TLAMACHTIL 30
ToTajtsin Dios kinyolitis akinmej tikintlasojtlaj
Ijkuak ikaj ixpoliui, sapanoua timoyolkokouaj. Ikinon Biblia kijtoua mikilistli yetoskia ken akin techkokolia porque techtlajyouiltia (1 Corintios 15:26). Itech tlamachtil 27 otikitakej ayakmo ikaj ixpoliuis. Pero ¿tlen kinpanos akinmej yoixpolikej? Itech nin tlamachtil tikmatis tlen kichiuas toTajtsin Dios. Ye sapanoua miakej kinyolitis uan uelis nochipa yoltoskej. ¿Uelis oksepa tikinmitaskej? ¿Kinyolitiskej iluikak noso nikan tlaltikpak?
1. ¿Kineki Jehová kinyolitis akinmej yoixpolikej?
Kema, Jehová kineki kinyolitis akinmej yoixpolikej. Se tlakatl tlen omotokayotiaya Job uan okineltokaya toTajtsin Dios, okimatoka tla ixpoliuiskia, toTajtsin Dios amo keman kilkauaskia maski yetoskia “itech Mikakoyoktli”. Ye okilui toTajtsin Dios: “Technotsas uan ne nimitsnankilis” (xiktlajtolti Job 14:13-15).
2. ¿Ken tikmatij melauak kinyolitiskej akinmej yoixpolikej?
Ijkuak Jesús okatka nikan tlaltikpak, toTajtsin Dios okimakak chikaualistli uan ijkon okinyoliti sekimej. Jesús okiyoliti se takotsin tlen okipiaya 12 xiuitl uan noijki okiyoliti ikone se siuatl tlen ayakmo okipiaya inamik (Marcos 5:41, 42; Lucas 7:12-15). Satepan oixpoliuik se iyolikni Jesús tlen omotokayotiaya Lázaro. Pero Jesús okiyoliti maski yokipiaya naui tonal okitokakej. Ijkuakon Jesús okitlatlaujti toTajtsin Dios uan satepan chikauak okijto: “¡Lázaro, xikisa!”. “Ijkuakon okiski tlakatl tlen yoixpolika”, Lázaro oksepa oyoltoka (Juan 11:43, 44). Sapanoua oyolpakej ikniuan Lázaro uan noijki akinmej inuan omouikaya.
3. ¿Uelis oksepa tikinmitas akinmej yoixpolikej?
Biblia kijtoua “toTajtsin Dios kinyolitis akinmej yoixpolikej” (Hechos 24:15). Akinmej Jesús okinyoliti amo oyajkej iluikak (Juan 3:13). Jesús okinyoliti nikan tlaltikpak ikinon oyolpakej. Ayakmo miak poliui uan Jesús miakej kinyolitis uan nochipa chantiskej nikan tlaltikpak itech xochitlali. Jesús okijto nochtin akinmej kinmilnamiki toTajtsin Dios kinyolitis, maski sekimej amikaj kinmilnamiki (Juan 5:28, 29).
MATIMOMACHTIKAN
Matikitakan itech Biblia tleka tikijtouaj uelis oksepa kinyolitiskej akinmej yoixpolikej. Noijki tikitaskej ken techyolseuia tikmatiskej kinyolitiskej akinmej yoixpolikej.
4. Jesús okiteititi uelis kinyolitis akinmej yoixpolikej
Xikita tlen okichi Jesús ijkuak okiyoliti iyolikni tlen omotokayotiaya Lázaro. Xiktlajtoltikan Juan 11:14 uan 38-44 uan satepan xikitakan tlen namechmachtia.
-
¿Ken tikmatij Lázaro melauak oixpoliuik? (Xikitakan versículo 39).
-
Sekimej kijtouaj Lázaro oyajki iluikak ijkuak oixpoliuik tla ijkon panoskia, ¿tikneltoka Jesús oksepa kiyolitiskia nikan tlaltikpak?
5. ¡Miakej kinyolitiskej!
Xiktlajtoltikan Salmo 37:29 uan satepan xikitakan tlen namechmachtia.
-
¿Kanin chantiskej akinmej kinyolitiskej?
Jesús amo san kinyolitis akinmej okitekichiuiliayaj Jehová, noijki kinyolitis oksekimej. Xiktlajtoltikan Hechos 24:15 uan satepan xikitakan tlen namechmachtia.
-
¿Akin mitspaktiskia makiyolitikan?
Jesús amo oui kinyolitis akinmej oixpolikej, ijkon ken se teta amo oui kijxitia ikone.
6. Techyolseuia uan techyolchikaua tikmatiskej kinyolitiskej akinmej yoixpolikej
Akinmej tlajyouiaj porque yoixpoliuik ikaj akin kitlasojtlaj, moyolseuiaj ijkuak kitaj itech Biblia ken Jesús okiyoliti itakotsin Jairo. Xiktlajtoltikan tlen opanok itech Lucas 8:40-42 uan 49-56.
Ijkuak Jesús kiyolitiskia itakotsin Jairo, okilui: “Amo ximomojti uan xitlaneltoka” (xikitakan versículo 50). Tikmatokej toTajtsin Dios kinyolitis akinmej yoixpolikej. ¿Ken mitspaleuis tla...
-
... ixpoliuis akin tiktlasojtla?
-
... omitsiluijkej yitiixpoliuis?
Xikitakan VIDEO uan satepan xikitakan tlen namechmachtia.
-
¿Ken kinyolchikaua itatajuan Phelicity kimatokej toTajtsin Dios kinyolitis akinmej yoixpolikej?
SEKIMEJ KIJTOUAJ: “Amo nikneltoka toTajtsin Dios kinyolitis akinmej yoixpolikej nikan tlaltikpak”.
-
¿Tlen timokuayejyekoua tejuatsin?
-
¿Ika tlen texto uelis tikteititis toTajtsin Dios kinyolitis nikan tlaltikpak akinmej yoixpolikej?
XIKILNAMIKTO
Biblia kijtoua toTajtsin Dios miakej kinyolitis. Jehová kineki oksepa mayoltokan uan yokimakak Jesús chikaualistli para uelis kinyolitis.
Matikojpauikan
-
¿Ken tikmatij toTajtsin Dios uan Jesús kinekij kinyolitiskej akinmej yoixpolikej?
-
¿Kanin chantiskej akinmej kinyolitiskej, nikan tlaltikpak noso iluikak? ¿Tleka ijkon tikijtoua?
-
¿Tleka tikneltoka akinmej tikintlasojtla oksepa yoltoskej?
NIN NOIJKI MITSPAKTIS
Xikita tlen uelis mitspaleuis tla oixpoliuik akin tiktlasojtla.
“¿Tlen mitspaleuis tla oixpoliuik akin otiktlasojtlaya?” (¡Ma titlachixtokan!, núm. 3 2018)
¿Uelis mitspaleuis tlen kijtoua Biblia tla oixpoliuik akin tiktlasojtla?
¿Ken uelis tikyolseuis se konetl tla oixpoliuik akin kitlasojtla?
¿Ikaj kiyolitiskej iluikak? ¿Ikaj amo kiyolitiskej?
“¿Ken kinyolitis toTajtsin Dios akinmej yoixpolikej?” (Nin tlamachtil kajki itech jw.org/ncx)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
