ILINNIAGASSAQ 30
Asasatit toqusimasut inuuleqqissinnaapput!
Toqusoorluni alianangaarpoq. Taamaattumik toqu Biibilimi akeqqamik taaneqarpoq. (Korintimiunut 1. 15:26) Ilinniagassaq 27-mi paasivarput Jehovap toqu suujunnaarsissagaa. Toqoreersimasummi sussappat? Ilinniagassami matumani neriorsuut nuanningaartoq Jehovameersoq – tassa makititsinissamik neriorsuut – sammissavarput. Jehovap inuppassuit toqusunit makitissavai naassaanngitsumik inuusinnaaqqullugit! Ilumulli taamaattoqarsinnaava? Makititaasullu qilammi imaluunniit nunarsuarmi inuussappat?
1. Asasatta toqusimasut sunissaat Jehovap qilanaaraa?
Jehovap inuit toqusimasut uummarteqqinnissaat qilanaaraa. Guutimut kiffartorsimasup Juubimik atillip upperilluinnarpaa toquguni Guutip eqqaamajuassagaani. Guutimut ima oqarpoq: “Torlorfigiumaarparma, uangalu [ilivermit] akiumaarpakkit.” – Jobi 14:13-15, NW.
2. Qanoq nalunngilarput toqusimasut uummarteqqinneqarsinnaasut?
Jiisusi nunarsuarmiikkallarmat Jehovap toqusunit makititsisinnaatippaa. Jiisusip ilaatigut niviarsiaraq 12-inik ukiulik uillarnerullu ernera makitippai. (Makkorsi 5:41, 42; Lukkarsi 7:12-15) Aamma Jiisusip ikinngutaa Laazarusi toquvoq. Ulluni sisamani toqungareersimagaluartoq Jiisusip uummarteqqippaa. Laazarusip ilerrata eqqaaniilluni Jiisusi Guutimut qinoreerluni nipituumik ima suaarpoq: “Laazarusi, anigit.” ‘Angullu toqungasimasoq [uummarteqqinneqarami] anivoq.’ (Johannesi 11:43, 44) Takorlooruk Laazarusip ilaqutai ikinngutaalu qanoq nuannaarsimatigissasut!
3. Asasannut toqusimasunut sumik neriuuteqarpa?
Jiisusip taamani makititai qilalianngillat, nunarsuarmulli uummarteqqinneqarnertik qujamasuutigaat. (Johannesi 3:13) Biibilimi neriorsuutigineqarpoq ‘toqusunik makititsisoqassasoq’. (Apustilit Suliaat 24:15) Jiisusip inuppassuit toqusimasut nunarsuarmi paratiisiusumi naassaanngitsumik inuunissamut qanittukkut makitissavai. Oqarpoq Jehovap eqqaamasai “ilivermiittut tamarmik” – allaat inunnit puiorneqarsimagaluartut – makitinneqassasut. – Johannesi 5:28, 29.
ITISILIINEQ
Toqusimasut makitinneqarnissaat sooq upperilluinnarsinnaagipput Biibili atorlugu misissoruk. Aamma tamanna qanoq tuppallersaatigalugulu neriuuteqalissutigisinnaanerlugu paasiniaruk.
4. Jiisusip takutippaa toqusimasut makitissinnaallugit
Jiisusi ikinngutiminut Laazarusimut qanoq iliortoq paasisaqarfiginerujumallugu Johannesi 11:14, 38-44 atuarsigit apeqqutillu uku eqqartorlugit:
-
Laazarusi ilumut toqusimava? – Versi 39 takuuk.
-
Laazarusi qilaliarsimasuuppat ilimagaajuk Jiisusip nunarsuarmut makitissimassagaluaraa?
5. Inuppassuit makitinneqassapput!
Tussiaat 37:29 atuarsiuk apeqqullu una eqqartorlugu:
-
Inuit milliardillit sumi makitinneqassappat?
Jehovamut kiffartorsimasut saniatigut Jiisusip inuppassuit allat aamma makitissavai. Apustilit Suliaat 24:15 atuarsiuk apeqqullu una eqqartorlugu:
-
Kia makititaanissaa qilanaaraajuk?
Una eqqarsaatigiuk: Ataataasup meeqqaminik sinittumik itersaariaannaaneratulli Jiisusip toqusimasoq makitissinnaavaa
6. Toqusimasunik makititsinissaq tuppallersaatigalugulu neriuuteqalissutigisinnaavat
Jairusip pania pillugu oqaluttuaq piviusoq Biibilimeersoq aliasuttorpassuit tuppallersaatigalugulu qiimmassaatigisimavaat. Lukkarsi 8:40-42, 49-56 atuarsigit.
Niviarsiaqqamik makititsinnginnermini Jiisusi Jairusimut ima oqarpoq: ‘Ernumassanngilatit, uppersuseqaannarit.’ (Versi 50 takuuk). Toqusimasunik makititsinissamik neriuut pissutsini ukunani qanoq iluaqutigisinnaaviuk?
-
Asasannik toqusoorninni
-
Inuunivit navianartorsiornerani
VIDEO takusiuk apeqqullu tulliuttoq eqqartorlugu.
-
Phelicityp angajoqqaavisa toqusimasunik makititsinissamik neriuut qanoq tuppallersaatigalugulu qiimmassaatigisimavaat?
OQARTOQARTARPOQ: “Toqusimasut nunarsuarmi makitinneqarnissaat upperiuminaappoq.”
-
Illit qanoq isumaqarpit?
-
Toqusimasut nunarsuarmi makitinneqarnissaat uppernarsarumallugu allassimaffik sorleq atorsinnaaviuk?
EQIKKAANEQ
Inuppassuit toqusimasut makitinneqarnissaat Biibilimi neriorsuutigineqarpoq. Jehovap uummarteqqikkusuppai, taamaaliornissamullu Jiisusi pissaaneqalersissimavaa.
Uteqqiineq
-
Qanoq nalunngilarput Jehovap Jiisusillu toqusimasunik makititsinissartik qilanaarigaat?
-
Inuppassuit milliardillit sumi makitinneqassappat – qilammi nunarsuarmiluunniit? Sooq taama isumaqarpit?
-
Sooq upperilluinnarpiuk asasavit toqusimasut makitinneqarnissaat?
NAMMINEQ MISISSUGASSATIT
Aliasunneq naammagalugu qanoq atorsinnaanerlugu paasiniaruk.
Aliasuttup najoqqutassiat Biibilimeersut ilumut iluaqutigisinnaavai?
Meeqqat asasaminnik toqusoortut aliasunnertik naammagalugu qanoq atorsinnaavaat?
Qilaliartoqassava? Kikkut makitinneqassanngillat?
“Toqusimasunik makititsinissaq suua?” (Nittartakkatsinni allaaserisaq)