Okú nọ hẹn awubla po awufiẹsa sinsinyẹn po wá namẹ. Enẹ wẹ zọ́n bọ Biblu do ylọ okú dọ kẹntọ de. (1 Kọlintinu lẹ 15:26) To Nupinplọn 27tọ mẹ, a ko plọn dọ Jehovah na gbawhàn kẹntọ enẹ tọn. Amọ́, etẹwẹ na jọ do mẹhe ko kú lẹ go? To nupinplọn ehe mẹ, a na plọn nususu dogọ gando opagbe dagbedagbe Jehovah tọn devo go—enẹ wẹ opagbe lọ dọ e na vọ́ gbẹtọ liva susu hẹngọwa ogbẹ̀ nado duvivi ogbẹ̀ tọn kakadoi. Na nugbo tọn, e na fọ́n yé sọnku! Be enẹ gán jọ nugbonugbo ya? Be yé na yin finfọnsọnku nado nọgbẹ̀ to olọn mẹ wẹ ya kavi to aigba ji?

1. Etẹwẹ Jehovah jlo na wà na mẹvivẹ mítọn he ko kú lẹ?

Jehovah tindo ojlo vẹkuvẹku lọ nado hẹn mẹhe ko kú lẹ gọwá ogbẹ̀. Dawe yisenọ de he nọ yin Jobu kudeji dọ Jiwheyẹwhe ma na wọn emi eyin emi kú. E dọna Jiwheyẹwhe dọmọ: “Hiẹ na ylọ, bọ yẹn na siọ we [sọn Yọdò mẹ].”—Hia Jobu 14:13-15.

2. Nawẹ mí wagbọn do yọnẹn dọ oṣiọ lẹ gán yin finfọnsọnku?

Whenue Jesu to aigba ji, Jiwheyẹwhe na ẹn huhlọn nado fọ́n gbẹtọ lẹ sọnku. Jesu hẹn viyọnnu owhe 12 mẹvi de gọna visunnu nawe asuṣiọsi de tọn gọwá ogbẹ̀. (Malku 5:41, 42; Luku 7:12-15) To nukọn mẹ, họntọn Jesu tọn Lazalọsi kú. Jesu hẹn Lazalọsi gọwá ogbẹ̀ dile etlẹ yindọ e ko yì azán ẹnẹ he Lazalọsi kú bo yin dìdì. To whenue Jesu hodẹ̀ hlan Jiwheyẹwhe godo, e pannukọn yọdò lọ bo dawhá poun dọmọ: “Lazalọsi, tọ́njẹgbonu wá!” Podọ “dawe he ko kú lọ tọ́njẹgbonu”—bo tin togbẹ̀! (Johanu 11:43, 44) Pọ́n lehe homẹ na ko hùn hagbẹ whẹndo tọn Lazalọsi tọn lẹ po họntọn etọn lẹ po taun do sọ!

3. Todido tẹwẹ tin na mẹvivẹ towe he ko kú lẹ?

Biblu dopà dọ: “Fọnsọnku de na tin.” (Owalọ lẹ 24:15) Mẹhe Jesu fọnsọnku wayi lẹ ma yì olọn mẹ. (Johanu 3:13) Homẹ yetọn hùn dọ yé yin hinhẹngọwa ogbẹ̀ to aigba ji fi. Mọdopolọ, to madẹnmẹ Jesu na fọ́n gbẹtọ liva susu lẹ sọnku nado duvivi ogbẹ̀ tọn kakadoi to paladisi mẹ to aigba ji. E dọ dọ “mẹhe to yọdò oflin tọn lẹ mẹ lẹpo”—etlẹ yin mẹhe e sọgan taidi dọ yé ko yin winwọn, ṣigba bo tin to oflin Jiwheyẹwhe tọn mẹ lẹ—na yin finfọnsọnku.—Johanu 5:28, 29.

 DINDONANU DOGỌ

4. Jesu dohia dọ emi sọgan fọ́n oṣiọ lẹ sọnku

Plọn nususu dogọ gando nuhe Jesu wà na họntọn etọn Lazalọsi go. Hia Johanu 11:14, 38-44, enẹgodo dọhodo kanbiọ ehelẹ ji:

• Nawẹ mí wagbọn do yọnẹn dọ Lazalọsi kú nugbonugbo?—Pọ́n wefọ 39.

• Eyin Lazalọsi ko yì olọn mẹ wẹ, be a lẹndọ e na biọ dọ Jesu nisọ hẹn ẹn gọwá nado nọgbẹ̀ to aigba ji ya?

Hò VIDEO lọ.

5. Mẹsusu wẹ na yin finfọnsọnku!

Hia Salmu lẹ 37:29, enẹgodo dọhodo kanbiọ ehe ji:

• Fitẹ wẹ gbẹtọ liva susu he na yin finfọnsọnku lẹ na nọgbẹ̀ te?

Mẹsusu he Jesu na fọnsọnku lẹ ma na bẹ mẹhe sẹ̀n Jehovah lẹ kẹdẹ hẹn. Hia Owalọ lẹ 24:15, enẹgodo dọhodo kanbiọ ehe ji:

• Mẹnu wẹ e na jlo we dọ ni yin finfọnsọnku?

• Nawẹ todido fọnsọnku tọn miọnhomẹna mẹjitọ Phelicity tọn lẹ bosọ na yé tuli gbọn?

 BLADOPỌ

Biblu dopà dọ gbẹtọ liva susu he ko kú lẹ na yin finfọnsọnku. Jehovah jlo dọ yé ni vọ́ gọwá nọgbẹ̀, podọ e ko na huhlọn Jesu nado fọ́n yé sọnku.

Dogbapọn

• Nawẹ mí wagbọn do yọnẹn dọ Jehovah po Jesu po to jejeji nado hẹn oṣiọ lẹ gọwá ogbẹ̀?

• Fie wẹ gbẹtọ liva susu he na yin finfọnsọnku lẹ na nọgbẹ̀ te —olọn mẹ wẹ ya kavi aigba ji? Naegbọn a do dọ mọ?

• Etẹwẹ hẹn we kudeji dọ mẹvivẹ towe lẹ gán gọwá nọgbẹ̀?