Ikwū gē bi ɔnɔ mla ɔtu nobi alɛwa gē lɛ alɛɛcɛ. Ɔɔma ya ɛɛ nɛ Ubáyíbu hi ikwū ku olɛla a. (1 Ācɛ Ukɔ́rīnti 15:26) Ipu Ɛlā ō nwu 27, a nwu ka Ujehofa géē ya ikwū lé. Amáŋ, ɔdi gáā ya da ācɛ nōo gekwu gbɔbu ɛ ma a? Ipu ɛlā ō nwu nyā, a géē nwu ɛlā tōōtɔ̄ɔ̄ lɛyikwu ɛnɛɛnɛ okonu ō ce ɔhá ku Ujehofa. Ó cokonu ō je ubiliyɔn alɛwa ku ācɛ cigbihi wa oyeeyi kéē gáā jɔɔnyɛ oyeeyi opiyoo. Ó géē je uwa heyi ŋma ɔlekwu! Ɛnyā géē ya ɔkwɔɔkwɛyi gla a? Ó géē je uwa heyi kéē gáā lā ɔkpanco nɛɛ kɛɛ ka ɛcɛ?

1. Ɔdi nɛ Ujehofa dɔka ō ya lɛ ācɛ nɛ alɔ yihɔtu uwa nōo gekwu ɛ ma a?

Ó yɔ i ŋmo Ujehofa unwu ō je ācɛ nōo kwū a cigbihi wa oyeeyi kpɔ. Ɔcɛnyilɔ éyi nōo lɛ ɔtu okpoce nōo lé ka Ujobu a lɔtuce ka Ɔwɔico i gáā je ɔ mlanyi eko nɛ ó gekwu ŋ. Ó da Ɔwɔico kahinii: “A géē hī um igwú, n kē í tá uwɔ ohi [ŋma ipu unoji].”—Jé Ujóbu 14:13-15.

2. Ɛgɛnyá nɛ alɔ jé ka ācɛ nōo kwū a géē heyi ŋma ɔlekwu gla a?

Eko nɛ Ujisɔsi yɔ ipu ɛcɛ nyā a, Ɔwɔico je ɔfu lɛ ɔ ō hɛ ācɛ eyī ŋma ɔlekwu. Ujisɔsi je ɔyi nɔnya éyi nōo wɛ ihayi igwɛɛpa (12) mla ɔyi nɔnyilɔ ku ɔnyokwu éyi heyi ŋma ɔlekwu. (Umáki 5:41, 42; Ulúku 7:12-15) Igbihaajɛ, oklobiya ku Ujisɔsi nōo lé ka Ulasarɔsi a gekwu. Naana nɛ Ulasarɔsi gekwu néē klla kwu ɔ u nyi ɛ̄cī ɛnɛ gbɔbu ɛ ma a, Ujisɔsi kwu ɔ u cigbihi wa oyeeyi kpɔ. Ujisɔsi lɛ ɔkɔ gba lɛ Ɔwɔico, anu ó kahinii: “Ulásārɔ̄si, gā ɛcɛ!” Anu “ɔ̄cɛ nōo kwú ā gā ɛcɛ.” Ulasarɔsi yeeyi kpɔ! (Ujɔ́ni 11:43, 44) Ācɛ apɔlɛ ku Ulasarɔsi, aoklobiya mla ancɛnya nu gweeye nɛhi!

3. Eyiyoce nyá yɔ lɛ ācɛ nɛ a yihɔtu uwa nōo gekwu a?

Ubáyíbu kahinii: ‘Oheyi ŋma ɔlekwu géē yɔ.’ (Úklɔ́ kú Ācotɛ̄hɔ̄ 24:15) Ācɛ nɛ Ujisɔsi heyi ŋma ɔlekwu eko nɛ ó yɔ ipu ɛcɛ nyā i gā ɔkpanco ŋ. (Ujɔ́ni 3:13) É gweeye ō cigbihi wa oyeeyi ipu ɛcɛ nyā kpɔ. Ɔwɛ ɛgɔɔma duu, ó gboji gɛ ŋ Ujisɔsi géē je ubiliyɔn alɛwa ku ācɛ heyi ŋma ɔlekwu kéē gáā jɔɔnyɛ oyeeyi opiyoo ipu uparadais ɛcɛ nyā. Ó ka “ācɛ dóódu nēe bá únóji,” kwu ācɛ nōo lɛbɛɛka ācɛ kwu uwa i mlanyi ɛ amáŋ nɛ Ɔwɔico kē blakwu uwa a géē heyi ŋma ɔlekwu duu.—Ujɔ́ni 5:28, 29.

 JÉ GƆBU

4. Ujisɔsi mafu ka ó lɔfu je ācɛ nōo kwū a heyi ŋma ɔlekwu

Nwu ɛlā tōōtɔ̄ɔ̄ lɛyikwu ɔdā nɛ Ujisɔsi ya lɛ oklobiya ku nu Ulasarɔsi a. Jé Ujɔ́ni 11:14, 38-44, cɛɛ ku aa kɔka lɛyikwu aɔka nōo ba nyā:

• Ɛgɛnyá nɛ alɔ bi le jé ka Ulasarɔsi kwū ɔkwɔɔkwɛyi a?—Má ɔgba 39.

• Ɔdaŋ ka Ulasarɔsi géē yɛ i le ta ɔkpanco ɛ, a gbɛla ka Ujisɔsi géē bi ɔ cigbihi wa oyeeyi ipu ɛcɛ nyā kpɔ ɛ?

Lɛ UVIDIO nyā mafu.

5. Ācɛ alɛwa géē heyi ŋma ɔlekwu!

Jé Aíjē Kú Ɛ̄gbā 37:29, cɛɛ ku aa kɔka lɛyikwu ɔka nyā:

• Imi nɛ ubiliyɔn alɛwa ku ācɛ nōo gā heyi ŋma ɔlekwu a gā lā a?

Ujisɔsi géē je ācɛ alɛwa nōó gē gba Ujehofa ɛ̄gbā ŋ ma heyi ŋma ɔlekwu duu. Jé Úklɔ́ kú Ācotɛ̄hɔ̄ 24:15, cɛɛ ku aa kɔka lɛyikwu ɔka nyā:

• Ɔnyɛ nɛ a géē dɔka kóō cigbihi wa oyeeyi a?

• Ɛgɛnyá nɛ eyiyoce ku oheyi ŋma ɔlekwu a je ɔtoole mla ɔtu ō tu kwu ɔtu lɛ adā mla ɛ́nɛ́ ku Phelicity a?

 ƆDI NƐ A NWU A?

Ubáyíbu cokonu ka ubiliyɔn alɛwa ku ācɛ nōo kwu a géē heyi ŋma ɔlekwu. Ujehofa dɔka ka uwa kéē yeeyi kpɔ, ó kē lɛ ɔfu je lɛ Ujisɔsi kóo je uwa heyi ŋma ɔlekwu ɛ.

Aɔka ō tu alɔ ɛlá kwu ɔdā nɛ alɔ nwu

• Ɛgɛnyá nɛ ɔtu gē ya Ujehofa mla Ujisɔsi lɛyikwu ō je ācɛ nōo kwū a cigbihi wa oyeeyi kpɔ a?

• Ɔkpanco nɛ ubiliyɔn alɛwa ka ācɛ nōo gā heyi a gáā lā a nɛɛ, kɛɛ ka ɛcɛ nyā? Ɔdiya nɛ a ka lɛ a?

• Ɔdi cɛ gā uwɔ kpɔtuce peee ka ācɛ nɛ a yihɔtu uwa nōo kwu a géē yeeyi gla kpɔ ɛ ma?