LEKSION 30
Maginnolay Noka i Iddeddukattam Ira!
Mataki anna kaddaraddam i matayan. Yatutta nakagi ta Biblia nga kalaban i patay. (1 Corinto 15:26, NW ) Nagigiammum ta Leksion 27 nga alsan ni Jehova i patay. Anni gafu i mesimmu ta natay ngana ira? Aru paga i magigiammum taw nga leksion meyannung ta makakkasta nga promesa ni Jehova. Paginnolayanna i binillion nga natay tapenu mattolay tu mannanayun! Talaga kari nga mesimmu yatun? Mapaginnolay kari ira tapenu mattolay ta langi onu ta davvun?
1. Anni i kayà nga kuan ni Jehova ta natay ira nga iddeddukattam?
Kayà ni Jehova nga mapaginnolay i natay ira. Siguradu i matalo nga si Job nga ari yayya kattaman na Dios nu matay yayya. Kinagina ta Dios: “Magagal ka, ay tabbagattaka [ta Attanamman].”—Bibbigan i Job 14:13-15.
2. Ngatta mangurug ittam nga mapaginnolay i natay ira?
Turi ta egga si Jesus ta davvun, iniddan yayya na Dios tu pakapangngua nga mamaginnolay ta natay. Pinaginnolay ni Jesus i 12-anios nga babay anna i lalaki nga ana na babay nga balu. (Marcos 5:41, 42; Lucas 7:12-15) Ari nabbayag, natay i kofun ni Jesus nga si Lazaro. Maski nu appa nga aggaw ngana nga netanam si Lazaro, pinaginnolay yayya ni Jesus. Kabalin nga nakimallo si Jesus ta Dios, nikullena: “Lazaro, mallawak-ka!” Kabalinna, “nallawan” i naginnolay nga si Lazaro! (Juan 11:43, 44) Imajinammu ngana laman i ayayya na familia anna kokkofun ni Lazaro!
3. Anni i iddanama na natay ira nga iddeddukammu?
Nipromesa na Biblia: “Maginnolay noka” i natay ira. (Kingngua 24:15) Ari nga minay ta langi i pinaginnolay ira ni Jesus ta nappasa. (Juan 3:13) Magayayya ira nga napaginnolay taw ta davvun. Paginnolayan gapa ni Jesus i binillion nga totolay tapenu mattolay tu mannanayun ta paraiso nga davvun. Kinagina nga mapaginnolay i ngamin nga egga ta memoria na Dios, maski i natay ira nga nattaman ngana na totolay.—Juan 5:28, 29.
GIGIAMMUAN I ARU PAGA
Gigiammuan ta Biblia nu ngatta makasiguradu ittam nga egga i pakapangngua ni Jesus nga mamaginnolay anna siguradu nga kuanna yatun ta mappange. Ammuan nu kunnasi mangiyawa tu banna-bannay anna iddanama i paginnolay.
4. Nipasingan ni Jesus nga mawayyana i mamaginnolay tu natay
Gigiammuan i aru paga meyannung ta kingngua ni Jesus para ta kofunna nga si Lazaro. Bibbigan i Juan 11:14, 38-44, anna paguvovugan yaw ira nga pakkiavu:
-
Anni i mamakurug nga talaga natay si Lazaro?—Innan i versikulo 39.
-
Nu kurug nga minay ta langi si Lazaro, paginnolayan kari paga ni Jesus tapenu mattolay taw ta davvun?
5. Aru i mapaginnolay ta mappange!
Bibbigan i Salmo 37:29, anna paguvovugan yaw nga pakkiavu:
-
Sitaw nga maddian i binillion ira nga mapaginnolay?
Aru i paginnolayan ni Jesus, ari laman tu i naddayaw ira kani Jehova. Bibbigan i Kingngua 24:15, anna paguvovugan yaw nga pakkiavu:
-
Sinni i kayà mu nga masingan nga maginnolay?
Nonopan yaw: Mabi laman nga paginnolayan ni Jesus i natay ira, nu kunnasi nga mabi laman nga lukagan na yama i anana nga nakkatrug
6. Mangiyawa nittam tu banna-bannay anna iddanama i paginnolay
Makapabannay anna makapasikan i rekord na Biblia meyannung ta babay nga ana ni Jairo. Bibbigan i Lucas 8:40-42, 49-56.
Nige nga pinaginnolay ni Jesus i babay nga ana ni Jairo, kinagina kani Jairo: “Ari ka nga madduda; basta mangurug ka.” (Innan i versikulo 50.) Anni i meyuffun na iddanama nga paginnolay . . .
-
nu matayakka tu iddeddukan?
-
nu mappeligro i inango mu?
Girawan i VIDEO, anna paguvovugan yaw nga pakkiavu:
-
Kunnasi nga nabannayan anna napasikan na iddanama nga paginnolay i magana ni Phelicity?
I KAGIAN NA KARUAN: “Mariga kurugan nga egga i paginnolay.”
-
Anni i makagim?
-
Anni nga teksto i usammu nga mamakurug nga egga i paginnolay?
ANNI I NAGIGIAMMUM?
Nipromesa na Biblia nga binillion i mapaginnolay. Kayà ni Jehova nga mapaginnolay ira, anna iniddanna si Jesus tu pakapangngua nga mamaginnolay.
Review
-
Anni i matageno ni Jehova anna ni Jesus ta paginnolay?
-
Sitaw nga maddian i binillion nga mapaginnolay—ta langi onu ta davvun? Ngatta makagim yatun?
-
Ngatta makasiguradu ka nga mapaginnolay i iddeddukammu ira nga natay?
I AWAYYAM PAGA KUAN
Gigiammuan i praktikal ira nga makuam tapenu maattammammu i paddaddammu.
Talaga kari nga makoffun i prinsipio ira na Biblia ta maddaddam ira?
Kunnasi nga maattamman na abbing ira i patay na iddeddukadda?
Egga kari i mapaginnolay ira ta langi? Sinni ira i ari nga mapaginnolay?
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
