EHONGWA 30
Ovasuverwa voye mba ṱa mave kapenduka
Onḓiro i tu etera oruhoze nu i tjita kutja tu fule navi momuinyo. Ku nao, Ombeibela opu i zokutja onḓiro omunavita. (1 Ovakorinte 15:26) Mehongwa 27, we rihonga kutja Jehova mee ku yandeka omunavita ngo. Posi ya hapo mape tjitwa tjike ku imba mba ṱa rukuru? Mehongwa ndi, mo rihongo oviṋa ovingi ohunga nomakwizikiro wa Jehova wokutja eye ma kapendura ovandu ovengi komuinyo nave hupu nga aruhe. Eye me ve pendura movakoke. Iho mape ya atji tjitwa tjiri? Hapo owo mave pendurwa okukahupa meyuru poo kombanda yehi?
1. Ovikwaye Jehova mbye vanga okutjitira ovasuverwa vetu mba ṱa?
Jehova u zera okukotora ovandu mba ṱa komuinyo. Omurumendu wena Job wa ri nongamburiro kutja Mukuru ke nokumuzemba indu tja koka. Eye wa tja nai ku Mukuru: “Ove mo isana, nu ami me itavere [okuza meyendo].”—Lesa Job 14:13-15.
2. Hapo eṱe matu tjiwa vi kutja ovandu mba ṱa mave yenene okupendurwa?
Indu Jesus tja ri kombanda yehi, Mukuru we mu pa omasa wokupendura ovandu. Jesus wa pendura okanatje okakazona kozombura 12 nomuatje omuzandu womuhepundu komuinyo. (Markus 5:41, 42; Lukas 7:12-15) Kombunda, epanga ra Jesus Lasarus wa ṱa. Nandarire kutja Lasarus wa ri a ṱu na pakwa oure womayuva yane, Jesus wa yenena okumukotora komuinyo. Indu Jesus tja za nokukumba ku Mukuru wa ravaera na tja: “Lasarus, penduka u pite!” Nu “omuṱi arire tja piti,” e nomuinyo. (Johanes 11:43, 44) Ripura nomuano eṱunḓu nomapanga wa Lasarus mu ya ri nondjoroka.
3. Omaundjiro yeṋe ovasuverwa vetu mba ṱa ngu ve na wo?
Ombeibela ya kwizika kutja: “Ovandu . . . mave penduka movakoke.” (Oviungura 24:15) Imba Jesus mba pendura indu tja ri kombanda yehi, kave ire keyuru. (Johanes 3:13) Owo va ri nondjoroka okupendurwa nokuhupa rukwao kombanda yehi. Momuano otjingewo, Jesus ma pendura ovandu ovengi moruyaveze rwopopezu, kutja ve hupe moparadisa kombanda yehi nga aruhe. Eye wa tja “ovaṱi avehe” mbe ri “momayendo” mave pendurwa, nandarire imba mbe munika aayo va zembwa oparukaze. Jehova kee ve zemba.—Johanes 5:28, 29.
KONḒONONA OUKOTO
Rihonga okuza mOmbeibela kutja ongwaye tji matu yenene okukara nongamburiro yokutja Jesus u nomasa wokukapendura ovandu, nokutja eye ma katjita nao. Rihonga kutja ombendukiro mai ku huhumiṋa vi nokukupa omaundjiro.
4. Jesus wa raisa kutja ma yenene okupendura ovaṱi
Rihonga ovingi ohunga noviṋa Jesus mbya tjitira epanga re Lasarus. Lesa Johanes 11:14, 38-44, nu okuzambo hungirira komapuriro nga:
-
Matu tjiwa vi kutja Lasarus tjiri wa ṱire?—Tara kezeva 39.
-
Andakuzu Lasarus wa ya keyuru, mo munu kutja Jesus etje mu pendura kutja ma hupe kombanda yehi rukwao?
5. Ovandu ovengi mave pendurwa
Lesa Epsalme 37:29, nu okuzambo hungirira kepuriro ndi:
-
Ovandu ovengi mbu mave pendurwa mave tura pi?
Jesus ma kapendura ovandu ovengi, na imba mbe hi na aave karere Jehova wina. Lesa Oviungura 24:15, nu okuzambo hungirira kepuriro ndi:
-
Ouṋe ngu mo vanga kutja ma kapendurwe?
Ripurira kotjiṋa hi: Jesus ma yenene okupendura omundu tjimuna ihe tje yenena okupendura omuatje we mozomboṱu
6. Ombendukiro mai yenene okukuhuhumiṋa nokukupa omaundjiro
Ehungi rOmbeibela ohunga nomuatje wa Jairus omukazona ra huhumiṋa nokuyanḓiparisa ovengi mbe noruhoze. Lesa ehungi ndo mu Lukas 8:40-42, 49-56.
Ngunda Jesus e hi ya pendura omuatje wa Jairus omukazona, eye wa tja nai ku Jairus: “O tira, panḓera mba pongamburiro uriri.” (Tara kezeva 50.) Omomuano uṋe omaundjiro wombendukiro mu maye yenene okukuvatera . . .
-
indu tji wa zepaisa umwe wovasuverwa woye?
-
indu omuinyo woye tji u ri moumba?
Nyanda OKAVIDIO, nu okuzambo hungirira kepuriro ndi mari kongorere mba.
-
Omomuano uṋe omaundjiro wombendukiro mu ya huhumiṋa nokuyanḓiparisa ovanene va Phelicity?
OVANDU TJIVA VE TJA: “Tjiri ouzeu okukambura kutja ovaṱi mave kahupa rukwao.”
-
Ove u noumune uṋe?
-
Etjangwa riṋe ndi mo yenene okuungurisa okuraisa kutja mape kakara ombendukiro?
OKUYARUKIRA PO OUSUPI
Ombeibela ya kwizika kutja ovandu ovengi mba ṱa mave kapendurwa. Jehova u vanga kutja ve hupe rukwao nu wa yandja omasa ku Jesus okuvependura.
Okurizemburukisa
-
Jehova na Jesus ve noumune uṋe ohunga nokukotora ovaṱi komuinyo rukwao?
-
Ovandu ovengi mbu mave pendurwa mave katura pi? Omeyuru poo okombanda yehi? Ongwaye tji mo tja nao?
-
Ovikwaye mbi vi ku pa ongamburiro kutja ovasuverwa woye mba ṱa mave kahupa rukwao?
RIHONGA OVINGI
Rihonga oviṋa mbi mo yenene okutjita kutja u tjinde oruhoze.
Omirari vyOmbeibela mape ya tjiri avi vatere omundu ngu noruhoze?
Omomuano uṋe ovanatje mu mave yenene okutjinda onḓiro yomusuverwa wawo?
Hapo pe novandu mbu mave pendurwa okuyenda keyuru? Oouṋe mbe hi nokupendurwa?
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
