Mej ej kõm̦m̦an bwe en l̦ap ad bũrom̦õj. Eñin unin an Baibõl̦ ba bwe mej ej juon ri-kõjdat. (1 Korint 15:26) Ilo Katak 27 kwaar katak bwe Jeova enaaj ko̦kkure im jol̦o̦ke ri-kõjdat in. Bõtab, ta eo enaaj wal̦o̦k ñan armej ro me em̦õj aer jako ilo mej? Ilo katak in, kwõnaaj kal̦apl̦o̦k am̦ jel̦ã kõn bar juon kallim̦ur an Jeova me elukkuun em̦m̦an, ñe enaaj karo̦o̦ltok elõñ pilien armej ro bwe ren bar mour im m̦õn̦õn̦õ ñan indeeo. Enaaj kõjerkakpejeik er! M̦ool ke bwe men in emaroñ wal̦o̦k? Renaaj jerkakpeje ñan mour ilo lañ ke ak ijin ioon lal̦?

1. Ta eo Jeova ekõn̦aan kõm̦m̦ane ñan ro rejitõnbõro ippãd me rar mej?

Jeova elukkuun kõn̦aan kõjerkakpejeik ro rar mej. Juon em̦m̦aan me ekajoor tõmak eo an etan Job, ear lõke bwe Anij eban mel̦o̦kl̦o̦ke ãlikin an mej. Ear ba ñan Anij: “Kwõnaaj kũr, innem inaaj uwaak Eok [jãn lõb eo].”​—Riit Job 14:13-15.

2. Etke jejel̦ã bwe ro remej remaroñ jerkakpeje?

Ke Jesus ear pãd ijin ioon lal̦, Anij ear lel̦o̦k ñane kajoor im maroñ eo ñan kõjerkakpejeik armej. Jesus ear kõjerkakpejeik juon leddik 12 an iiõ im juon likao me ej nejin juon kõrã emej l̦eo pãleen. (Mark 5:41, 42; Luk 7:12-15) Tokãlik, l̦eo m̦õttan Jesus etan Lazerõs ear mej. Meñe em̦õj kar kalibwini Lazerõs im ear mej ium̦win emãn raan, ak Jesus ear kõjerkakpejeiki. Ãlikin an kar jar ñan Anij, Jesus ear kõl̦l̦aaj ainikien im ba: “Lazerõs, kwõn diwõjtok!” Innem “l̦eo ekar mej ear diwõjtok”​—im ear bar mour! (Jon 11:43, 44) Pijaikl̦o̦k m̦õk ewi joñan an kar m̦õn̦õn̦õ baam̦le eo an Lazerõs im ro m̦õttan!

3. Ta kõjatdikdik eo an ro rejitõnbõro ippam̦ me em̦õj aer mej?

Baibõl̦ ej kallim̦ur: “Enaaj wõr juon iien jerkakpeje.” (Jerbal 24:15) Ro me em̦õj an kar Jesus kõjerkakpejeik er rar jab etal ñan lañ. (Jon 3:13) Rein rar m̦õn̦õn̦õ ke kar kõjerkakpejeik er ñan bar mour ijin ioon lal̦. Ejja ãindeinl̦o̦k wõt, m̦õttan jidik Jesus enaaj kõjerkakpejeik elõñ pilien armej ro bwe ren m̦õn̦õn̦õ im mour ñan indeeo ijin ioon lal̦ ilo pedetaij. Ear ba bwe “aolep ro rej pãd ilo lõb ko” renaaj jerkakpeje​—ekoba ro me armej remaroñ kar mel̦o̦kl̦o̦k er ak rej pãdwõt ilo ememej eo an Anij.​—Jon 5:28, 29.

 KAM̦WILAL̦L̦O̦K AM̦ MEL̦EL̦E

4. Jesus ear kam̦ool bwe ewõr an maroñ ñan kõjerkakpejeik ro remej

Kal̦apl̦o̦k am̦ mel̦el̦e kõn ta eo Jesus ear kõm̦m̦ane ñan eo m̦õttan Lazerõs. Riit Jon 11:14, 38-44, innem bwebwenato kake kajjitõk kein:

• Ewi wãween ad jel̦ã bwe Lazerõs ear lukkuun mej?​—Lale eoon 39.

• El̦aññe Lazerõs ear wanlõñl̦o̦k ñan lañ, kwõl̦ak lale Jesus en kar ke bõk lal̦tak bwe en bar mour ijin ioon lal̦?

Kõjo̦e PIJAIN ALWÕJ eo.

5. Elõñ renaaj jerkakpeje!

Riit Sam 37:29, innem bwebwenato kake kajjitõk in:

• Ia eo elõñ pilien armej ro me renaaj jerkakpeje naaj mour ie?

Jesus eban baj kõjerkakpejeik ro rar kabuñ ñan Jeova wõt, ak enaaj bareinwõt kõjerkakpejeik ro jet. Riit Jerbal 24:15, innem bwebwenato kake kajjitõk in:

• Wõn eo kokõn̦aan lo an jerkakpeje im bar mour?

• Ewi wãween an kõjatdikdik eo kõn jerkakpeje eo kaenõm̦m̦an im kõkajoore jemãn im jinen Phelicity?

 TARLEP IN KATAK EO ILO TUKADU

Baibõl̦ eo ej kallim̦ur bwe elõñ pilien armej ro me rar mej renaaj jerkakpeje. Jeova ekõn̦aan bwe ren bar mour, im ear lel̦o̦k kajoor ñan Jesus bwe en maroñ kõjerkakpejeik er.

Ãlij

• Ta eñjake eo an Jeova im Jesus kõn aer nãj kõjerkakpejeik ro rar mej?

• Ñan elõñ pilien armej ro me renaaj jerkakpeje, renaaj mour ia​—ilo lañ ke ak ijin ioon lal̦? Etke kwõj ba men in?

• Etke kwõj tõmak bwe ro rejitõnbõro ippam̦ me em̦õj aer mej renaaj bar mour?