DILONGESHA DIA 30
Bafue bebe nebapetulule muoyo!
Lufu mbualu bua dibungama ne kanyinganyinga kakole. Ke bualu kayi Bible udi ubikila lufu ne: mmuena lukuna, anyi muluishi. (1 Kolinto 15:26) Mu dilongesha dia 27, ukavua mulongamu ne: Yehowa neatshimune muluishi wetu lufu. Kadi tshienzekela bantu bakadi bafue ntshinyi? Mu dilongesha edi, neulonge malu makuabu a bualu bua dikema budi Yehowa utulaya: neabishe bantu miliyare ne miliyare ku lufu bua bashale ne muoyo kashidi panuapa! Ubabisha ku lufu? Kah! Bualu bua nanku budi mua kuenzeka anyi? Neabajule bua baye kusombela mu diulu anyi mbua kushalabu pa buloba apa?
1. Ntshinyi tshidi Yehowa musue kuenzela betu bakadi bafue?
Yehowa udi uzuka bikole mu muoyo wende bua kujula bafue. Yobo, muntu uvua ne ditabuja dikole, uvua ne dishindika dia ne: pavuaye ufua, Nzambi kavua mua kumupua muoyo to. Wakambila Nzambi ne: “Wewe neubikile, ne meme [nenkuitabile mu Lukita].”—Balayi Yobo 14:13-15.
2. Tshidi tshituleja ne: bafue badi mua kubishibua ntshinyi?
Pavua Yezu pa buloba, Nzambi wakamupesha bukole bua kubisha bantu ku lufu. Yezu wakabisha muana wa bakaji wa bidimu 12 ku lufu, ne muana wa balume wa mukaji mukamba kabidi. (Mâko 5:41, 42; Luka 7:12-15) Panyima pa matuku, Lazalo mulunda wa Yezu wakafua. Nansha mukavua Lazalo mufue bamujike matuku anayi mapite, Yezu wakamubisha ku lufu. Yezu wakanji kusambila, pashishe kuelaye anu lubila patupu ne: “Lazalo, patuka!” Kah, Lazalo ‘uvua mufue au wakapatuka’ muikale ne muoyo! (Yone 11:43, 44) Fuanyikijabi bungi bua disanka divua balunda ba Lazalo ne bena mu dîku diabu mua kuikala nadi!
3. Nditekemena kayi diudi nadi bua bebe baukadi mufuishe?
Bible udi utulaya ne: “Nekuikale dibishibua dia bantu ku lufu.” (Bienzedi 24:15) Bantu bavua Yezu mubishe kale ku lufu kabakaya mu diulu to. (Yone 3:13) Bavua ne disanka dia muvuaye mubabishe ku lufu mubapeshilule muoyo anu pa buloba apa. Bia muomumue, Yezu ukadi pa kubisha kabidi bantu miliyare ne miliyare ku lufu bua bashale ne muoyo kashidi mu Mparadizu pa buloba apa. Wakamba ne: “Bantu bonso badi mu nkita ya tshivulukilu,” nansha bakadibu pamuapa bapue muoyo kadi batshikale mu meji a Nzambi, nebabishibue ku lufu.—Yone 5:28, 29.
BUELA MU BUONDOKE
Keba mua kumona malu a mu Bible adi aleja ne: Yezu udi ne bukole bua kubisha bafue ne neababishe. Ulonge kabidi mudi dibishibua dia bafue mua kukusamba ne kukupetesha ditekemena.
4. Yezu wakaleja mudiye ne bukole bua kubisha bafue
Mona malu makuabu a tshivua Yezu muenze bua mulunda wende Lazalo. Balayi Yone 11:14, 38-44, pashishe nuandamune nkonko eyi:
-
Tshidi tshituleja ne: Lazalo uvua bushuwa mufue ntshinyi?—Tangilayi mvese wa 39.
-
Buebe wewe, bu Lazalo mubande mu diulu pavuaye mufue apu, Yezu uvua mua kuikala mumubishe mumualuje pa buloba anyi?
5. Bantu ba bungi nebabishibue ku lufu!
Balayi Misambu 37:29, pashishe nuandamune lukonko elu:
-
Bafue miliyare ne miliyare babishibua nebasombe penyi?
Yezu neabishe bafue bapite bungi, nansha bavua kabayi batendelele Yehowa. Balayi Bienzedi 24:15, pashishe nuandamune lukonko elu:
-
Nnganyi uwajinga kumonaku ubika ku lufu?
Yezu udi mua kubisha muntu ku lufu bipepele anu mudi tatu mua kubisha muanende ku tulu
6. Dibishibua dia bafue didi mua kukusamba ne kukupetesha ditekemena
Bualu bua mu Bible bua muana wa bakaji wa Yailo bukadi busambe ba bungi bavua bafuishe ne bubakankamije. Balayi bualu bulelela buakenzeka abu mu Luka 8:40-42, 49-56.
Kumpala kua Yezu kubishaye muana wa bakaji wa Yailo wakambila tatu au ne: “Kutshinyi to, ikala anu ne ditabuja.” (Tangilayi mvese wa 50.) Mmunyi mudi ditekemena dia dibishibua ku lufu mua kukuambuluisha . . .
-
paudi ufuisha kampanda wenu?
-
padi muoyo webe mu njiwu?
Tangilayi FILME, pashishe nuandamune lukonko ludi lulonda.
-
Mmunyi muvua ditekemena dia dibishibua dia bantu ku lufu disambe baledi ba Felisité ne dibakoleshe?
BAMUE BATU BAMBA NE: “Bafue babishibua! Abu nudi bele bua tshiombe musabu.”
-
Wewe udi wela meji kayi?
-
Mmvese kayi uudi mua kubadilaku muntu bua kumuleja ne: nekuikale dibishibua dia bafue?
TSHIA KUKUATA
Bible mmulaye ne: bantu miliyare ne miliyare bakadi bafue nebabishibue. Yehowa mmusue bua bapetulule kabidi muoyo, ke bualu kayi mmupeshe Yezu bukole bua kubabisha ku lufu.
Diambulula
-
Ntshinyi tshidi Yehowa ne Yezu bumvua bua dibishibua dia bantu ku lufu?
-
Bantu miliyare ne miliyare babishibua ku lufu nebasombe mu diulu anyi pa buloba? Udi wamba nanku bua tshinyi?
-
Tshidi tshikujadikila wewe ne: bafue bebe nebajuke ntshinyi?
BIA KUTANGILA KABIDI
Tshia kuenza bua kumanya mua kupita ne dibungama dia panudi bajimije muntu.
“Diambuluisha bua bantu badi bafuishe” (Tabulukayi! No. 3 2018)
Mêyi a mu Bible adiku bushuwa mua kukolesha badi bafuishe anyi?
Mmushindu kayi udi bana mua kumanya mua kupita ne lufu lua muntu uvuabu banange?
Bafue bonso nebabishibue bua kuya mu diulu anyi? Mbanganyi bikala kabayi mua kubishibua ku lufu?
“Dibishibua dia bafue ntshinyi?” (Tshiena-bualu tshia mu jw.org)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
