ERISOMO 30
Abanzwa Bawu Bangana Thasyabyaho!
Olhuholho lhukaletha obulighe bunene. Ky’ekikaleka e Biblia iyahulha olhuholho mwa nzighu. (1 Abanya Korinto 15:26) Omw’Isomo 27, muwigha ngoku Yehova akendi syakinda enzighu eyo. Aliwe ni kyahi ekikendi syahika okwa bandu abakendisyabya ibabiriholha? Omw’isomo lino, wukend’igha okwa wundi mulhaghe mubuyanga wa Yehova—asyasubya esyobbiliyoni sy’abandu eribaha engebe y’erikotha. Akendi syabalhubukya! Kwenene ekyo ikyanabya? Mbwino bakendi syalhubuka eriyikalha omwa lhubulha kutse okwa kihugho?
1. Ni kyahi ekya Yehova anzire erikolera abanzwa bethu ababiriholha?
Yehova akakandira erisubya ababiriholha. Omulhume oyuwabya awithe erikirirya, ya Yobu, aby’ayikethere ndeke ngoku Nyamuhanga syendi syamwibirirwa akaholha. Mwabwira Nyamuhanga athi: ‘Wasyabirikira, naghe inakwithaba [erilhua omw’isinda].’—Soma Yobu 14:13-15.
2. Thukaminya thuthi ngoku ababiriholha bangana lhubukibwa?
Yesu iniane okwa kihugho, Nyamuhanga mwamuha obuthoki obw’erilhubukya abandu. Yesu mwalhubukya omusika w’emyaka 12 n’omughalha w’omukwakali. (Mariko 5:41, 42; Luka 7:12-15) Enyuma waho, munywani wa Yesu, ya Lazaro, mwaholha. Nomwakine indi Lazaro abya iniamabirighunza biro bbini omw’isinda inianaholire, Yesu mwamulhubukya. Abere abirisaba Nyamuhanga, Yesu mwakwama kya birikira inianathungerere eyisinda athi: “Lazaro, hulhuka!” Neryo ‘oyuwabya aholire mwahulhuka’—inianeho! (Yoane 11:43, 44) Thalengekania ab’oku Lazaro n’abanywani nga mubayowa bathi!
3. Hali mahaki oko banzwa bethu ababiriholha?
E Biblia yikalhaghanisaya yithi: ‘Hasyabya erilhubuka.’ (Emibiri 24:15) Abo Yesu alhubukaya iniane okwa kihugho babya isibathaghenda elhubulha. (Yoane 3:13) Mubatsema bakasubibwa n’erihebwa engebe hano okwa kihugho. Kuthya, omwa buthuku obuthe bwahali, Yesu akendi lhubukya esyobbiliyoni sy’abandu eribana engebe ya kera na kera okwa kihugho paradiso. Mwabugha athi abosi abo Nyamuhanga akibuka bakendi syalhubukibwa—nibya nomuhangabya isihakiri omundu oyubibukire.—Yoane 5:28, 29.
THASYIGHA BINGYI
Lebaya obwema omwa Biblia obukakanganaya ngoku abaholi bangana lhubuka kandi ku bakendi syalhubuka. Minya erilhubuka nga lyanga kuhumulikania lithi n’erikuha amaha.
4. Yesu mwakangania ngoku angana lhubukya abaholi
Minya bingyi ebihambire okwa bya Yesu akolera munywani wiwe Lazaro. Soma Yoane 11:14, 38-44, mwanakania okwa bibulyo bino:
-
Thukaminya thuthi ngoku Lazaro kwenene mwaholha?—Lebaya omulhondo 39.
-
Lazaro kw’abya imwaghenda elhubulha, wukalengekanaya Yesu angabere inianamamukolha ndeke erimusubya hano okwa kihugho?
5. Abangyi basyalhubukibwa!
Soma Esyonyimbo 37:29, mwanakania okwa kibulyo kino:
-
Esyobbiliyoni sy’abandu abakendi syalhubuka bakendi syikalha hayi?
Yesu akendi syalhubukya n’abandi bangyi, butsira abakaramaya Yehova basa. Soma Emibiri 24:15, mwanakania okwa kibulyo kino:
-
Ni bahi abawanzire iwasyalhangira bakalhubuka?
Thalengekania oku kino: Yesu erilhubukya omundu ni kyolho ngoku thatha angana bukya omwana wiwe omwa thulho
6. Erilhubuka lyangana kuhumulikania n’erikuha amaha
Omwatsi we Biblia owa mwali wa Yairo abirihumulikania n’erighumya abangyi abali omo bulighe bw’eriholerwa. Soma omwatsi w’okwenene oyo omu Luka 8:40-42, 49-56.
Abere athali alhubukya mwali wa Yairo, Yesu mwabwira Yairo athi: “Siwubahe, wikiriraye lisa.” (Lebaya omulhondo 50.) Amaha w’erilhubuka anga kuwathikya athi . . .
-
omughulhu wukaholerawa?
-
omughulhu engebe yawu yiri omo kabi?
Mubughaye EVIDIYO, mwanakania okwa kibulyo ekikakwamako.
-
Amaha w’erilhubuka abirihumulikania n’erighumya athi ababuthi ba Phelicity?
ABANDI BAKABUGHA BATHI: “Kikalire eriligha ngoku kwenene abandu bakendi syalhubuka.”
-
Iwe wukabugha wuthiki?
-
N’isako lyahi erya wanga kolesya erikangania ngoku hakendi syabya erilhubuka?
OMWA BIKUHI
E Biblia yikalhaghanisaya yithi esyobbiliyoni sy’abandu ababiriholha bakendi syalhubuka. Yehova anzire ibathasyabyaho, kandi abiriha Yesu y’obuthoki obw’eribalhubukya.
Eriyibukya
-
Yehova na Yesu bakayowa bathi okw’isubya ababiriholha?
-
Esyobbiliyoni sy’abakendi syalhubuka bakendi syikalha hayi—elhubulha kutse okwa kihugho? Busana naki iwabugha ekyo?
-
Ni kyahi ekikaleka iwaligha ngoku abanzwa bawu bangana thasyabyaho?
MINYA BINGYI
Minya ebya wangana kolha ebyanga kuwathikya erighumira obulighe bw’eriholerwa.
“Obuwathikya okw’Abali omo Bulighe bw’Eriholerwa” (Awake! No. 3 2018)
Kwenene emisingyi ye Biblia iyanawathikya omundu oyuli omo bulighe bw’eriholerwa?
Abaana banga ghuma bathi bamaholerwa?
Mbwino hane abakendi syalhubukira elhubulha? Ni bahi abathendi syalhubuka?
