dè-dè. Ẹlẹ é kẽeé va lọl kemà ú! É kọọ̀ níá é láá naaá gé? É kọọ̀ bàé kẽeà kil káála sẹ̀ bàé tõó boo kunukẽ̀í ẽ́?

1. Éé ní e Jìhóvà gbĩ́ gè naa nè gbò e beè vùlè e ba beè ù e?

À tan Jìhóvà ge kẽee gbò e ba beè ù lọl kemà ú. Ene kà gbálà ea beè íe zìgà ea bée kọlà Jóòb beè àgala boo kọọ̀ náa é táẹ̀ nyíè Jìhóvà be à úè. A beè kọ́ nè Bàrì kọọ̀: “Òé kólí kól, vaá nda é áálá [gbẹá mm̀ bànà ú].”—Bugi Jóòb 14:13-15.

2. Éé ní ea náa vaá è nyimá kọọ̀ gbò e ba beè ù é kẽeà ẽ?

Tṍó e Jíízọ̀s beè di boo kunukẽ̀í, Bàrì beè nèe kpóó kọ á kẽee gbò nen lọl kemà ú. Jíízọ̀s beè kẽe ene kà nvín pábia ea beè toolá 12 gbáá nè nvín págbálà ene kà vaà tãa lọl kemà ú. (Máàk 5:41, 42; Lúùk 7:12-15) Tṍó e tṍó téní, Lázarọ̀s ea dú kóò Jíízọ̀s beè ù. Náa kal ló béè kọọ̀ Lázarọ̀s beè ù, vaá ténì dee a téní ló deé e ba beè lìe, Jíízọ̀s beè kẽée lọl kemà ú. Tṍó e Jíízọ̀s tãàgã ló Bàrì lọ̀l, a beè gbóó kòòlà kpã́ kọọ̀: “Lázarọ̀s, aa mm̀ bànàá dù!” Vaá “Lázarọ̀s, ea beè ùa, beè gbóó aa mm̀ bànà úá”—vaá kpáá tõó dùm! (Jọ́ọ̀n 11:43, 44) Ẹ̀b bé e nyíè pá kóò Lázarọ̀s nè pá a tọ beè ẹẹ naaà!

3. Mókà ból dẽesĩ́ ní ea dì nè gbò eo beè vùlè e ba beè ù e?

Kpá Káí zigà nèi kọọ̀: “Gbò nen . . . é kẽeà aa kemà ú.” (Tóm 24:15) Gbò e Jíízọ̀s beè kẽee lọl kemà ú tṍó ea beè di boo kunukẽ̀í gáà àà kil káála. (Jọ́ọ̀n 3:13) Nyíé va beè ẹẹ kọ bà kẽeàè aa kemà ú tõó boo kunukẽ̀í. Mm̀ tẽ̀ènè sĩ́deèá, pọ́ì ńkem̀ tṍó àla, Jíízọ̀s é kẽee gã́bug gãà gbò nen lọl kemà ú kọ bàá dé kpéè ló dùm boo kunukẽ̀í dọ̀ọ̀mà dè-dè. Ẹlẹ beè kọọ̀ “dénè gbò e ba beè ù”—bã̀àna gbò e bàé láá táí nyíe e bà di mm̀ bug Bàrì, é kẽeà aa kemà ú.—Jọ́ọ̀n 5:28, 29.

 KPÁÁ NÓ BỌ̀Ọ̀VẸ̀

4. Jíízọ̀s beè naa gbò nú ea zógè kọọ̀ àé láá kẽee gbò nen lọl kemà ú

Kpáá nó gã́bug nú e Jíízọ̀s beè naa nè a kóò Lázarọ̀s. Bugi Jọ́ọ̀n 11:14, 38-44, vaá ò gbóó aalai gbò bíbví:

• Éé ní ea náa vaá è nyimá kọọ̀ Lázarọ̀s beè ù e?—Ẹ̀b 39 gã́bel.

• É kọọ̀ beè Lázarọ̀s beè kil káála, Jíízọ̀s gáẹ̀ beè kẽée òòmà domá boo kunukẽ̀í?

Bìlà VÍDIÒÍ.

5. Gã́bug nen é kẽeà aa kemà ú!

Bugi Psalm 37:29, vaá ò gbóó aalai nakà bíbví:

• Ãàe ní e gã́bug gãà gbò e bàé kẽeà aa kemà ú é tõo ẽ́?

Jíízọ̀s é kẽee gã́bug gbò nen bíi nágé ló gbò e bà náa géè fã̀ Jìhóvà. Bugi Tóm 24:15, vaá ò gbóó aalai nakà bíbví:

• Mée ní ea é léémá ni gè mòn tṍó ea é kẽeà aa kemà ú é?

• Mósĩ́ deè ní e ból dẽesĩ́ kẽ̀èà aa kemà ú beè nvèè nyíé gbàà vaá siè kpóó ló tẹ̀ nè kà Phelicity e?

 NÚ E NI NÓ

Kpá Káí zigà kọọ̀ gã́bug gãà gbò e ba beè ù é kẽeà aa kemà ú. Jìhóvà gbĩ́ kọ bàá kpáá tõó dùm, vaá a beè tú kpóó nè Jíízọ̀s kọ á kẽeé va lọl kemà ú.

Ge Òòa Boo

• Ge kẽee gbò e ba beè ù lọl kemà ú, tọ́á ló Jìhóvà nè Jíízọ̀s naa vàẹ?

• Ãàe ní e gã́bug gãà gbò e bàé kẽeà aa kemà ú é tõo ẽ́—é kọọ̀ káála sẹ̀ boo kunukẽ̀í ẽ́? Éé ní ea náa vaá ò kọ́ vó é?

• Éé ní ea náa kọ ó àgala boo kọọ̀ gbò eo beè vùlè e ba beè ù é kẽeà aa kemà ú é?