Semi titayokoyaj keman momikilia aksa. Yejua ika Biblia kijtoua ke mikilis kemej yeskia se aksa akin techtauelita (1 Corintios 15:​26). Itech tamachtilis 27, tionmomachtij ke Jiova kiixpolos mikilis. Sayoj ke, ¿toni kinpanos akin momikilijkejya? Itech nejin tamachtilis, tionmomachtis okse taman tein Dios kijtoua ke kichiuas, yejuatsin kichiuas maj semi miak millones oksepa nemikan para yolpakiskej nochipaya nikan taltikpak. ¡Oksepa nemiskej! Sayoj ke, ¿yekmelauj mochiuas nejon? ¿Uan nemiskej iluikak oso nikan taltikpak?

1. ¿Toni kineki kichiuas Jiova ininka akin tikintasojtaj uan momikilijkejya?

Jiova semi kineki kichiuas maj oksepa nemikan akin momikilijkejya. Job, se takat akin semi takuaujtamatia iuan Dios, senkis kimatia ke yejuatsin amo kielkauaskia keman momikiliskia uan yetoskia “itech taltekoch”. Yejua kiluij Dios: “Tejua titanotsas uan nejua nimitsnankilis” (xikonita Job 14:​13-​15).

2. ¿Keniuj tikmatij ke uelis oksepa nemiskej akin momikilijkejya?

Keman Jesús yetoya nikan taltikpak, Dios kimakak chikaualis para kichiuas maj oksepa nemikan akin momikilijkajya. Yejua ika kichiuak maj oksepa nemi se siuapil akin kipiaya 12 xiujmej uan ikonetsin se siuatsin akin amo kipiayaok itakauj (Marcos 5:​41, 42; Lucas 7:​12-​15). Ompa, no momikilij Lázaro akin kuali iuan mouikaya. Uan maski panokaya naui tonal ke momikilijka uan kipachojkaj, Jesús kichiuak maj oksepa nemi. Keman kichiuilij netataujtil Dios, Jesús sayoj monekik chikauak kijtos: “¡Lázaro, xiualkalankisa!”, “nimantsin in [...] ten mikka ya ual kalankisak”, ¡uan oksepa yoltoya! (Juan 11:​43, 44). ¿Ueli tikonnemilia keniuj yolpakkej ichankauan uan akin iniuan kuali mouikaya?

3. ¿Oksepa nemiskej akin tikintasojtaj uan momikilijkejya?

Biblia kijtoua ke “Dios kinpankixtis yoltokke nochi in ánimajme” (Hechos 24:​15). Nochin akin Jesús kichiuak maj oksepa nemikan amo yajkej iluikak (Juan 3:​13). Nochin yolpakkej oksepa nemiskej nikan taltikpak. No ijkon, Jesús amo uejkaua kichiuas maj millones oksepa nemikan para maj yolpakikan nochipaya nikan taltikpak kampa takualtsinkan yeski. Yejua kijtoj ke nochin akin yetokej itech italnamikilis Dios oksepa nemiskej, hasta akin amo akin kinelnamikiok (Juan 5:​28, 29).

 MAJ OKACHI TIMOMACHTIKAN

4. Jesús kinextij ke uelis kichiuas maj oksepa nemikan akin momikilijkejya

Xikonita okseki taman tein panok keman Jesús kichiuak maj oksepa nemi Lázaro. Xikitakan Juan 11:​14 uan 38-​44 uan ika xitajtokan nejin:

• ¿Keniuj tikmatij ke Lázaro yekmelauj momikilijka? (Xikitakan versículo 39).

• Komo Lázaro yaskia iluikak, ¿tikonnemilia ke Jesús kichiuaskia maj oksepa nemi nikan taltikpak?

Xikitakan VIDEO.

5. ¡Miakej oksepa nemiskej!

Xikitakan Salmo 37:​29 uan ika xitajtokan nejin:

• ¿Kani yetoskej nochin akin oksepa nemiskej?

Jesús amo sayoj kichiuas maj oksepa nemikan akin kiueyichiuayaj Jiova, ta no oksekin. Xikitakan Hechos 24:​15 uan ika xitajtokan nejin:

• Keman nochin oksepa nemiskej, ¿akoni tikonuelitaskia tikonitas?

• ¿Keniuj kinyolchikauani itatuan Phelicity kimatiskej ke akin momikilijkejya oksepa nemiskej?

 TEIN TIKITAKEJ

Biblia kijtoua ke millones akin momikilijkejya oksepa nemiskej. Jiova kineki maj oksepa nemikan uan kimakak chikaualis Jesús para maj kichiua.

Maj tikelnamikikan

• ¿Keniuj tikmatij ke Jiova uan Jesús kinekij maj oksepa nemikan akin momikilijkejya?

• ¿Kani yetoskej millones akin oksepa nemiskej: iluikak oso taltikpak? ¿Keyej tiontanankilia ijkon?

• ¿Keyej tikonneltoka ke oksepa nemiskej akin tikontasojta?