OSHILESHWA 30
Umwe oo u hole ota ka kala vali nomwenyo!
Efyo ohali etifa oluhodi linene. Nomolwaasho Ombiibeli ya popya kutya efyo oli li omutondi. (1 Ovakorinto 15:26) Moshileshwa 27, owe lihonga kutya Jehova ota ka finda omutondi oo. Ndele mbela oshike tashi ka ningilwa ovanhu ovo va fya nale? Moshileshwa eshi, oto ke lihonga shihapu kombinga yeudaneko limwe laJehova litunhula, olo kutya ota ka nyumuna ovanhu omabiliyona va hafele omwenyo fiyo alushe. Mbela osho otashi ka ningwa ngoo shili? Mbela otava ka nyumunwa va ka kale nomwenyo meulu, ile okombada yedu?
1. Jehova okwa hala oku ka ningila shike ovo va fya?
Jehova okwa halelela okwaalulila oonakufya momwenyo. Omulumenhu wedina Job, oo a li e na eitavelo, okwa li e na elineekelo kutya Kalunga ite ke mu dimbwa ngeenge okwa fi. Okwa lombwela Kalunga a ti: “Ove ngeno u ifane, ame nohandi ku nyamukula [okudja mOmbila].”— Lesha Job 14:13-15.
2. Otu shi shii ngahelipi kutya oonakufya otava dulu okunyumunwa?
Eshi Jesus a li kombada yedu, Kalunga okwa li e mu pa eenghono dokunyumuna ovanhu. Jesus okwa li a nyumuna okakadona komido 12 nosho yo omonamati womufiyekadi. (Markus 5:41, 42; Lukas 7:12-15) Lwanima, kaume kaJesus Lasarus okwa ka fya. Nonande Lasarus okwa hangwa a fya nokwa pakwa pa pita omafiku ane, Jesus okwe mu nyumuna. Konima eshi Jesus a ilikana kuKalunga, okwa ingida a tala kombila ta ti: “Lasarus, dja mo!” Opo nee “omulumenhu oo a li a fya okwa dja mo” e na omwenyo! (Johannes 11:43, 44) Diladila kunghee ovapambele vaLasarus nookaume kaye va li va hafa!
3. Oonakufya ove na eteelelo lilipi?
Ombiibeli oya udaneka ya ti: ‘Otaku ka kala enyumuko.’ (Oilonga 24:15) Ovo Jesus a li a nyumuna monakudiwa kava li va ya meulu. (Johannes 3:13) Ova li va hafa eshi va nyumunwa va kale nomwenyo oku kombada yedu. Sha faafana, mafiku Jesus ota ka nyumuna ovanhu omabiliyona va ka kale nomwenyo fiyo alushe moparadisa kombada yedu. Okwa ti kutya “aveshe ovo ve li meembiladimbuluko,” nokuli naavo tava monika va fa va dimbuwa, ndele ove li medimbuluko laKalunga, otava ka nyumunwa.— Johannes 5:28, 29.
KONAKONA MOULE
Konakona oushili oo u li mOmbiibeli kutya oonakufya otava dulu okunyumunwa. Lihonga nghee enyumuko tali dulu oku ku hekeleka noku ku pa eteelelo.
4. Jesus okwa li a ulika kutya ota dulu okunyumuna ovafi
Lihonga shihapu shi na sha naasho Jesus a ningila kaume kaye Lasarus. Lesha Johannes 11:14, 38-44, ndele tamu kundafana omapulo taa shikula:
-
Otu shi shii ngahelipi kutya Lasarus okwa li a fya shili?— Tala ovelishe 39.
-
Ngeno Lasarus okwa li a ya meulu, mbela oto diladila kutya ngeno Jesus okwe mu nyumuna a kale vali nomwenyo kombada yedu?
5. Ovanhu vahapu otava ka nyumunwa!
Lesha Epsalme 37:29, ndele tamu kundafana epulo tali shikula:
-
Ovanhu omabiliyona ovo tava ka nyumunwa otava ka kala peni?
Jesus ota ka nyumuna ovanhu vahapu vehe fi ashike ovo hava longele Jehova. Lesha Oilonga 24:15, ndele tamu kundafana epulo tali shikula:
-
Olyelye wa hala oku ka mona eshi oonakufya tava ka nyumunwa?
Diladila kwaashi: Jesus ota dulu okunyumuna omunhu diva ngaashi ashike xe omudali ta pendula okamona oko ka kofa
6. Enyumuko otali ku hekeleke noku ku pa eteelelo
Ehokololo lopaMbiibeli li na sha nokamonakadona kaJairus ola hekeleka nokutwa omukumo ovanhu vahapu ovo va li va nyika oluhodi. Lesha ehokololo olo lashili muLukas 8:40-42, 49-56.
Ofimbo Jesus ina nyumuna okamonakadona kaJairus, okwa li a lombwela Jairus a ti: “Ino tila, shimha ashike u na eitavelo.” (Tala ovelishe 50.) Ongahelipi eteelelo li na sha nenyumuko tashi dulika li ku kwafele . . .
-
ngeenge owa filwa umwe oo u hole?
-
ngeenge onghalamwenyo yoye i li moshiponga?
Dana OKAVIDIO, ndele tamu kundafana epulo tali shikula.
-
Eteelelo lenyumuko ola hekeleka nokutwa omukumo ngahelipi ovadali vaPhelicity?
VAMWE OHAVA TI: “Oshidjuu okwiitavela kutya ovo va fya otava ka kala vali shili nomwenyo.”
-
Ove oto ti ngahelipi?
-
Omushangwa ulipi to dulu okulongifa, opo u ulike kutya otaku ka kala enyumuko?
ENGONGO
Ombiibeli oya udaneka kutya ovanhu omabiliyona ovo va fya otava ka nyumunwa. Jehova okwa hala va ka kale vali nomwenyo, nokwa pa Jesus eenghono doku va nyumuna.
Eendululo
-
Jehova naJesus ove udite ngahelipi shi na sha nokunyumuna ovanhu va ka kale vali nomwenyo?
-
Ovanhu omabiliyona ovo tava ka nyumunwa, otava ka kala meulu, ile okombada yedu? Omolwashike to tile ngaho?
-
Oshike she ku tomha kutya ovanhu ovo u hole otava ka kala vali nomwenyo?
TALA OUYELELE WA WEDWA PO
Lihonga kombinga yeenghatu donhumba odo tadi dulu oku ku kwafela u lididimikile oluhodi.
“Osho tashi kwafele ovo va nyika oluhodi” (Kala oupafi! No. 3 2018)
Mbela omafinamhango Ombiibeli otaa dulu ngoo shili okukwafela ovo va nyika oluhodi?
Ongahelipi ounona tava dulu okulididimikila oluhodi, ngeenge va filwa umwe oo ve hole?
Mbela ope na ovo tava ka nyumuninwa meulu? Oolyelye itava ka nyumunwa?
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
