Колымаш шуко ойгым конда. Сандене Библийыште колымашым тушман манме (1 Коринфян-влаклан 15:26). 27-ше урок гыч те пален налында: Иегова тиде тушманым пытара. А колышо-влак дене мо лиеш? Тиде урокышто те Иегован эше ик чапле сӧрымашыже нерген пален налыда — миллиардле еҥым илышыш пӧртылташ. Юмо нуным курымеш илашлан ылыжта! Тиде чынжымак лиеш мо? Ылыжше-влак кушто илаш тӱҥалыт: каваште але мландыште?

1. Иегова колышо еҥ-влаклан мом ыштынеже?

Иегова колышо-влаклан илышым чот пӧртылтынеже. Иов лӱман Юмылан ӱшанле айдеме пален: кола гынат, Юмо тудым огеш мондо. Тудо Юмылан каласен: «Тый ӱжат, да мый [шӱгар гыч] вашештем». (Иов 14:13—15 лудын лекса.)

2. Айдемым ылыжташ лиеш манын, кушеч ме палена?

Кунам Иисус мландыште илен, Юмо тудлан еҥ-влакым ылыжташ вийым пуэн. Иисус 12 ияш ӱдырым да тулык ватын эргыжым ылыжтен (Маркын 5:41, 42; Лукан 7:12—15). Вараракшым Иисусын Лазарь йолташыже колен. Лазарьын колымыж деч вара ныл кече эртен гынат, Иисус тудым ылыжтен. Лазарьым ылыжтыме деч ончыч Иисус Юмылан кумалын да вара каласен: «Лазарь, лек!» Да весыже лектын (Иоаннын 11:43, 44). Лазарь угыч илаш тӱҥалын! Шоналтыза гына, Лазарьын йолташ ден родыжо-влак тидлан мыняр чот куаненыт!

3. Колышо еҥ-влак шотышто могай ӱшан уло?

Библийын сӧрымыжӧ почеш еҥ-влак «колымаш гыч ылыжыт» (Апост. пашашт 24:15). Кӧм Иисус ылыжтен, нуно кавашке каен огытыл (Иоаннын 3:13). Нуно тыште, мландыште, илашлан ылыжтыме лийыныт. Тидлан нуно чот куаненыт. Вашке Иисус миллиардле еҥым рай мландыште курымеш илашлан ылыжта. Тудын каласымыж дене келшышын, колышо-влак чылаштат ылыжтыме лийыт. Юмо чылаштымат шарна, сандене нунат ылыжтыме лийыт, кӧ нерген еҥ-влак уже огытат шарне (Иоаннын 5:28, 29).

 КЕЛГЫНРАК ШЫМЛЕН НАЛЗА

4. Иисус еҥ-влакым ылыжтен кертмыжым ончыктен

Шукырак пален налза, мом Иисус Лазарь йолташыжлан ыштен. Иоаннын 11:14, 38—44 лудын лекса да вашмутым пуыза:

• Лазарь чынжымак колышо лийын манын, кушеч ме палена? (39 почеламутым ончыза.)

• Кузе шонеда, Лазарь кавашке кая ыле гын, Иисус тудым мландыште илашлан пӧртылта ыле мо?

ВИДЕОРОЛИКЫМ ончалза.

5. Миллиардле еҥ ылыжеш!

Псалом 36:29 лудын лекса да вашмутым пуыза:

• Ылыжше-влак кушто илаш тӱҥалыт?

Иисус шуко еҥым ылыжта, Иеговалан служитлыше-влакым веле огыл. Апост. пашашт 24:15 лудын лекса да вашмутым пуыза:

• Колышо еҥ-влак кокла гыч те кӧн ылыжмыжым вучеда?

• Кузе ылыжмашлан ӱшан Фелисити ӱдырын ача-аважым лыпландара да нунылан умбакыжат илаш вийым пуа?

 ТӰҤ ШОНЫМАШ

Библийын сӧрымыжӧ почеш миллиардле еҥ ылыжеш. Нуно угыч илышт манын, Иегован кумылжо уло. Сандене тудо Иисуслан нуным ылыжташ вийым пуэн.

Ушештарымаш

• Иегова ден Иисус колышо еҥ-влаклан мом ыштынешт?

• Миллиардле ылыжше еҥ кушто илаш тӱҥалеш: каваште але мландыште? Умылтарыза.

• Еҥ-влак ылыжыт манын, мо тендам ӱшандара?