LESENI 30
Emu Lalokau Mase Taudia Do Idia Mauri Lou!
Mase ese taitai bona lalohisihisi bada ia havaraia. Unai dainai Baibel ia gwau mase be iseda inai tauna. (1 Korinto 15:26) Leseni 27 ai ita dibaia gauna be, Iehova ese mase, ita inai henia gauna, do ia haorea momokani. To idia mase vadaeni taudia dekenai dahaka do ia vara? Inai leseni ai, Iehova ena gwauhamata namodia ma haida do oi dibaia, unai be ia ese taunimanima milioni momo do ia hamauria bona tanobada ai mauri do idia moalelaia hanaihanai. Ia ese idia do ia hatorea isi lou! Unai be momokani do ia vara, a? Idia toreisi lou neganai edeseniai do idia mauri, guba eiava tanobada ai?
1. Iehova ia ura iseda lalokau mase taudia totona dahaka ia karaia?
Iehova ia ura dikadika mase taudia do ia hamauria lou. Abidadama tauna Iobu ia diba momokani bema ia mase, Dirava be ia do ia laloaboio lasi. Iobu be Dirava dekenai ia gwau: “Oi be do oi boiboi bona [guria gabuna amo] do lau haere.”—Iobu 14:13-15 duahia.
2. Edena bamona ita diba mase taudia do idia toreisi lou?
Iesu be tanobada ai ia noho neganai, Dirava ese ia dekenai siahu ia henia mase taudia ia hatorea isi lou totona. Iesu ese mauri lagani 12 kekeni, bona vabu ena natuna mero ia hamauridia. (Mareko 5:41, 42; Luka 7:12-15) Gabeai, Iesu ena turana Lasaro ia mase. Ena be Lasaro ia mase bona idia guria, to dina foa murinai Iesu ese ia hamauria. Iesu be Dirava ia guriguri henia murinai ia boiboi: “Lasaro e, oi raka-lasi!” Bona “ia mase vadaeni tauna ia raka-lasi”—ia mauri! (Ioane 11:43, 44) Lasaro ena famili bona turadia ese idia mamia moalena mani oi laloa!
3. Emu lalokau mase taudia totona dahaka helaro ia noho?
Baibel ia gwauhamata, “toreisi lou” do ia vara. (Kara 24:15) Iesu ese guna ia hatorea isi lou taudia be guba dekenai idia daekau lasi. (Ioane 3:13) Iesu ese tanobada ai idia ia hatorea isi lou dainai idia moale. Unai hegeregerena, kahirakahira Iesu ese taunimanima bilioni momo do ia hatorea isi lou bona tanobada paradaisona ai mauri do idia moalelaia hanaihanai. Ia gwau, “gara gabudia ai idia noho taudia ibounai”—herevana idia haida ita laloatao lasi, to Dirava be idia ia laloatao—do idia toreisi lou.—Ioane 5:28, 29.
DIBA MA HAIDA ABIA
Baibel ai hamomokania gaudia oi tahua, unai amo oi diba dala ia noho mase taudia do idia toreisi lou. Danu toreisi lou ese oi ia durua bona helaro ia henia dalana oi dibaia.
4. Iesu ese ia hamomokania mase taudia ia hatorea isi lou diba
Iesu ese ena turana Lasaro totona ia karaia karana oi dibaia. Ioane 11:14, 38-44 duahia, bena inai henanadai herevalaia:
-
Edena bamona ita diba Lasaro be ia mase momokani?—Siri 39 itaia.
-
Bema Lasaro be guba dekenai ia daekau, oi laloa Iesu ese tanobada ai ia do ia hamauria, a?
5. Taunimanima momo do idia toreisi lou!
Salamo 37:29 duahia, bena inai henanadai herevalaia:
-
Do idia toreisi lou taunimanima bilioni be edeseniai do idia noho?
Iesu ese mase taudia ibounai, Iehova idia tomadiho henia lasi taudia danu do ia hatorea isi lou. Kara 24:15 duahia, bena inai henanadai herevalaia:
-
Oi ura daika oi itaia ia toreisi lou?
Mani inai oi laloa: Tama ta ese ena natuna be mahuta amo ia hanogaia bamona, Iesu ese ta be mase amo ia hatorea isi lou diba
6. Toreisi lou ese oi do ia hagoadaia bona helaro ia henia diba
Baibel ai Iairo ena natuna kekeni ena sivarai ese mase dainai idia taitai taudia momo ia durua bona ia hagoadaia. Luka 8:40-42, 49-56 ai unai sivarai oi duahia.
Iesu be Iairo ena natuna kekeni ia do hatorea isi lou lasi neganai, kekeni ena tamana ia hamaoroa: “Oi gari lasi, oi abidadama sibona.” (Siri 50 itaia.) Toreisi lou helarona ese edena dala ai oi ia durua . . .
-
bema emu lalokauna tauna ta ia mase?
-
bema emu mauri do oi haboioa?
VIDIO itaia, bona henanadai herevalaia.
-
Toreisi lou helarona ese edena dala ai Phelicity ena tama sina ia durua bona hagoadaia?
HAIDA IDIA GWAU: “Mase taudia do idia toreisi lou lalohadaina abia dae karana be auka.”
-
Dahaka oi laloa?
-
Edena siri amo do oi hahedinaraia toreisi lou be do ia vara?
POINT BADANA
Baibel ia gwauhamata idia mase vadaeni taudia bilioni do idia toreisi lou. Iehova ia ura do idia mauri lou, bona Iesu dekenai siahu ia henia mase taudia ia hatorea isi lou totona.
Riviu
-
Edena dala ai ita diba Iehova bona Iesu idia ura mase taudia idia hamauria?
-
Toreisi lou taudia bilioni be edeseniai do idia noho—guba eiava tanobada ai? Dahaka dainai unai bamona oi haere?
-
Dahaka dainai oi diba momokani emu lalokau taudia do idia mauri lou?
REFERENS ITAIA
Mase dainai lalohisihisi bona taitai karana haheaukalaia dalana oi dibaia.
“Mase Taudia Dainai Idia Lalohisihisi Taudia Durua Daladia” (Noga! No. 3 2018)
Baibel ena hakaua herevadia ese mase dainai ia lalohisihisi tauna ia durua diba, a?
Edena dala ai, natudia ese edia lalokau tauna ena mase idia haheaukalaia diba?
Guba dekenai haida do idia toreisi lou, a? Daidia do idia toreisi lou lasi?
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
