LUFUNJISHO 30
Balongo Benu ne Balunda Nenu Bafwa Bakasanguka!
Lufu luleta bingi bulanda ne binyenge. O ene mambo Baibolo o yatongwela lufu amba mulwanyi. (1 Kolinda 15:26) Mu lufunjiso 27, mwafunjile kuba’mba Yehoba ukafumyapo lufu. Pano ñanyi kintu kikamwekela bantu bafwa kala? Mu uno mutwe, musakufunda pa mulaye wawama bingi witulaya Yehoba. Uno mulaye ke wa kuba’mba ukasangula bantu bavula bafwa ba kukankalwa kubala kuba’mba bakekale na bumi bwa myaka ne myaka. Yehoba ukebasangula! Nanchi kine kino kikobiwa nyi? Abya ukebasangula kuya na kwikala na bumi mwiulu nyi, inyi bakekala pano ponka pa ntanda?
1. Ñanyi kintu Yehoba kyo akebesha kubila balongo betu ne balunda netu bafwa?
Yehoba wakebesha bingi kusangula bantu bafwa. Muntu umo wakishinka aye Yoba waketekejile’mba Lesa kechi ukamulubako inge wafwa ne. Yoba waambile pe Lesa amba: “Anweba mukangita, ne amiwa nketaba [mu Kilende].”—Tangai Yoba 14:13-15.
2. Twayuka byepi kuba’mba bantu bafwa bakebasangula?
Yesu byo ajinga pano pa ntanda, Lesa wamupeele bulume bwa kusangula bantu. Yesu wasangwile kashimbi wajinga na myaka 12 kabiji wasangwile ne mwana wamulume wa mwanamukazhi wafwijilwe. (Mako 5:41, 42; Luka 7:12-15) Kabiji Lazalasa mulunda wa kwa Yesu wafwile. Nangwa kya kuba Lazalasa wafwile ne kumuzhiika saka papita ne moba ana, Yesu wamusangwile. Yesu walombele kwi Lesa ne kubijika na jiwi ja peulu saka atala ku kilende amba: “Lazalasa, lupukamo!” Kabiji “uno muntu wafwile walupukilemo” saka aji mumi. (Yoano 11:43, 44) Balunda nanji Lazalasa ne balongo banji batemenwe bingi byo asangukile!
3. Ñanyi luketekelo lo muji nalo pa balongo benu ne balunda nenu bafwa?
Baibolo witubuula’mba: “Kukekala lusanguko.” (Byubilo 24:15) Bantu Yesu bo asangwile byo ajinga pano pa ntanda kechi bayile mwiulu ne. (Yoano 3:13) Wibasangwijile pano ponka pa ntanda kabiji batemenwe bingi. Onkao mambo, katatakatu Yesu akasangule bantu bavula bingi kwikala na bumi bwa myaka ne myaka pano pa ntanda mu paladisa. Yesu waambile’mba “aba bonse baji mu bilende” Lesa ukebasangula nangwa kya kuba bantu bakonsha kwibalubako uba nobe kechi bajingako ne.—Yoano 5:28, 29.
FUNJILAIPO BIKWABO
Kebai bishinka byaamba Baibolo pa ene mambo o twafwainwa kuswila’mba Yesu uji na bulume bwa kusangula bantu bafwa kabiji kine ukebasangula. Lusanguko lwafwainwa kwimutekenesha ne kwimutundaika kuketekela bingi mwi Lesa.
4. Kine Yesu ukasangula bantu bafwa
Funjilaipo byavula pe Yesu pa kintu kyo aubijile mulunda nanji Lazalasa. Tangai Yoano 11:14, 38-44, ne kwisamba ano mepuzho:
-
Twayuka byepi amba Lazalasa kine wafwile?—Monai kyepelo 39.
-
Inge Lazalasa byo afwile wayile mwiulu, nanchi Yesu inge wamusangwijile pano pa ntanda nyi?
5. Bantu bavula bakasanguka
Tangai Salamo 37:29, ne kwisamba buno bwipuzho:
-
Nanchi bantu bavula bo bakasangula bakekalanga kwepi?
Yesu ukasangula bantu bavula bingi kechi bonkatu baingijilanga Yehoba ne. Tangai Byubilo 24:15, ne kwisamba buno bwipuzho:
-
Bañanyi bo mwakebesha kumona inge bakasanguka?
Langulukai pa kino kishinka: Yesu uji na bulume bwa kusangula muntu wafwa kwa kubula lukatazho byonkatu nsemi byo akonsha kubuusha mwananji walaala
6. Lusanguko lwafwainwa kwimutekenesha ne kwimutundaika kuketekela bingi mwi Lesa
Jishimikila ja mu Baibolo jaamba pa mwana wamukazhi wa kwa Yelusa jitekenesha ne kutundaika bantu bavula baji na bulanda. Tangai jino jishimikila ja kine jiji pa Luka 8:40-42, 49-56.
Saka akyangye kusangula mwana wamukazhi wa kwa Yelusa, Yesu wabuujile shanji amba: “Kwakamwa ne, ikalatu na lwitabilo.” (Monai kyepelo 50.) Kuketekela mu lusanguko kwafwainwa kwimukwasha byepi . . .
-
inge mulongo wenu nangwa mulunda nenu wafwa?
-
inge bumi bwenu buji mu kizumba?
Tambai VIDYO, ne kwisamba buno bwipuzho.
-
Lusanguko lwatekeneshe ne kutundaika byepi bansemi ba kwa Felicity?
BANTU BAMO BAMBA’MBA: “Bantu bafwa bakebasangula kuya na kwikala mwiulu kechi pano pa ntanda ne.”
-
Nga anweba musakwambapo’mba ka?
-
Ñanyi kinembelo kyo mwakonsha kwingijisha kyaamba’mba kukekala lusanguko?
ÑANYI BISHINKA BYO MWAFUNDA?
Baibolo witubuula’mba bantu bavula bafwa bakasanguka. Yehoba wakebesha bingi kwibasangula kabiji wapa Yesu bulume bwa kwibasangula.
Mepuzho a kupitulukamo
-
Twayuka byepi amba Yehoba ne Yesu bakebesha bingi kusangula bantu bafwa?
-
Bantu bo bakasangula bakekalanga mwiulu nyi, inyi pano pa ntanda? Mambo ka o mwakumbwila byobyo?
-
Ñanyi kintu kimulengela kushiinwa’mba balongo benu nangwa balunda nenu bafwa bakebasangula?
KEBAI BISHINKA BIKWABO
Monaipo mashinda amo awama afwainwa kwimukwasha kuyuka mwa kubila na bulanda.
“Byakonsha Kukwasha Bantu Baji na Bulanda” (Labainga! Na. 3 2018)
Nanchi mafunde aji mu Baibolo kine afwainwa kukwasha muntu uji na bulanda nyi?
Ñanyi kintu kyafwainwa kukwasha baana kuchinchika inge bafwisha mulongo wabo nangwa mulunda nabo?
Nanchi kuji bo bakasangula kuya mwiulu nyi? Bañanyi bo bakabula kusangula?
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
