KALABO 30
E Wõila Veaitiɛ Ta Vaazu Wu-Ziɣizu Saa Ya!
Sai ɣa va ga zii zuuli ɓakpa de wɔ, e kɛ de maa wõi. Na ɣa e kɛɛ Gala Kɔlɔi ɣa sai lili ga de wɔ̀ɔ yɔ̃wɔi. (1 Kɔlĩitiɛ 15:26) Kalabo 27 zu, de maa wolini ga Jehova ɣa vaazu de wɔ̀ɔ yɔ̃wɔi nii yee maazu ɣale zu. Kɛ zɛɓɛi sa e vaazu ɣɛɛzu ga niitiɛ te zaa? Kalabogi nii zu, ya vaazu wɔnɔ faa maa wolizu e vile ki-togi nii va Jehova fea de ya—tɔ vaazu nu lamaa wu-ziɣizu saa ya ga te yii-ma ɣɛ wɔlɔ-wɔlɔ ta wɔlɔ-wɔlɔ. E ɣisu nii ɣa vaazu ɣɛɛzu? E ɣisu ta vaazu wu-ziɣizu ga te ŋetea ɣɛ Gala ta ɔɔ zui ma?
1. Zɛɓɛi Jehova wõini e kɛ de wõila veaitiɛ ʋaa ma te zaa?
Jehova ɣa na ma wõi-wõi kulozu ga e saa veaitiɛ wu-ziɣi saa ya. Zunui nii tɔ tili ga Joobi, zee-la-ma ɣɛni zeea ga ani ya zaana Gala lɛ wɔlɔ-wɔlɔ yeema ma. E ɣɛni Gala ma: “Ya vaazu tilisu na ɣa ɣɛɛna ga vaazu e woi ɣaa wotesu [kabai zu].”—Job 14:13-15 lodo.
2. De kwɛ̃ɛ gɛ ɣɛ le ga saa veaitiɛ ta vaazu wu-ziɣizu saa ya?
Siɛgi ma Ziizɛ ɣɛni zui ma, Gala ge gaa-ɓaa ʋeeni zeea ga e saa vea wu-ziɣi saa ya. Ziizɛ ŋaza nu loma gila wu-ziɣini saa ya, nii e ɣɛni ga kwena puugɔ kai felegɔ. E po ŋazai dui wu-ziɣini saa ya. (Maki 5:41, 42; Luki 7:12-15) Ziizɛ bɔlɛɛ Laazɔi wu-ziɣini wɔnɔ saa ya, velei ɓalaa e kɛɛni la kabai zu ga folo naagɔ. Tei Ziizɛ Gala felini e lobani yiɛ ɣɛ tea: “Laazɔi, wulo!” Tei e na ɣɛɛni “zunui sai ɣɛ é wuloni sa”—zɛʋu ɣɛni sa Laazɔi zu. (Jɔ̃ 11:43, 44) Ɣi-gaa-ziɛ velei Laazɔi na numaitiɛ ɓɔga na siɛ-puluitiɛ te wuuzu nɛɛ e ɣɛni la!
3. Ki-to sɛɓɛi e na e wõila veaitiɛ ʋaa ma te zaa?
Gala Kɔlɔi de ɣi-togɛ ga: “Bu-ziɣi ʋai saa ya tɔ vaazu ɣɛɛzu.” (Te Ɣɛɛ Ʋaitiɛ 24:15) Taitiɛ Ziizɛ te wu-ziɣini saa ya siɛgi ma e ɣɛni zui ma tɛ lɛ liini Gala ta. (Jɔ̃ 3:13) Te wuuzu nɛɛ e ɣɛni tei Ziizɛ te wu-ziɣini saa ya zui ma. Su lɛ sa woozani ga Ziizɛ nu lamaa wu-ziɣi saa ya ga te yii-ma ɣɛ zuu vagɔi ma wɔlɔ-wɔlɔ ta wɔlɔ-wɔlɔ. E ɣɛni tea “nui ɓɔgɔpɛgi é kabai zu”—niitiɛ ɓalaa de yeema te ma kɛ Gala lɛ yeema te ma, ta vaazu wu-ziɣizu saa ya.—Jɔ̃ 5:28, 29.
FAA LAMAA MAA WOLI
Wɛlɛ velei Gala Kɔlɔi dɛɛ la ga saa veaitiɛ ta vaazu wu-ziɣizu saa ya. Wɛlɛ wɔnɔ velei va bu-ziɣi saa ya ʋai ɣa e ɣaa-nɛkpɛ la, e ki-to fe e ya.
4. Ziizɛ dɛɛni ga towa zoo e saa vea wu-ziɣi saa ya
Faa maa woli e vile nii va Ziizɛ kɛɛni bɔlɛɛ Laazɔi vɛ. A Jɔ̃ 11:14, 38-44 lodo, wo gaa-zaɣa-kɛɛ niitiɛ ɣaa wote:
-
De kwɛ̃ɛga ɣɛ le ga Laazɔi zaa ʋai ɣɛni ɓɔɔ ga gaama?—Wɛlɛ ma woo 39 va.
-
Ani Laazɔi liini Gala ta tei e zaani, e ɣisu Ziizɛ ɔ bu-ziɣi saa ya wɔnɔ zui ma?
5. Numaa lamaa ta vaazu wu-ziɣizu saa ya!
A Psalms 37:29 lodo, wo gaa-zaɣa-kɛɛ nii ɣaa wote:
-
Numaitiɛ te vaazu wu-ziɣizu saa ya, minɛɛ ɣa te vaazu ŋetea ɣɛɛzu na?
Ziizɛ ɣa vaazu nu lamaa wu-ziɣizu saa ya e vɛɛ ɓalaa niitiɛ va tɛ lɛ Jehova ʋelini. A Te Ɣɛɛ Ʋaitiɛ 24:15 lodo, wo gaa-zaɣa-kɛɛ nii ɣaa wote:
-
Ɓɛɛ ɣa ɓɔɔ ya ɣɛ wõini e pɛtɛ e wu-ziɣi saa ya?
Velei nɔ na lɛ ɓaa la ga duu keeai dui wu-ziɣi ani ya na ŋiizu, vele ɣana nɔ na lɛ ɓaani la ga Ziizɛ saa vea wu-ziɣi saa ya
6. Bu-ziɣi saa ya ʋai ɣa e ɣaa wɔpɔ, e ki-to fe e ya
Nii Gala Kɔlɔi boga e vile Jailɔ dui va, towa nu lamaa ɣaa-nɛkpɛ e te yii-lɔɔ. A Luki 8:40-42, 49-56 lodo, wo wɛlɛ nii va ɓɔɔ e ɣɛɛni.
Ziizɛ ɔ vɛɛ Jailɔ dui wu-ziɣizu saa ya, e ɣɛni Jailɔ ma: “Mɛ lɛ luo. Siɣi nɔ ga gaama.” (Wɛlɛ ma woo 50 va) Ki-togi e vile saa veaitiɛ wu-ziɣi ʋai va saa ya towa ɓɔ e va ɣɛ le . . .
-
ani è wõila nu ɣa zaana?
-
ani ya ɣɛna faa ɓoei zu?
ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Ki-togi e vile saa veaitiɛ wu-ziɣi ʋai va saa ya, e Phelicity ɣaa veaitiɛ ɣaa wɔpɔni ɣɛ le e te yii-lɔɔ?
NUMAA TANIGA TE ƔƐ: “Saa veaitiɛ ta vaazu wu-ziɣizu saa ya Gala ta.”
-
Zɛɓɛi e ga yɛdɔ ɣi-gaa-ziɛi?
-
Minɛɛ ɣa ya na lɛ Gala Kɔlɔi zu ga e ɓɔ nu va e kwɛ̃ɛ ga saa veaitiɛ ta vaazu wu-ziɣizu saa ya?
NII SA È MAA WOLIA
Gala Kɔlɔi de ɣi-togɛ ga nu lamaa ɣa vaazu wu-ziɣizu saa ya. Jehova wõini te zɛʋu zɔlɔwo wɔnɔ. Tɔwɔ é gaa-ɓaa ʋea Ziizɛ ya ga e te wu-ziɣi saa ya.
Ma-ɓigitiɛ
-
Jehova ɓɔga Ziizɛ ta ɣi-gaa-ziɛzu ɣɛ le e vile saa veaitiɛ wu-ziɣi ʋai va saa ya?
-
Taitiɛ te vaazu wu-ziɣizu saa ya, minɛɛ ɣa te vaazu ŋetea ɣɛɛzu na, Gala ta ɔɔ zui ma? Zɛɓɛi e kɛɛ yiɛ na wo?
-
Zɛɓɛi e kɛɛ e laila ga e wõila veaitiɛ te zaa ta vaazu wu-ziɣizu saa ya?
WƐLƐ FAA LAMAA VA
Wɛlɛ niitiɛ va ya ɓɔ e va ani e yii ɣaa na zuulizu.
“Kpɔbai E Niitiɛ Ʋaa Ma Te Yii Zuuli Zu” (Awake! No. 3 2018)
E ɣisu tɛnɛgitiɛ te Gala Kɔlɔi zu, ta ɓɔ nui nii va zii zuulizu?
Lopaitiɛ ta gaa wɔpɔ maa zɔlɔwo ɣɛ le, ani te wõila nui ta ɣa zaana?
E ɣisu nu taniga ta vaazu wu-ziɣizu saa ya Gala ta? Ɓɛɛni ka tɛ lɛ vaazu wu-ziɣizu saa ya?
“Zɛɓɛi E Ga Ɓu-Ziɣi Saa Ya Ʋai?” (Kɔlɔi nii ɣa fãga wɔlɔi ma)
