Gĩkuũ nĩgĩtũretagĩra kĩeba na kwithikĩĩra gũkũnene. Nĩkĩo Bibiria ĩtaga gĩkuũ munthũ. (1 Akorintho 15:26) Kĩthoomone kĩa 27, nũrĩkĩtie kwiritana atĩ Jehova agacinda munthũ ũu. Ĩndĩ nĩatĩa gũgakarĩka kĩrĩ antũ barĩa barĩkĩtie gũkua? Kĩthoomone gĩkĩ, ũkairitana jamaingĩ nkũrũki jegie wĩrĩgĩĩro bũngĩ bwa kũrigarania kuuma kĩrĩ Jehova—agacookia mwoyo antũ babaingĩ bagwĩrĩrue ũtũũro kenya na kenya. Akabariũkia! Rĩ, kamma bũu no bũmbĩke? Rĩ, bakariũkua batũũre ĩgũrũ kana nĩ nthĩgũrũ?

1. Nĩatĩa Jehova akwenda kũthithĩria endwa beetũ barĩa bakuĩte?

Jehova nairiragĩĩrĩa gũcookia mwoyo antũ barĩa bakuĩte. Muntũ mũrũme ũmwe ũrĩa waarĩ na wĩtĩkio wetagwa Ayubu, naarĩ na ũmma atĩ Mũrungu atĩũrĩrua nĩwe rĩrĩa agakua. Erĩre Mũrungu: “Uringikumbita nani ngeetika” kuuma mbirirene.—Thooma Ayubu 14:13-15.

2. Nĩatĩa tũkũmenya akuũ bomba kũrĩukua?

Rĩrĩa Jesũ aarĩ nthĩgũrũne, Mũrungu namwere inya ya kũriũkia antũ. Jesũ naariũkĩrie mwarĩ wa mĩaka 12, na mũtaana wa mwekũrũ ntigwa baragĩta mwoyo kaĩrĩ. (Mariko 5:41, 42; Luka 7:12-15) Nyumene, mũcoore wa Jesũ arakua. Kinya kethĩra Lazaro naakuĩte, na athiria ntukũ inya athiki, Jesũ namũcookerie mwoyo kaĩrĩ. Nyuma ya kũromba Mũrungu, Jesũ aratũmĩĩria na kaajũ gakanene arĩ au mbĩrĩrene arauga: “Lazaro, uma. na uria wakuite arauma”—arĩ mwoyo! (Johana 11:43, 44) Ũthũgaania ũrĩa antũ ba nja ya ba Lazaro bagwĩrĩtue!

3. Kũrĩna wĩrĩgĩĩro bũrĩkũ kĩrĩ endwa baaku barĩa bakuĩte?

Bibiria yugaga: “Mbirigiirite kuriukua kwa antu.” (Mathithio 24:15) Barĩa Jesũ arĩũkĩrie karaaja batetĩre ĩgũrũ. (Johana 3:13) Nĩbagwĩrĩrue kũriukua na kũgĩta mwoyo o aja nthĩgũrune. O ũu ĩgiita rĩtĩ kũraaja nou Jesũ akariũkia antũ babaingĩ, bagwĩrĩrue gũtũũra kenya na kenya paradiso nthĩgũrũne. Augĩre atĩ “bonthe baria bari mbirirene”—kinya kethĩra gũtĩ muntũ ũriikanaga kethĩra baratũũra—bonthe bakariũkua.​—Johana 5:28, 29.

 ĨNJA NKŨRŨKI

4. Jesũ naarikithĩrie atĩ oomba kũrĩũkia barĩa bakuĩte

Iritane jamaingĩ nkũrũki jegie ũrĩa Jesũ aathithĩĩrie mũcoore waawe Lazaro. Thooma Johana 11:14, 38-44, rĩu bwarĩĩrie biũria bibi:

• Nĩatĩa tũkũmenya atĩ kamma Lazaro naakuĩte?​—Tega mũstaarĩ jwa 39.

• Kethĩra Lazaro naarĩ agwitia ĩgũrũ, ũrĩthũgaania Jesũ arĩngĩmũcookia aja nthĩgũrũne atũũra kaĩrĩ?

Tega VIDIO.

5. Babaingĩ bakariũkua!

Thooma Zaburi 37:29, rĩu bwarĩĩrie kĩũria gĩkĩ:

• Nĩkũ antũ babaingĩ barĩa bakariũkua bagatũũra?

Jesũ akariũkia barĩa baathathaagia Jehova, ona kinya antũ bangĩ babaingĩ. Thooma Mathithio 24:15, rĩu bwarĩĩrie kĩũria gĩkĩ:

• Gwe-rĩ, nũũ ũrĩngĩenda kwona akĩriũkua?

• Nĩatĩa wĩrĩgĩĩro bwa kũriũkua bwaboreerie aciari ba Feliciti na kũbekĩra inya?

 NA NJĨRA ĨNKUĨ

Bibiria ĩrĩna wĩrane atĩ antũ babaingĩ barĩa bakuĩte bakariũkua. Jehova arĩenda batũũre kaĩrĩ na naete Jesũ inya ya kũbarĩũkia.

Gũcookera

• Nĩatĩa Jehova na Jesũ baigagua bwegie kũrĩũkia barĩa bakuĩte?

• Nĩkũ antũ babaingĩ barĩa bakariũkua bagatũũra—nĩ ĩgũrũ kana nĩ nthĩgũrũ? Nĩkĩ ũkuuga ũu?

• Nĩmbi bigũkũrikithĩria endwa baaku barĩa baakuĩte boomba gũtũũra kaĩrĩ?