Si ai lam gaw grai hkamsha yak nna, yawn hkyen shangun ai. Dai majaw, Chyum Laika hta si ai lam hpe hpyen ngu nna tsun da ai. (1 Korinhtu 15:26) Daw 27 hta, Yehowa gaw dai hpyen hpe shamyit kau na ngu tsun da ai hpe chye wa sai. Raitim, si mat sai masha ni hte seng nna gaw gara hku kun? Ndai daw hta, wan hkying hku law ai masha ni hpe, htani htana asak hkrung na matu, bai jahkrung ya na ngu ai Yehowa a ga sadi ni hpe mung hkaja lu na re. Shanhte hpe shi bai jahkrung ya na re. Gaja wa byin wa lu na kun? Shanhte gaw sumsing lamu de (sh) mungkan ga hta asak hkrung na matu bai hkrung rawt wa na kun?

1. Si mat ai ni hpe Yehowa hpa galaw ya mayu ai kun?

Yehowa gaw si ai ni hpe asak bai jahkrung ya mayu sai. Makam masham ngang kang ai Yoba gaw, shi si mat ai shaloi Karai Kasang malap kau na n re ai hpe kam ai. Karai Kasang hpe shi ndai hku tsun ai: “Nang shaga nna, ngai nang hpe [katsan ga kaw na] htan na nngai.”​—Yoba 14:​13-15 hpe hti u.

2. Si mat ai ni bai hkrung rawt lu ai hpe gara hku chye lu ai kun?

Yesu mungkan ga hta nga ai shaloi, si mat ai masha ni hpe bai jahkrung ya lu ai atsam Karai Kasang jaw da ai. Asak 12 ning re ai numsha hte gaida jan a kasha hpe asak bai hkrung hkra shi galaw ya wa ai. (Marku 5:​41, 42; Luka 7:​12-15) Hpang hta, Yesu a manang Lazaru si mat ai. Lazaru si nna, lup kau ai 4 ya na ai hpang hta pyi, shi hpe Yesu asak bai jahkrung ya wa ai. Karai Kasang kaw akyu hpyi ngut ai hpang, lup sunghku de yu nna, “Lazaru e, pru wa rit” ngu nna jahtau dat ai. Dai hpang, “si mat sai wa gaw, . . . pru wa ai.” Lazaru asak bai hkrung wa sai. (Yawhan 11:​43, 44) Lazaru a manang ni hte nta masha ni kade daram kabu nga na hpe shingran yu u!

3. Si mat sai ni a matu hpa myit mada shara nga ai kun?

“Bai hkrung rawt wa na lam nga ai” ngu nna Chyum Laika hta ga sadi jaw da ai. (Kasa 24:15) Lai wa sai aten hta, Yesu bai jahkrung ya wa ai ni gaw, sumsing lamu de n lung mat ai. (Yawhan 3:13) Shanhte gaw mungkan ga hta sha asak bai hkrung lu wa ai majaw, grai kabu ma ai. Dai zawn sha, Yesu gaw wan hkying hku law ai masha ni hpe mungkan hparadisu hta, ngwi pyaw let htani htana asak hkrung lu na matu, kade n na yang jahkrung ya sana re. Karai a matsing nyan hta nga ai ni yawng bai hkrung rawt wa na re ngu Yesu tsun ai. Dai hta, masha ni a malap da hkrum ai ni pyi lawm na re.​—Yawhan 5:​28, 29.

 Kahtap Hkaja

4. Si mat ai ni hpe hkrung rawt ya lu ai ngu ai hpe Yesu sakse madun

Shi a manang Lazaru hpe Yesu hpa galaw ya wa ai lam hkaja yu u. Yawhan 11:​14, 38-44 hpe hti nna, ndai ga san ni hpe bawngban u:

• Lazaru gaja wa si mat ai ngu ai hpe anhte gara hku chye lu ai kun?​—Daw kaji 39 hpe yu u.

• Lazaru gaw sumsing lamu de lung mat ai nga yang, mungkan ga hta asak hkrung na matu Yesu shi hpe bai shaga la na kun?

VIDEO hpe hpaw.

5. Masha law law hkrung rawt wa na!

Shakawn 37:29 hpe hti nna, ndai ga san hpe bawngban u:

• Wan hkying hku law ai masha ni bai hkrung rawt wa ai shaloi gara shara hta nga na kun?

Yehowa hpe nawku ai ni hpe sha n-ga, masha law law hpe Yesu jahkrung ya na re. Kasa 24:15 hpe hti nna, ndai ga san hpe bawngban u:

• Hkrung rawt wa ai ni kaw na kadai hpe nang mu mayu ai kun?

• Hkrung rawt ai myit mada lam gaw, Hpilisiti a kanu kawa ni hpe shalan shabran lam hte n-gun jaw lam gara hku lu shangun ai kun?

 Kadun Dawk

Si mat ai wan hkying hku law ai masha ni bai hkrung rawt wa na ngu nna Chyum Laika hta ga sadi jaw da ai. Yehowa gaw, shanhte hpe asak bai hkrung shangun mayu ai. Dai majaw, shanhte hpe jahkrung ya na matu, Yesu hpe shi atsam jaw da ai.

Bai Maram

• Si mat wa ai ni asak bai hkrung wa na hte seng nna Yehowa hte Yesu gara hku hkamsha ai kun?

• Hkrung rawt wa na wan hkying hku law ai masha ni gaw sumsing lamu kaw nga na kun? Shing nrai, mungkan ga kaw nga na kun?

• Nang hpa majaw dai hku htai ai? Si mat ai ni bai hkrung rawt lu ai lam nang hpe hpa gaw kam shangun ai kun?