UWUHRẸ AVỌ 30
Ahwo Ra nọ A Whu No A Sae Wariẹ Ziọ Uzuazọ!
Uwhu o rẹ wha uweri gbe ọkora se ahwo. Oyejabọ nọ a rọ jọ Ebaibol na sei ọwegrẹ na. (1 Ahwo Kọrint 15:26) Whọ jọ uwuhrẹ avọ 27 wuhrẹ nọ Jihova o ti fi ọwegrẹ yena kparobọ. Rekọ eme ọ te via kẹ ahwo nọ a whu no? Whọ te jọ uwuhrẹ nana wuhrẹ kpahe eyaa igbunu efa jọ nọ Jihova ọ yaa, oye họ, o ti zihe ima-idu ahwo buobu nọ a whu no ziọ uzuazọ re a rria bẹdẹ bẹdẹ. Ọ te kpare ae ze! Kọ oyena o te ginẹ via? Kọ obọ odhiwu a te kpare ae kpohọ manikọ otọakpọ na?
1. Eme Jihova ọ gwọlọ ru kẹ ahwo mai nọ a whu no?
Jihova ọ gwọlọ kpare ahwo nọ a whu no zihe ziọ uzuazọ. U mu ọzae jọ nọ ọ gọ Ọghẹnẹ ziezi nọ a re se Job ẹro inọ ọ te thọrọ Ọghẹnẹ ẹro ho nọ o te whu. Ọ ta kẹ Ọghẹnẹ nọ: “Who ti se, me ve ti yo kẹ owhẹ [evaọ obọ uki].”—Se Job 14:13-15.
2. Ẹvẹ ma rọ riẹ nọ a rẹ sae kpare ahwo nọ a whu no ze?
Okenọ Jesu ọ jọ otọakpọ, Ọghẹnẹ ọ kẹ riẹ ogaga kpare ahwo no uwhu ze. Ọ kpare ọmọtẹ jọ nọ ọ jọ ikpe ikpegbivẹ gbe ọmọzae aye-uku jọ. (Mak 5:41, 42; Luk 7:12-15) Nọ u te oke jọ, Lazarọs, ogbẹnyusu Jesu o te whu. Rekọ Jesu ọ kpare Lazarọs ziọ uzuazọ dede nọ a ki rie te edẹ ene no. Nọ a jọ oria uki na, Jesu ọ tẹ lẹ se Ọghẹnẹ, kẹsena o te bo nọ: “Lazarọs, nya lahwe! Ọzae nọ o whu na ọ tẹ nya lahwe,” ere ọ rọ kpare iẹe ziọ uzuazọ! (Jọn 11:43, 44) A rẹ ruẹ unu gbiku epanọ eva e were ahwo uviuwou Lazarọs gbe egbẹnyusu riẹ te he!
3. Ẹruore vẹ ọ rrọ kẹ ahwo ra nọ a whu no?
Ebaibol na ọ ta nọ: “ẹkparomatha . . . ọ te jọ.” (Iruẹru Ikọ 24:15) Ahwo nọ Jesu ọ kpare ze evaọ oke anwae na a kpobọ odhiwu hu. (Jọn 3:13) Otọakpọ na a kpare rai ze. Ere ọvona Jesu ọ te kpare ima-idu ahwo gbidi gbidi ze kẹle na re a rria bẹdẹ bẹdẹ evaọ aparadase otọakpọ. Ọ ta nọ “enọ e rrọ iki ekareghẹhọ kpobi,” makọ enọ e thọrọ ahwo ẹro no dede, rekọ nọ Ọghẹnẹ ọ be kareghẹhọ, ọ te kpare ae ze.—Jọn 5:28, 29.
GBE WUHRẸ EWARE EFA
Jọ Ebaibol na wuhrẹ oware nọ o kẹ imuẹro inọ a rẹ sae kpare ahwo nọ a whu no ze, yọ a te kpare ae ze. Wuhrẹ kpahe epanọ ẹkparomatha na ọ sae rọ sasa owhẹ oma jẹ kẹ owhẹ ẹruore.
4. Jesu o dhesẹ nọ ọ sae kpare ahwo nọ a whu no ze
Wuhrẹ kpahe oware nọ Jesu o ru kẹ Lazarọs ogbẹnyusu riẹ. Se Jọn 11:14, 38-44, kẹsena wha vẹ ta ẹme kpahe enọ nana:
-
Ẹvẹ ma rọ riẹ nọ Lazarọs o gine whu?—Rri owọ avọ 39.
-
O hae jọnọ Lazarọs o kpobọ odhiwu no, kọ who roro nọ Jesu ọ hai ti zihe iei ziọ uzuazọ evaọ otọakpọ?
5. A te kpare ahwo buobu ze!
Se Olezi 37:29, kẹsena wha vẹ ta ẹme kpahe onọ nana:
-
Diẹse ima-idu ahwo nọ a be te kpare ze a te rria?
Orọnikọ ahwo nọ a gọ Jihova ọvo Jesu ọ te kpare ze he, ọ te kpare amọfa buobu kugbe re. Se Iruẹru Ikọ 24:15, kẹsena wha vẹ ta ẹme kpahe onọ nana:
-
Ono whọ gwọlọ nọ a kpare ze uzuazọ?
Dai roro kpahe onana: Wọhọ epanọ ọsọmọ ọ rẹ sae rọwo ọmọ riẹ no owezẹ ze lọlọhọ na, ere ọvona Jesu ọ rẹ sae kpare ohwo no uwhu ze lọlọhọ
6. Ẹkparomatha na ọ sae sasa owhẹ oma jẹ kẹ owhẹ ẹruore
Iku ọmọtẹ Jairọs nọ a kpare ze nọ e rrọ Ebaibol na e sasa ahwo buobu nọ a bi weri oma no, u te je kru ai udu ga no. Se iku na evaọ Luk 8:40-42, 49-56.
Taure Jesu ọ tẹ te kpare ọmọtẹ Jairọs, ọ ta kẹ Jairọs nọ: “Jọ ozọ u mu owhẹ hẹ, thakpi wo ẹrọwọ.” (Rri owọ avọ 50.) Ẹvẹ ẹruore ẹkparomatha na ọ sai ro fiobọhọ kẹ owhẹ . . .
-
nọ ohwo ra jọ o te whu?
-
nọ uzuazọ ra o tẹ rrọ ọza?
Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Ẹvẹ ẹruore ẹkparomatha na ọ rọ sasa ọsẹgboni Phelicity oma je kru ai udu ga no?
AHWO JỌ A RẸ TA NỌ: “Obọ odhiwu a te kpare ahwo kpohọ orọnikọ otọakpọ na ha.”
-
Ẹvẹ who roro?
-
Oria Ebaibol vẹ whọ sai ro dhesẹ kẹ ohwo nọ otọakpọ na a te kpare ahwo ze?
EME WHO WUHRẸ NO?
Ebaibol na ọ ta nọ a te kpare ima-idu ahwo buobu nọ a whu no ze. Jihova ọ gwọlọ nọ a rẹ wariẹ rria uzuazọ, yọ ọ kẹ Jesu ogaga nọ ọ te rọ kpare ae ze no.
Ọkiẹkpemu
-
Eme Jihova avọ Jesu a gwọlọ ru kẹ ahwo nọ a whu no?
-
Diẹse ima-idu ahwo buobu nọ a te kpare ze na a te rria, obọ odhiwu manikọ otọakpọ? Fikieme whọ rọ ta ere?
-
Eme ọ kẹ owhẹ imuẹro nọ ahwo ra nọ a whu no a sae wariẹ jọ uzuazọ?
KIẸ KPAHE EFA
Se kpahe eware nọ whọ rẹ sai ru nọ who te bi weri.
Kọ Ebaibol na ọ sai gine fiobọhọ kẹ ohwo nọ o bi weri?
Eme ọ rẹ sai fiobọhọ kẹ emaha nọ ohwo rai jọ o te whu?
Kọ a te kpare ahwo jọ kpobọ odhiwu? Amono a te kpare ze he?
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
