Ðɛ-ɛyʋ kʋsɔɔlʋ nɔɔyʋ sɩkɩ lɛ, pɩhaɣ-ɖʋ laŋwɛɛkɩyɛ siŋŋ. Pʋyɔɔ Bibl yɔɔdʋʋ se sɩm kɛ koyindu. (1 Kɔrɛntɩ mba 15:26) Tɔm kɩkpɛlɩkɩtʋ 27 taa, ɖɩɩnawa se Yehowa kaɣ ɖɩzʋʋ ɖo-koyindu ɛnʋ. Ɛlɛ ɛyaa mba pɛtɛm sɩbʋ yɔ, ɛbɛ pɩkaɣ-wɛ tɛmnʋʋ? Tɔm kɩkpɛlɩkɩtʋ tʋnɛ tɩ-taa ɖɩkaɣ yɔɔdʋʋ tamaɣ kɩbaŋa ŋga Yehowa laba yɔ kɔ-tɔm. Ɛkaɣ yebu nɛ ɛyaa mba pasɩba yɔ, pa-taa miiliyaarɩwaa sakɩyɛ ɖaɣnɩ caɣʋ wezuu tam tam. Ɛkaɣ-wɛ fezuu! Pɩpɩzɩɣ nɛ pɩla mbʋ toovenim na? Mba pakaɣ fezuu yɔ, pakaɣ caɣʋ wezuu ɛsɔdaa yaa tataa?

1. Ɛbɛ Yehowa sɔɔlaa se ɛla ɖɛ-ɛyaa kʋsɔɔlaa mba pasɩba yɔ?

Yehowa sɔɔlaa siŋŋ se efezi mba pasɩba yɔ. Yɔɔb tisuu kaapaɣlɩ siŋŋ nɛ ɛ-taa kaatɛma se Ɛsɔ ɛɛkaɣ ɛ-yɔɔ sɔʋ ɛ-sɩm wayɩ. Eheyi Ɛsɔ se: «Ŋkaɣ yaʋ, nɛ mankaɣ-ŋ cosuu [nɛ pɩlaʋ taa].»—Kalɩ Yɔɔb 14:13-15.

2. Ɛzɩma ɖɩlaba nɛ ɖɩna se papɩzɩɣ nɛ pefezi sɩɖaa?

Alɩwaatʋ ndʋ Yesu kaawɛ tɛtʋ yɔɔ yɔ, Ɛsɔ kaaha-ɩ ɖoŋ se efezi sɩɖaa. Yesu kaafezi halɩbɩɣa nakɛyɛ, kaawɛnɩ pɩnzɩ 12 nɛ eefezi lelu nɔɔyʋ pɩyalʋ ɖɔɖɔ. (Maarɩkɩ 5:41, 42; Luka 7:12-15) Pʋwayɩ Yesu fezi ɛ-taabalʋ Lazaarɩ. Lazaarɩ kaasɩba nɛ pɩla kɩyakɩŋ naanza; paa mbʋ yɔ Yesu pɩzaa nɛ efezi-i. Yesu tɩmnɩ Ɛsɔ nɛ pʋwayɩ lɛ ɛyɔɔdɩ se: «Lazaarɩ, lɩɩ nɛ ŋkɔɔ!» Nɛ «ɛyʋ weyi ɛɛsɩba yɔ ɛlɩɩ,» efema! (Yohanɛɛsɩ 11:43, 44) Maɣzɩ nɛ ŋna ɛzɩma ɛ-hɔʋ taa mba nɛ ɛ-taabalaa taa kaalabɩ leleŋ siŋŋ yɔ!

3. Lidaʋ ŋgʋ ɖɩwɛnɩ ɖɛ-ɛyaa kʋsɔɔlaa mba pasɩba yɔ pɔ-yɔɔ?

Bibl yɔɔdaa se «pakaɣ fezuu ɛyaa.» (Tʋma Labʋ 24:15) Mba Yesu kaafezaa yɔ pa-taa kaalabɩ leleŋ se patasɩ caɣʋ wezuu tɛtʋ yɔɔ. Ye mbʋ pasɩbʋ yɔ, pataakpa ɛsɔdaa. (Yohanɛɛsɩ 3:13) Pa-taa kaalabɩ leleŋ se pefezi-wɛ se patasɩ caɣʋ wezuu tɛtʋ yɔɔ cɩnɛ. Mbʋ ɖɔɖɔ pɩkazɩ pazɩ lɛ, Yesu kaɣ fezuu ɛyaa miiliyaarɩwaa sakɩyɛ nɛ pacaɣ wezuu maatɛŋ paradisuu taa tɛtʋ yɔɔ. Ɛyɔɔdaa se «mba payɩ pɛwɛ pɩlaŋ taa» nɛ Ɛsɔ ɖʋ se ɛkaɣ-wɛ fezuu yɔ, ɛkaɣ-wɛ fezuu paa ɛyaa ɩsɔ pɔ-yɔɔ yɔ.—Yohanɛɛsɩ 5:28, 29.

 TAZƖ NƐ PILIMI

4. Yesu wɩlaa se ɛpɩzɩɣ nɛ efezi sɩɖaa

Kpɛlɩkɩ tɔm lɛɛtʋ pɩlɩɩnɩ mbʋ Yesu labɩ ɛ-taabalʋ Lazaarɩ yɔ pɩ-yɔɔ. Ɩkalɩ Yohanɛɛsɩ 11:14, 38-44; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma ɖɩlaba nɛ ɖɩna se Lazaarɩ kaasɩbɩ toovenim?—Cɔnɩ kalɩtʋ 39.

• Ŋmaɣzɩɣ se ye Lazaarɩ kaakpa ɛsɔdaa yɔ, Yesu kaafezi-i nɛ ɛpɩsɩnɩ-ɩ se ɛcaɣ wezuu tɛtʋ yɔɔ?

Ɩcɔnɩ VIDEO.

5. Pakaɣ fezuu ɛyaa sakɩyɛ!

Ɩkalɩ Keɣa 37:29, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛyaa miiliyaarɩwaa sakɩyɛ mba pakaɣ fezuu yɔ, le pakaɣ caɣʋ wezuu?

Ɛyaa mba pɛsɛɣ Yehowa yɔ, pɩtɩkɛ pe-ɖeke Yesu kaɣ fezuu. Ɛkaɣ fezuu ɖɔɖɔ ɛyaa lalaa sakɩyɛ. Ɩkalɩ Tʋma Labʋ 24:15, nɛ pʋwayɩ lɛ ɩtazɩ tɔm tʋnɛ tɩ-taa:

• Anɩ ŋsɔɔlaa se pefezi nɛ ŋɖaɣnɩ-ɩ naʋ?

• Ɛzɩma sɩɖaa femtu lidaʋ hɛzɩ Phelicity lʋlɩyaa laŋa nɛ pɩkpazɩ-wɛ ɖoŋ?

 TOBI LƐ

Bibl yɔɔdaa se ɛyaa mba pasɩba yɔ, pakaɣ fezuu pa-taa miiliyaarɩwaa sakɩyɛ. Yehowa sɔɔlaa se patasɩ caɣʋ wezuu, nɛ ɛha Yesu ɖoŋ se efezi-wɛ.

Tɔm taa tazʋʋ

• Ɛzɩma pɩlakɩ Yehowa nɛ Yesu alɩwaatʋ ndʋ pamaɣzɩɣ sɩɖaa fezuu yɔɔ yɔ?

• Ɛyaa miiliyaarɩwaa mba pakaɣ fezuu yɔ, le pakaɣ caɣʋ wezuu, ɛsɔdaa yaa tataa? Ɛbɛ yɔɔ ŋcosi mbʋ?

• Ɛbɛ yeba nɛ ña-taa tɛ se ñɛ-ɛyaa kʋsɔɔlaa mba pasɩba yɔ, pakaɣ fem nɛ patasɩ caɣʋ wezuu?