LƐSIN 30
Yu Fambul ɛn Padi dɛn Go Gɛt Layf Bak!
Day de mek wi kray bɔku ɛn gɛt pwɛlat. Na dat mek di Baybul se day na ɛnimi. (1 Kɔrintians 15:26) Insay Lɛsin 27, yu bin lan se Jiova go dɔnawe wit da ɛnimi de. Bɔt wetin go apin to pipul dɛn we dɔn ɔlrɛdi day? Insay dis lɛsin, yu go lan mɔ bɔt wan ɔda fayn prɔmis we Jiova dɔn mek fɔ se i go mek bɔku bɔku pipul dɛn we dɔn day gɛt layf bak ɛn ɛnjɔy layf sote go. Yu tink se dat go rili apin? Usay yu tink se di wan dɛn we go gɛt layf bak go de, na ɛvin ɔ na di wɔl?
1. Wetin Jiova want fɔ du fɔ yu fambul ɛn padi dɛn we dɔn day?
Jiova rili want fɔ gi layf bak to pipul dɛn we dɔn day. Wan man we gɛt fet we nem Job bin gɛt kɔnfidɛns se Gɔd nɔ go fɔgɛt am we i day. I bin tɛl Gɔd se: “Yu go kɔl mi, ɛn a go ansa yu [frɔm di Grev].”—Rid Job 14:13-15.
2. Aw wi no se di wan dɛn we dɔn day go gɛt layf bak?
We Jizɔs bin de na di wɔl, Gɔd bin gi am pawa fɔ gi layf bak to pipul dɛn. Jizɔs bin gi layf bak to wan titi we ol 12 ia ɛn wan uman we in man bin dɔn day in bɔypikin. (Mak 5:41, 42; Lyuk 7:12-15) Leta, Jizɔs in padi Lazarɔs bin day. Pan ɔl we Lazarɔs bin dɔn day ɛn dɛn dɔn bɛr am fɔ 4 dez, Jizɔs bin gi am layf bak. Afta we Jizɔs pre to Gɔd, i tinap bifo di grev ɛn ala se: “Lazarɔs, kam na do!” Dɔn “di man we bin dɔn day kɔmɔt na do.” Lazarɔs gɛt layf bak! (Jɔn 11:43, 44) Imajin aw Lazarɔs in fambul ɛn padi dɛn go dɔn gladi!
3. Us op de fɔ yu fambul ɛn padi dɛn we dɔn day?
Di Baybul prɔmis se: “Gɔd go gi layf bak to di wan dɛn we dɔn day.” (Akt 24:15) Di wan dɛn we Jizɔs bin gi layf bak trade nɔ bin go na ɛvin. (Jɔn 3:13) Dɛn bin gladi fɔ gɛt layf bak na dis wɔl. Semweso, i nɔ go te igen Jizɔs go gi layf bak to bɔku bɔku pipul dɛn, ɛn dɛn go ɛnjɔy layf sote go na Paradays na dis wɔl. Jizɔs bin se “ɔl di wan dɛn we de na di grev,” ivin di wan dɛn we i tan lɛk se pipul dɛn dɔn fɔgɛt, bɔt we Gɔd stil de mɛmba, go gɛt layf bak.—Jɔn 5:28, 29.
LAN MƆ
Lan frɔm di Baybul wetin mek wi shɔ se Jizɔs gɛt di pawa fɔ gi layf bak to di wan dɛn we dɔn day, ɛn i go du dat tumara bambay. Lan bak bɔt aw di op fɔ se di wan dɛn we dɔn day go gɛt layf bak go ɛnkɔrej yu ɛn mek yu gɛt op.
4. Jizɔs bin pruv se i ebul fɔ gi layf bak to pɔsin we dɔn day
Lan mɔ bɔt wetin Jizɔs bin du fɔ in padi Lazarɔs. Rid Jɔn 11:14, 38-44, dɔn una tɔk bɔt dɛn kwɛstyɔn dɛn ya:
-
Aw wi no se Lazarɔs bin rili day?—Luk vas 39.
-
If Lazarɔs bin dɔn go na ɛvin, yu tink se Jizɔs bin fɔ dɔn gi am layf bak na dis wɔl?
5. Bɔku pipul dɛn go gɛt layf bak!
Rid Sam 37:29, dɔn una tɔk bɔt dis kwɛstyɔn:
-
Usay di bɔku bɔku pipul dɛn we go gɛt layf bak go de?
Nɔto di wan dɛn we de wɔship Jiova nɔmɔ Jizɔs go gi layf bak, i go gi layf bak to bɔku ɔda pipul dɛn. Rid Akt 24:15, dɔn una tɔk bɔt dis kwɛstyɔn:
-
Udat yu go lɛk fɔ si we i gɛt layf bak?
Tink bɔt dis: Jizɔs ebul fɔ gi layf bak to pɔsin izi wan jɔs lɛk aw papa kin wek in pikin we de slip
6. Di op fɔ se di wan dɛn we dɔn day go gɛt layf bak go ɛnkɔrej yu ɛn mek yu gɛt op
Di stori bɔt Jayrɔs in galpikin dɔn ɛnkɔrej bɔku pipul dɛn we dɛn at pwɛl bikɔs dɛn fambul ɔ padi dɔn day. Rid da tru tru stori de na Lyuk 8:40-42, 49-56.
Bifo Jizɔs gi layf bak to Jayrɔs in galpikin, i bin tɛl di pikin in papa se: “Nɔ fred, jɔs gɛt fet.” (Luk vas 50.) Aw di op fɔ se di wan dɛn we dɔn day go gɛt layf bak go ɛp yu . . .
-
we yu fambul ɔ padi day?
-
we yu layf de pan denja?
Ple di VIDIO, dɔn una tɔk bɔt di kwɛstyɔn we de dɔŋ.
-
Aw di op fɔ se di wan dɛn we dɔn day go gɛt layf bak bin ɛnkɔrej Filisiti in mama ɛn papa?
SƆM PIPUL DƐN KIN SE: “I at fɔ biliv se di wan dɛn we dɔn day go rili gɛt layf bak.”
-
Wetin yu tink?
-
Us skripchɔ yu go yuz fɔ sho se di wan dɛn we dɔn day go gɛt layf bak?
WETIN YU DƆN LAN?
Di Baybul prɔmis se bɔku bɔku pipul dɛn we dɔn day go gɛt layf bak. Jiova want mek dɛn pipul dɛn de liv bak, ɛn i dɔn gi Jizɔs di pawa fɔ gi dɛn layf bak.
Rivyu
-
Aw wi no se Jiova ɛn Jizɔs rili want fɔ gi layf bak to di wan dɛn we dɔn day?
-
Usay yu tink se di wan dɛn we go gɛt layf bak go de, na ɛvin ɔ na di wɔl? Wetin mek yu se so?
-
Wetin mek yu shɔ se yu fambul ɛn padi dɛn we dɔn day go gɛt layf bak?
DU MƆ RISACH
Lan bɔt sɔm tin dɛn we go ɛp yu fɔ bia we yu fambul ɔ padi day.
“Tin Dɛn we Go Ɛp di Wan dɛn We Dɛn At Pwɛl Bikɔs Dɛn Fambul ɔ Padi Dɔn Day” (Awek! No. 3 2018)
Yu tink se Baybul prinsipul dɛn go rili ɛp pɔsin we in at pwɛl bikɔs in fambul ɔ padi day?
Aw pikin dɛn go ebul bia we dɛn fambul ɔ padi day?
Ɛnibɔdi go gɛt layf bak fɔ go na ɛvin? Udat dɛn nɔ go gɛt layf bak?
“Wetin I Min fɔ Gɛt Layf Bak?” (Atikul na di wɛbsayt)
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
