ƝAAKWƐLƐI 30
Ə́ wɛlikɛmaanuai daa haa di kaa nwɔnɔ pai pənəi di pa di yɛnɛɛ kɛ !
Haa kaa a mɛni ta yii a pa a maawɛli mɛni kɛnɛ. Yili ɓə a gɛ Biblə yɛ kɛ ma haa kaa a gu yowo (Korɛntə dɔlɔɔ 15:26). Yɛ pələi gu gaa la ɲaakwɛlɛi 27 hu, Zehova yee kaa pai tɛɛi gu yowoi tii ɓa. Kəlaa nuai daa haa diɛ yaan, lə ɓə gaa pai gɛi di maamɛni hu ? Ɲaakwɛlɛi ŋɛi hu, ə́ kaa pai ə́ wɔ mɛnikɔlɔnŋaa ta pɛlɛi ma yɛ hwilɛn na Zehova ŋɔ mɛni laakwəlamoɔ lɛlɛɛ takpɛli ɓa. Mɛni laakwəlamoɔ tii ka : Gaa pai haaɓəlaa nu miliyali tamaa muhəɠəi di pənə di pa di yɛnɛɛ kɛ yii kpɛɛ hwa kɛ ma. Gaa pai di nwun ɉii ! Yili a pɛli mɔɔn kɛi ? Di kaa pai nwun ɉii di yɛnɛɛ kɛ lɔi mɛi awala kɛtii yələkɔlɔn ɉu ?
1. Gu wɛlikɛmaanuai daa haa, lə ɓə Zehova kaa bɔ ə gɛ di maamɛni hu ?
Naawɛli kaa Zehova ɓa kpɔ kɛnɛ nuai daa haa ə pənə ə pa a diɛ yɛnɛɛ. Hulɔnu ta yii di kɛi kɛ ma Ɉɔbə, laanalaa kɛnɛ ə kɛ ɲəi, naa kpɔ kɛ na a neelee yɛ ma Yálá hwa lea kɛ ma ɉaa pulu. Ə mo Yálá ɓa yɛ ma : “ Ə́ kaa pai teliɓo kɛi ŋi ə́ woo pulu pənə [gáma hu] ” (Ɉɔbə 14:13-15 ɓo, NWT).
2. Gu gɔlɔn ləi guɔ ma haaɓəlaa da pɛli nwun ɉii ?
Ɓɛlowai Zesu ə kɛ la lɔi mɛi, Yálá ə haaɓəlaa nwun mɛni ŋɔ huwala-walalaa tɛɛ bɔ. Zesu ə nɛɛnu lokolo ta nwun haaɓəlaa lowai yii gaa-kwəlan ə kɛ a kwəlan 12, ə ma kɛ kalanin nɛɛnu ta lon ɉulɔnu (Markə 5:41, 42 ; Lukə 7:12-15). Pulu ɓa, Zesu məlanmun Lazarə ə haa. Pələi ma Lazarə aa kɛ haa la ə lɛɛ daa nowu holo naan dɛɛ pulu, Zesu ə pɛli nwun ɉii haaɓəlaa lowai. Zesu ə Yálá hwɛli yili pulu ə ɲɛi hee gama ɓa pələ ə toma yɛ ma : “ Lazarə kulɔ ə́ káma hu ! ” Yili pulu “ nu powa tii ə kulɔ gamai ” yɛ ɓo a vulú ! (Ɉaan 11:43, 44). Ə́ kiliŋahiɛ lɔ pələi Lazarə məlaa da ɲəi bɛlɛn nua di kwəi ə nɛɛ la !
3. Ə́ wɛlikɛmaanuai daa haa, kilitɔɔmaalaa ləkɛɛ ɓə vilɛnŋaa diɛ ?
Biblə kaa kɛi ma haaɓəlaa “ kaa pai pənəi di nwun ” (Gɛlaɠaa 24:15). Nuai Zesu ə di nwun haaɓəlaa lowai ɓɛlowai ə kɛ la ɓɛ lɔi mɛi, di ho li yələkɔlɔn ɉu (Ɉaan 3:13). Di nwun mɛni haaɓəlaa lowai diɛ pənə diɛ pa ɓɛ lɔi mɛi yɛnɛɛ kɛi yili ə di kwəinɛɛ. Yɛ pələi lɔ ə kɛ la, Zesu kaa pai nu miliyali tamaa nwun ɉii di yɛnɛɛ kɛ lɔi mɛi alizana kpɛɛ hwa kɛ ma. Ə kɛ ma “ haanua kəlee ” ə ma kɛ yiiɠaai daa lea diɛ kəlaa di naa kili ə ɓo Yálá ŋa di kaa pai nwun ɉii (Ɉaan 5:28, 29).
Ə́ WƆ MƐNIKƆLƆNŊAA TA PƐLƐ MA
Gaa mɛniɠaai da nɛ Biblə hu diɛ ma haaɓəlaa da pɛli ma di nwun ə lɛɛ yili kaa pai kɛi. Ə lɛɛ gaa pələi haaɓəlaa nwun mɛni a pɛli əi hwaŋalɔ la ə lɛɛ ə kilitɔɔmaalaa tɛɛ ə́ pɔ.
4. Zesu ə nɛ yɛ ma a pɛli haaɓəlaa nwun ɉii
Gu mɛni takpɛliɠaa kaa yii Zesu ə gɛ məlanmun Lazarə haa mɛni hu. Ɉaan 11:14, 38-44 ɓo, ə lɛɛ ka lono kɛ gɛɛmaalən ŋɛi mɛi :
-
Gu gɔlɔn ləi guɔ ma Lazarə ə haa kpɔ a neelee ? (Nwookpuɔ 39 kaa).
-
Akɛ haa tii Lazarə ə mo ə li yələkɔlɔn ɉu, ə́ wɔ kili ɓa Zesu ə li mɔɔn vɔlɔhimaɓo ə pənə ə pa yɛnɛɛ lɔi mɛi ?
5. Nu kpulu kɛnɛ kaa pai nwun ɉii haaɓəlaa lowai !
Maatɛnɛ 37:29 ɓo, ə lɛɛ ka lono kɛ gɛɛmaalən ŋɛi mɛi :
-
Nu kpulu kɛnɛɛ tii pai nwun ɉii mɛni ɓə di kaa pai yɛnɛɛ kɛi laa ?
Nuai da Zehova ɓatoo diɛ tɔnɔ lɔ hwəi Zesu kaa pai di nwun ɉii. Gɛlaɠaa 24:15 ɓo, ə lɛɛ ka lono kɛ gɛɛmaalən ŋɛi mɛi :
-
Nuai pai nwun ɉii haaɓəlaa lowai gbɛɛ kpɔ ɓə ə́ kaa bɔ ə́ pa gaa ?
Yɛ pələi lɔ gɛ laa nɛɛ la longaanan ɲəi ə non nwun yili a kɛi yii, pələ lɔ ɓə Zesu a pɛli haaɓəlaa nwun ɉii la
6. Haaɓəlaa nwun mɛni a hwaŋalɔ da kilitɔɔmaalaa tɛɛ gu pɔ
Nuai haa aa too diɛ damaa daa hwaŋalɔ hɔlɔɓo Jairusə lon nɛɛnu nwun mɛni hu haaɓəlaa lowai. Bɔlɔkiliinŋaa tii kaa a teɲa. Lukə 8:40-42, 49-56 ɓo.
Gɛɛ Zesu ho Jairusə non nɛɛnu nwun, ə mo Jairusə ɓa yɛ ma : “ Ho ɲínɛn-ɲínɛn kɛlɛɛ laa ná ” (Nwookpuɔ 50 kaa). Haaɓəlaa nwun mɛni ŋɔ kilitɔɔmaalaa a pɛli kpɔnmaa tɛɛ ləi ə́ pɔ…
-
ə́ wɛlikɛmaamun da a haa ?
-
mɛni ta a kɛi pa gɛi ə́ wɔ yɛnɛɛ ə lɛɛ ɉu ?
VIDIO kaa, ə lɛɛ ka lono kɛ gɛɛmaalən ŋɛi mɛi.
-
Haaɓəlaa nwun mɛni ŋɔ kilitɔɔmaalaa ə Phelicity kaanua hwaŋalɔ ləi ?
NUTAƓAA DA KƐ KƐI MA : “ Nwɛ́i gɛ laa walaa ŋi laa haaɓəlaa nwun mɛni. ”
-
Yáán ə́ kaa kɛi lə ?
-
Vɛlisɛɛ ləkɛɛ ɓə ya pɛli ə́ ɉəɠə ɉu yɛ́ nɛ la yɛ́ ma haaɓəlaa kaa pai nwun ɉii ?
YII GU GALAN
Biblə a mo yɛ ma nu miliyali tamaa kaa pai nwun ɉii haaɓəlaa lowai. Zehova kaa bɔ di pənə di yɛnɛɛ kɛ ə lɛɛ aa di nwun mɛni ŋɔ huwala-walalaa tɛɛ Zesu pɔ.
Nɛɛ ə́ kili pɔ
-
Zehova da Zesu da di kiliŋahiɛ ləi diɛ vilɛn na haaɓəlaa nwun mɛni ɓa ?
-
Nu miliayli tamaa tii pai nwun ɉii minɛ ɓə di kaa pai yɛnɛɛ kɛi laa, yələkɔlɔn ɉu ɓaa lɔi mɛi ? Lə mɛni ɓa ə́ kaa moi tii ?
-
Lə mɛni ɓa ə́ laana kpɔ a neelee yɛ́ ma ə́ wɛlikɛmaanuai daa haa di kaa pai pənəi di yɛnɛɛ kɛ ?
MƐNI TAKPƐLIɠAA
Ə́ wɔ nuta a haa yii ya pɛli ə́ gɛ dɛi-tɛiɠaai kaa.
“ Kpɔnmaa yii gwa pɛli ɉɔlɔɓoi gu wɛlikɛmaamun da a haa ” (Réveillez-vous! no 3 2018)
Biblə ŋɔ liɛwooɠaa da pɛli kpɔnmaa tɛɛ nuta pɔ yii ŋɔ nuta aa haa ?
Kpɔnmaa ləkɛɛ ɓə leapɛlɛɛ da pɛli ɉɔlɔɓoi ɓɛlowai di wɛlikɛmaamun da a haa la ?
Nutaɠaa kaa mɔɔn pai nwun ɉii yələkɔlɔn ɉu ? Gbɛɛ nua ɓə di ho pai nwun ɉii ?
“ Lə ɓə da kɛ ma haaɓəlaa nwun mɛni ? ” (Hɛɓɛ yii gaa gwɛli yɛli ɓa)