တၢ်မၤလိ ၃၀
ပှၤလၢနအဲၣ်အီၤ လၢအသံတ့ၢ်တဖၣ်န့ၣ် ကဂဲၤဆၢထၢၣ်သမူထီၣ်က့ၤ
တၢ်သံန့ၣ် ဒုးအိၣ်ထီၣ်ဝဲ တၢ်သူၣ်ဘၣ်ဒိသးဘၣ်ဒိ ဒီးတၢ်သူၣ်အုးသးအုးဒိၣ်မး. အဃိန့ၣ် လံာ်စီဆှံ ကိးဝဲတၢ်သံလၢ ဒုၣ်ဒါ. (၁ ကရံၣ်သူး ၁၅:၂၆) လၢတၢ်မၤလိ ၂၇ အပူၤန့ၣ် နမၤလိဘၣ်လၢ ယဟိဝၤယွၤ ကမၤနၢၤကွံာ်ဝဲ ဒုၣ်ဒါ လၢအမ့ၢ်တၢ်သံ. ဘၣ်ဆၣ် ပှၤလၢ အသံတ့ၢ်တဖၣ်န့ၣ် တၢ်ကမၤအသးဒီး အဝဲသ့ၣ်ဒ်လဲၣ်. လၢတၢ်မၤလိတခါအံၤအပူၤ နကမၤလိဘၣ် ယဟိဝၤယွၤ အတၢ်အၢၣ်လီၤလၢ အလီၤကမၢကမၣ် ဒိၣ်မးတခါ. ကစၢ်ယွၤ ကမၤသမူထီၣ်က့ၤ ပှၤလၢ အကကွဲၢ်တဖၣ်အကကွဲၢ် ဒ်သိးအဝဲသ့ၣ် ကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်. ဘၣ်ဆၣ် ပှၤသံန့ၣ် ဂဲၤဆၢထၢၣ်သမူထီၣ်က့ၤ ကသ့သပှၢ်တၢၢ်ဧါ. ပှၤလၢ အဂဲၤဆၢထၢၣ်သမူထီၣ်က့ၤတဖၣ်န့ၣ် အကအိၣ်ဘၣ်လၢ မူခိၣ်ဧါ မ့တမ့ၢ် အကအိၣ်ဘၣ်လၢ ဟီၣ်ခိၣ်ချၢဧါ.
၁. လၢနဟံၣ်ဖိဃီဖိ ဒီးနသကိးလၢ အသံတ့ၢ်တဖၣ်အဂီၢ် ယဟိဝၤယွၤ အဲၣ်ဒိးမၤဝဲမနုၤလဲၣ်.
ယဟိဝၤယွၤ သးအိၣ် မၤသမူထီၣ်က့ၤ ပှၤလၢအသံတ့ၢ်တဖၣ် သပှၢ်တၢၢ်. စီၤယိၤဘး လၢအမ့ၢ် ပှၤလၢ အအိၣ်ဒီးတၢ်နာ်တဂၤန့ၣ် နာ်ဝဲသပှၢ်တၢၢ်လၢ အမ့ၢ်သံန့ၣ် ကစၢ်ယွၤ တသးပ့ၤနီၣ်အီၤဘၣ်. စီၤယိၤဘး တဲဘၣ် ကစၢ်ယွၤလၢ “နကကိးထီၣ် ဒီးယကစံးဆၢနၤ” လၢတၢ်သွၣ်ခိၣ် အပူၤ.—ဖး ယိၤဘး ၁၄:၁၃-၁၅.
၂. ပှၤသံတဖၣ် ကဂဲၤဆၢထၢၣ်သမူထီၣ်က့ၤန့ၣ် ပသ့ၣ်ညါဘၣ်ဒ်လဲၣ်.
ဖဲယ့ၣ်ၡူး အိၣ်လၢဟီၣ်ခိၣ်အခါ ကစၢ်ယွၤဟ့ၣ်အီၤ တၢ်စိတၢ်ကမီၤလၢ အကမၤဂဲၤဆၢထၢၣ်သမူထီၣ်က့ၤ ပှၤသံ. ယ့ၣ်ၡူး မၤသမူထီၣ်က့ၤဝဲ ဖိသၣ်ပိာ်မုၣ်လၢ အသးနံၣ်အိၣ် ၁၂ နံၣ်တဂၤ ဒီးမုၣ်ကမဲအဖိခွါတဂၤ. (မၢ်ကူး ၅:၄၁, ၄၂; လူၤကၣ် ၇:၁၂-၁၅) လၢခံ ယ့ၣ်ၡူးအသကိး စီၤလါစရူးသံဝဲ. စီၤလါစရူးန့ၣ် အသံဒီးအအိၣ်လၢ တၢ်သွၣ်ခိၣ်အပူၤန့ၣ် အိၣ်လွံၢ်သီလံ သနာ်က့ ယ့ၣ်ၡူး မၤသမူထီၣ်က့ၤအီၤ. ယ့ၣ်ၡူးဃ့ထုကဖၣ် လၢကစၢ်ယွၤအအိၣ် ဝံၤဒီး ယ့ၣ်ၡူးတဲဝဲလၢ “စီၤလါစရူးဧၢ, ဟဲက့ၤထီၣ်ဟီ.” ဒီး “ပှၤလၢ အသံတ့ၢ်တဂၤန့ၣ် ဟဲက့ၤထီၣ်ဝဲ.” စီၤလါစရူး ဂဲၤဆၢထၢၣ်သမူထီၣ်က့ၤလံ. (ယိၤဟၣ် ၁၁:၄၃, ၄၄) အဃိ ထံၣ်တမှံကွၢ်လၢ စီၤလါစရူး အဟံၣ်ဖိဃီဖိ ဒီးအသကိး ကသးခုထဲလဲၣ်.
၃. လၢနဟံၣ်ဖိဃီဖိ ဒီးနသကိးလၢ အသံတ့ၢ်တဖၣ်အဂီၢ် တၢ်မုၢ်လၢ်မနုၤအိၣ်လဲၣ်.
လံာ်စီဆှံအၢၣ်လီၤဝဲလၢ ‘ပှၤလၢအသံသ့ၣ်တဖၣ် ကဂဲၤဆၢထၢၣ် သမူထီၣ်က့ၤ.’ (မၤတၢ် ၂၄:၁၅) ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ပှၤလၢ အဝဲမၤဂဲၤဆၢထၢၣ်သမူထီၣ်က့ၤဝဲတဖၣ်န့ၣ် တလဲၤထီၣ်လၢ မူခိၣ်နီတဂၤဘၣ်. (ယိၤဟၣ် ၃:၁၃) ယ့ၣ်ၡူး မၤသမူထီၣ်က့ၤအဝဲသ့ၣ် ဒီးအဝဲသ့ၣ် အိၣ်မူဘၣ်ကဒီးလၢ ဟီၣ်ခိၣ်ချၢအဃိ အဝဲသ့ၣ်သးခု. တယံာ်လၢၤဘၣ်န့ၣ် ယ့ၣ်ၡူး ကမၤသမူထီၣ်က့ၤ ပှၤလၢ အကကွဲၢ်တဖၣ်အကကွဲၢ် ဒ်သိးအဝဲသ့ၣ် ကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ် လၢဟီၣ်ခိၣ်ပၤရဒံစူးအပူၤ. ပှၤသံလၢ ပှၤတသ့ၣ်နီၣ်ဘၣ် အဝဲသ့ၣ်လၢၤဘၣ်န့ၣ် ကစၢ်ယွၤ ကသ့ၣ်နီၣ်ထီၣ်အဝဲသ့ၣ်ဒံး အဃိ ယ့ၣ်ၡူးတဲဝဲလၢ “ပှၤကိးဂၤဒဲးလၢ တၢ်သွၣ်ခိၣ်တဖၣ်အပူၤ” န့ၣ်ကစၢ်ယွၤ ကမၤသမူထီၣ်က့ၤအဝဲသ့ၣ်.—ယိၤဟၣ် ၅:၂၈, ၂၉.
ဃုသ့ၣ်ညါအါထီၣ်
မၤလိအါထီၣ် တၢ်အုၣ်သးလၢ အအိၣ်လၢ လံာ်စီဆှံအပူၤ လၢအပာ်ဖျါထီၣ်ဝဲလၢ ပှၤသံန့ၣ် ကဂဲၤဆၢထၢၣ်သမူထီၣ်က့ၤ. ဒီးတၢ်ဂဲၤဆၢထၢၣ်သမူထီၣ်က့ၤန့ၣ် မၤမုာ်နသး ဒီးဟ့ၣ်နၤတၢ်မုၢ်လၢ် ကသ့ဒ်လဲၣ်.
၄. ယ့ၣ်ၡူး ပာ်ဖျါထီၣ်ဝဲလၢ အမၤသမူထီၣ်က့ၤ ပှၤသံသ့
ဃုသ့ၣ်ညါအါထီၣ် ဘၣ်ဃးဒီး တၢ်လၢယ့ၣ်ၡူးမၤန့ၢ်ဝဲလၢ အသကိး စီၤလါစရူးအဂီၢ်. ဖး ယိၤဟၣ် ၁၁:၁၄, ၃၈-၄၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
စီၤလါစရူး သံအနီၢ်ကီၢ်န့ၣ် ပသ့ၣ်ညါဘၣ်ဒ်လဲၣ်.—ကွၢ် အဆၢဖိ ၃၉.
-
စီၤလါစရူး မ့ၢ်လဲၤထီၣ်လၢ မူခိၣ်န့ၣ် နဆိကမိၣ် ယ့ၣ်ၡူးကမၤ သမူထီၣ်က့ၤအီၤ ဒီးကိးလီၤက့ၤအီၤ လၢဟီၣ်ခိၣ်ချၢဧါ.
၅. ပှၤကဂဲၤဆၢထၢၣ် သမူထီၣ်က့ၤ အါအါဂီၢ်ဂီၢ်
ဖး စံးထီၣ်ပတြၢၤ ၃၇:၂၉ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ပှၤအကကွဲၢ်တဖၣ်လၢ အကဂဲၤဆၢထၢၣ်သမူထီၣ်က့ၤန့ၣ် အဝဲသ့ၣ်ကအိၣ်ဘၣ်လၢ တၢ်လီၢ်ဖဲလဲၣ်.
ယ့ၣ်ၡူး ကမၤသမူထီၣ်က့ၤ ပှၤလၢ အဘူၣ်ထီၣ်ဘါထီၣ် ယဟိဝၤယွၤ တကးဒံးဘၣ် အကမၤသမူထီၣ် ပှၤအဂၤတဖၣ်စ့ၢ်ကီး. ဖး မၤတၢ် ၂၄:၁၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
နအဲၣ်ဒိးထံၣ် မတဂၤ ဂဲၤဆၢထၢၣ်သမူထီၣ်က့ၤလဲၣ်.
ဆိကမိၣ်ကွၢ် ဒ်ပါတဂၤ မၤဂဲၤဆၢထၢၣ် အဖိခွါလၢအမံတဂၤ သ့ဝဲညီညီအသိး ယ့ၣ်ၡူးစ့ၢ်ကီး အမၤဂဲၤဆၢထၢၣ်သမူထီၣ်က့ၤ ပှၤလၢအသံဝဲတဂၤ သ့ဝဲညီညီ
၆. တၢ်ဂဲၤဆၢထၢၣ်သမူထီၣ်က့ၤန့ၣ် ကမၤမုာ်ထီၣ်နသး ဒီးဟ့ၣ်နၤတၢ်မုၢ်လၢ်
လံာ်စီဆှံ ပာ်ဖျါထီၣ်ဝဲ ဘၣ်ဃးဒီး စီၤယၤအ့ၤရူး အဖိမုၣ်အဂ့ၢ်န့ၣ် မၤမုာ်ထီၣ် ဒီးဟ့ၣ်ဂံၢ်ဟ့ၣ်ဘါဝဲ ပှၤအါဂၤလၢ အသူၣ်ဘၣ်ဒိသးဘၣ်ဒိ. ဖး တၢ်ကဲထီၣ်သးနီၢ်ကီၢ် ဖဲ လူၤကၣ် ၈:၄၀-၄၂, ၄၉-၅၆.
တချုးလၢ ယ့ၣ်ၡူးမၤသမူထီၣ်က့ၤ စီၤယၤအ့ၤရူးအဖိမုၣ် ဒံးဘၣ်န့ၣ် ယ့ၣ်ၡူးတဲဘၣ် စီၤယၤအ့ရူးလၢ “ဘၣ်ယိၣ်တၢ်တဂ့ၤ, အိၣ်ဒီးတၢ်နာ်တက့ၢ်.” (ကွၢ် အဆၢဖိ ၅၀.)
-
ဖဲပှၤလၢနအဲၣ်တဂၤ သံအခါ တၢ်မုၢ်လၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ် ကမၤစၢၤနၤဒ်လဲၣ်.
-
ဖဲနထံၣ်ဘၣ် တၢ်အိၣ်သး လၢအကဲထီၣ် တၢ်ဘၣ်ယိၣ်လၢ နသးသမူအဂီၢ်အခါ တၢ်မုၢ်လၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ် ကမၤစၢၤနၤဒ်လဲၣ်.
ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
တၢ်မုၢ်လၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ် မၤမုာ်ထီၣ် ဒီးဟ့ၣ်ဂံၢ်ဟ့ၣ်ဘါဝဲ ဖလံၤစတံ အမိအပါဒ်လဲၣ်.
ပှၤတနီၤတဲဝဲလၢ– “ပှၤသံလံဒၢး, အဂဲၤဆၢထၢၣ်သမူထီၣ်က့ၤ ကသ့ဒ်လဲၣ်.”
-
နၤမီၤ နဆိကမိၣ်ဒ်လဲၣ်.
-
ပှၤမ့ၢ်တဲနၤ ဒ်န့ၣ်န့ၣ် နကတဲဘၣ်အီၤလၢ ပှၤသံကဂဲၤဆၢထၢၣ်သမူထီၣ်က့ၤ နီၢ်ကီၢ်အဂီၢ် နကဒုးနဲၣ်အီၤ လံာ်စီဆှံ ဖဲလဲၣ်တဆၢလဲၣ်.
တၢ်ဂ့ၢ်လၢအရ့ဒိၣ်
လံာ်စီဆှံ အၢၣ်လီၤဝဲလၢ ပှၤအကကွဲၢ်တဖၣ်လၢ အသံတ့ၢ်န့ၣ် ကဂဲၤဆၢထၢၣ်သမူထီၣ်က့ၤ. ခီဖျိလၢ ယဟိဝၤယွၤ အဲၣ်ဒိးမၤသမူထီၣ်က့ၤ ပှၤသံအဃိ အဝဲဟ့ၣ်လီၤယ့ၣ်ၡူး တၢ်စိတၢ်ကမီၤလၢ ကမၤသမူထီၣ်က့ၤ အဝဲသ့ၣ်.
တၢ်ကွၢ်ကဒါက့ၤ
-
ယဟိဝၤယွၤ ဒီးယ့ၣ်ၡူး အိၣ်ခိးကွၢ်လၢ်ဝဲ တၢ်ဆၢကတီၢ်လၢ အဝဲသ့ၣ် ကမၤသမူထီၣ်က့ၤ ပှၤသံတဖၣ်န့ၣ် ပသ့ၣ်ညါဘၣ်ဒ်လဲၣ်.
-
ပှၤအကကွဲၢ်တဖၣ်လၢ ကဂဲၤဆၢထၢၣ်သမူထီၣ်က့ၤန့ၣ် အဝဲသ့ၣ်ကအိၣ်ဘၣ် လၢမူခိၣ်ဧါ မ့တမ့ၢ် လၢဟီၣ်ခိၣ်ချၢဧါ. ဘၣ်မနုၤအဃိ နတဲဒ်န့ၣ်လဲၣ်.
-
ဘၣ်မနုၤအဃိ နနာ်လၢ ပှၤလၢနအဲၣ် လၢအသံတ့ၢ်တဖၣ် ကဂဲၤဆၢထၢၣ်သမူထီၣ်က့ၤလဲၣ်.
ဃုသ့ၣ်ညါ
ဒ်သိးနလဲၤခီဖျိ တၢ်သူၣ်အုးသးအုး ကသ့အဂီၢ် ဖးကွၢ် တၢ်ဟ့ၣ်ကူၣ်လၢ အကဲဘျုး.
“တၢ်မၤစၢၤလၢ ပှၤလၢအသးအုးတဖၣ်အဂီၢ်” (ပၢၢ်ထီၣ်! နီၣ်ဂံၢ် ၃ ၂၀၁၈)
ပှၤတဂၤလၢ အသးဘၣ်ဒိန့ၣ် လံာ်စီဆှံ အတၢ်ဟံးစုနဲၣ်ကျဲတဖၣ် မၤစၢၤအီၤသ့ဧါ.
ဖိသၣ်တဖၣ်န့ၣ် ဖဲပှၤလၢအဝဲသ့ၣ်အဲၣ်ဝဲ သံအခါ အဝဲသ့ၣ် လဲၤခီဖျိဝဲ တၢ်သးအုး ကသ့ဒ်လဲၣ်.
ပှၤကဂဲၤဆၢထၢၣ် သမူထီၣ်က့ၤလၢ မူခိၣ်အိၣ်တဂၤဂၤဧါ. မတဂၤသ့ၣ်တဖၣ် တဂဲၤဆၢထၢၣ်သမူထီၣ်က့ၤ လၢၤဘၣ်လဲၣ်.
“တၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)