TUTO 30
Balatiwa Bamina Babashwile Bakapila Hape!
Halushwelwa ki mutu, lwalobehanga pilu ni kuswaba hahulu. Kona libaka Bibele haibiza lifu kuli ki sila. (1 Makorinte 15:26) Mwa tuto 27, nemuitutile kuli Jehova ukafelisa lifu. Kono kukaezahalañi kwa batu babashwile? Mwa tuto ye, mukaituta zeñata ka za sepiso yeñwi ya Jehova, ili ya kuzusa batu babañata-ñata babashwile kuli bato ikola kupila kuya kuile. Mulimu ukazusa batu babashwile! Kana taba yeo yakonahala luli? Kana batu bao bakazusiwa kuli bayo pila kwa lihalimu kamba fa lifasi?
1. Ki sika mañi sabata kueza Jehova kwa balatiwa baluna babashwile?
Jehova unyolelwa kuzusa batu babashwile. Jobo, muuna yanaanani tumelo, naanani buikolwiso bwa kuli Mulimu naaka muzusa hanaaka shwa. Naabulelezi Mulimu kuli: “Ukabiza, mi nika kualaba [kuzwelela mwa Libita].”—Mubale Jobo 14:13-15.
2. Luziba cwañi kuli babashwile bakazusiwa?
Jesu hanaali fa lifasi, Mulimu naamufile maata a kuzusa batu babashwile. Jesu naazusize musizana wa lilimo ze 12 kwa bafu ni mwanaa mbelwa wamushimani. (Mareka 5:41, 42; Luka 7:12-15) Hamulaho, Lazaro mulikanaa Jesu ashwa. Nihaike kuli Lazaro naasakwanisize mazazi amane mwa libita, Jesu naamuzusize kwa bafu. Hasaalapezi ku Mulimu, Jesu ahuwa ka linzwi lelituna ali: “Lazaro, zwa mo!” Mi “muuna yo yanaashwile azwa” inze apila! (Joani 11:43, 44) Ba lubasi lwa Lazaro ni balikani bahae nebatabile hahulu!
3. Ki sepo mañi yelunani yona ka za balatiwa baluna babashwile?
Bibele ilusepisa kuli: “Kukaba ni zuho.” (Likezo 24:15) Batu banaazusize Jesu kwamulaho nebasikaya kwa lihalimu. (Joani 3:13) Nebatabile kuzusezwa fa lifasi. Jesu hape ukazusa batu babañata-ñata kuli bato ikola kupila kuya kuile mwa paradaisi fa lifasi. Jesu naabulezi kuli “batu kaufela babali mwa mabita a kupulo” kubeya cwalo ni base bashwile kale-kale kono ili bahupula Mulimu, bakato zusiwa kwa bafu.—Joani 5:28, 29.
MUBATISISE
Munyakisise bupaki bwa mwa Bibele bobubonisa kuli babashwile bakona kuzusiwa mi bakato zusiwa luli. Muitute mo kuziba kuli batu babashwile bakazuha kukona kumiomba-ombela ni kumifa sepo.
4. Jesu naabonisize kuli wakona kuzusa babashwile
Muitute zanaaezize Jesu kuli atuse mulikanaa hae Lazaro. Mubale Joani 11:14, 38-44, mi kihona mukanyakisisa lipuzo zelatelela:
-
Luziba cwañi kuli Lazaro naashwile luli?—Mubone timana 39.
-
Kambe Lazaro naaile kwa lihalimu, kana munahana kuli Jesu naaka muzuseza fa lifasi?
5. Batu babañata bakazusiwa kwa bafu!
Mubale Samu 37:29, mi kihona mukanyakisisa puzo yelatelela:
-
Batu babañata-ñata babaka zusiwa bakapila kai?
Kwandaa kuzusa batu bane balapela Jehova, Jesu hape ukazusa ni batu babañwi babañata kwa bafu. Mubale Likezo 24:15, mi kihona mukanyakisisa puzo yelatelela:
-
Ki bo mañi bomutabela kuto bona habaka zusiwa kwa bafu?
Munahane feela taba ye: Jesu wakona kuzusa mutu yashwile sina fela ndate mwakona kuzuseza mwanaa hae yalobezi
6. Kuziba kuli babashwile bakazuha kwakona kumiomba-omba ni kumifa sepo
Batu babañata babashwezwi baomba-ombilwe ni kususuezwa ki taba ya mwa Bibele ya mwanaa Jairusi. Mubale likande la niti leo kwa Luka 8:40-42, 49-56.
Asika zusa kale mwanaa Jairusi, Jesu naabulelezi Jairusi kuli: “Usike wasaba, ube feela ni tumelo.” (Mubone See timana 50.) Sepo ya zuho ikona kumitusa cwañi . . .
-
hamushwelwa ki mutu yemulata?
-
hamukopana ni muinelo otaata?
Mubuhe VIDIO, mi kihona mukanyakisisa puzo yelatelela.
-
Sepo ya zuho iomba-ombile cwañi bashemi ba Phelicity?
BABAÑWI BABULELANGA KULI: “Kutaata kulumela kuli batu babashwile bakazuha hape.”
-
Mubona cwañi?
-
Ki liñolo mañi lemukona kubonisa mutu lelibulela kuli batu babashwile bakazusiwa?
LITABA KA BUKUSWANI
Bibele isepisa kuli batu babañata-ñata babashwile bakazusiwa. Jehova ubata kuli batu bao bato pila hape, mi ufile Jesu maata a kubazusa.
Mulundulule
-
Jehova ni Jesu baikutwa cwañi ka za kuzusa batu babashwile?
-
Kana batu babañata-ñata babaka zusiwa bakapila kwa lihalimu kamba fa lifasi? Ki kabakalañi hamubulela cwalo?
-
Ki lika mañi zemikolwisa kuli balatiwa bamina babashwile bakapila hape?
MUBONE LITABA ZEÑWI
Munyakisise lika zekona kumitusa hamushwezi.
Kana likuka za mwa Bibele zakona kutusa mutu ya mwa maswabi?
Ki lika mañi zekona kutusa banana babashwezwi ki batu bebalata?
Kana kunani babakazusiwa ni kuyo pila kwa lihalimu? Ki bo mañi babasike bazusiwa?
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
