ZAJ KAWM 30
Cov Koj Hlub Yuav Rov Muaj Sia Dua!
Phau Vajlugkub hais tias txoj kev tuag yog peb tus yeeb ncuab vim txoj kev tuag ua rau peb quaj ntsuag. (1 Kauleethaus 15:26) Hauv Zaj Kawm 27, peb tau kawm tias Yehauvas yuav muab tus yeeb ncuab no rhuav tshem mus. Tiam sis ua li cov uas twb tuag lawm ne, yuav ua li cas rau lawv? Hauv zaj kawm no, koj yuav kawm tias Yehauvas yuav tsa qas txhiab qas vam tus ciaj sawv rov los thiab lawv yuav tau nyob mus ib txhis. Yog li, puas muaj tau li ntawd tiag? Lawv yuav ciaj sawv rov los nyob saum ntuj los yog nyob hauv ntiaj teb?
1. Yehauvas yuav ua dab tsi rau cov peb hlub uas tuag lawd?
Yehauvas tos tsis taus yuav tsa cov tuag ciaj sawv rov los. Ib tug txiv neej uas muaj kev ntseeg hu ua Yauj cia siab tias Vajtswv yeej yuav nco ntsoov nws thaum nws tuag. Nws hais rau Vajtswv tias, “Koj yuav hu kuv, thiab kuv yuav teb koj [hauv qhov ntxa tuaj].”—Yauj 14:13-15.
2. Ua li cas peb thiaj paub tias cov tuag yuav ciaj sawv tau rov los?
Thaum Yexus nyob hauv ntiaj teb no, Vajtswv muab hwj chim rau Yexus tsa tau cov tuag ciaj sawv rov los. Yexus tsa tau ib tug ntxhais muaj 12 xyoos thiab ib tug poj ntsuam tus tub ciaj sawv rov los. (Malakaus 5:41, 42; Lukas 7:12-15) Tom qab no, thaum Yexus tus phooj ywg hu ua Laxalus tuag thiab twb muab zais tau plaub hnub lawm los, Yexus tseem tsa tau nws ciaj sawv rov los thiab. Tom qab Yexus thov Vajtswv tas, nws hu nrov nrov tias, “Laxalus, koj cia li tawm los!” Ces “Laxalus txawm tawm los” rov muaj sia dua! (Yauhas 11:43, 44) Xav seb Laxalus tsev neeg thiab nws cov phooj ywg yuav zoo siab npaum li cas!
3. Puas muaj kev cia siab rau cov koj hlub uas tuag lawd?
Phau Vajlugkub cog lus tias, “Vajtswv yuav tsa cov neeg uas tuag lawm txhua tus sawv rov qab los.” (Tes Haujlwm 24:15) Cov uas Yexus tau tsa ciaj sawv rov los thaum ub, tsis tau mus saum ntuj. (Yauhas 3:13) Txawm nws tsa lawv ciaj sawv rov los nyob hauv ntiaj teb no xwb los, lawv yeej zoo siab kawg li. Tib yam li ntawd, tsis ntev Yexus yuav tsa qas txhiab qas vam tus uas tuag lawd ciaj sawv rov los nyob hauv lub vaj kaj siab hauv ntiaj teb no. Yexus hais tias txhua tus uas nyob hauv Vajtswv lub cim xeeb, nws yuav tsa ciaj sawv rov los, tsis hais cov uas tsis muaj leej twg nco txog lawm.—Yauhas 5:28, 29.
KAWM NTXIV
Kawm txog tej pov thawj hauv Phau Vajlugkub uas qhia tias Yexus yeej muaj hwj chim tsa tau cov tuag ciaj sawv rov los. Thiab kawm seb qhov uas cov tuag yuav ciaj sawv rov los ho nplig tau koj thiab pab tau koj muaj kev cia siab li cas.
4. Yexus yeej muaj hwj chim tsa tau cov tuag ciaj sawv rov los
Nyeem Yauhas 11:14, 38-44 seb Yexus tau pab nws tus phooj ywg Laxalus li cas, thiab tham txog ob lo lus no:
-
Ua li cas peb ho paub tias Laxalus yeej tuag lawm tiag tiag?—Saib nqe 39.
-
Yog Laxalus twb mus saum ntuj lawm, koj xav Yexus puas yuav tsa nws ciaj sawv rov los nyob hauv ntiaj teb no dua?
5. Coob tus yuav ciaj sawv rov los!
Nyeem Phau Ntawv Nkauj 37:29, thiab tham txog lo lus no:
-
Qas txhiab qas vam tus yuav ciaj sawv los nyob qhov twg?
Yexus tsis yog tsa cov uas pe hawm Yehauvas ciaj sawv rov los xwb. Nyeem Tes Haujlwm 24:15, thiab tham txog lo lus no:
-
Koj xav pom leej twg ciaj sawv rov los?
Yexus tsa tau cov tuag ciaj sawv rov los yooj yim npaum li leej txi tsa tau nws tus tub uas tsaug zog
6. Qhov uas cov tuag ciaj sawv rov los yuav nplig tau koj thiab pab tau koj muaj kev cia siab
Nyeem txog Yailus tus ntxhais hauv Lukas 8:40-42, 49-56. Zaj no yeej muaj tiag tiag thiab twb nplig tau coob tus uas muaj kev quaj ntsuag.
Ua ntej Yexus tsa Yailus tus ntxhais ciaj sawv rov los, nws hais rau Yailus tias, “Koj tsis txhob ntshai; cia li ntseeg, koj tus ntxhais yeej yuav ciaj.” (Saib nqe 50.) Qhov uas cov tuag ciaj sawv tau rov los pab tau koj li cas . . .
-
thaum ib tug koj hlub tas sim neej?
-
thaum koj txoj sia yuav tu?
Saib zaj YEEB YAJ KIAB, thiab tham txog lo lus no:
-
Vim Filixetis (Phelicity) niam thiab txiv ntseeg tias cov tuag ciaj sawv tau rov los, nplig tau nkawd li cas?
IB TXHIA HAIS TIAS: “Tsis txaus ntseeg, twb tsis muaj leej twg pom cov tuag ciaj sawv rov los dua li.”
-
Koj xav li cas xwb?
-
Koj yuav siv nqe Vajlugkub twg los qhia tias Vajtswv yeej yuav tsa cov tuag ciaj sawv rov los?
KOJ KAWM TAU DAB TSI
Phau Vajlugkub cog lus tias cov uas tuag lawd yuav ciaj sawv rov los. Yehauvas xav kom lawv rov muaj sia dua, thiab nws twb muab hwj chim rau Yexus tsa tau lawv ciaj sawv rov los.
Rov Tham Dua
-
Yehauvas thiab Yexus puas xav tsa cov tuag ciaj sawv rov los?
-
Qas txhiab qas vam tus yuav ciaj sawv rov los nyob saum ntuj los yog hauv ntiaj teb? Vim li cas koj ho hais li ntawd?
-
Ua li cas koj thiaj ntseeg tias cov koj hlub yuav ciaj sawv tau rov los?
TSHAWB NTXIV
Kawm seb yog koj muaj kev quaj ntsuag koj yuav ua li cas.
“Pab Cov Uas Muaj Kev Quaj Ntsuag” (Tsim Dheev! Phau 3 Xyoo 2018)
Phau Vajlugkub tej hauv paus ntsiab lus pab puas tau cov uas quaj ntsuag?
Cov me nyuam yuav ua li cas thaum ib tug lawv hlub tas sim neej?
Puas yuav muaj leej twg ciaj sawv mus saum ntuj? Vajtswv yuav tsis tsa cov zoo li cas?
“Qhov Uas Ciaj Sawv Rov Los Yog Li Cas?” (Nyeem hauv jw.org/hmn)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
