LECCIÓN 30
¡Mofamiliaj wan moamigojmej wel isaskej seuʼ biáj!
Kua̱ ágaj miki pux ticho̱kaj wan tiyo̱lkualoj. Inó̱n iga la Biblia kijtowa iga mikilis yawi se̱ enemigo (1 Corintios 15:26). Pan la lección 27, timomachtij iga Jehová yawi kitamiti inó̱n enemigo. ¿Pero te̱ pano̱s wan yej mikikejya? Pan iní̱n lección, ma̱j tikye̱ʼojasis seuʼ tejté̱ yej Jehová kijtowa iga kichi̱was: yawi kixiti̱ti millones de personas yej miktokej iga mayo̱lpa̱kikan iga nochipa wan nike̱man mikiskej. ¡Isaskej seuʼ biáj! ¿Wel mochi̱was inó̱n? ¿Isaskej pan el cielo, o nigaj pan Ta̱jli?
1. ¿Te̱ kichi̱wasneki Jehová iga las personas yej miktokej?
Jehová kinektoʼ makixiti yej miktokej. Job, se̱ ta̱gaʼ yej pux kipiaya fe, kimatiá iga Dios akelka̱waya kua̱ yéj mamiki wan maono «pan la Tumba». Yéj kijlij Dios: «Téj tine̱no̱tsas wan nej no̱ nimitsno̱tsas» (xiktajto̱lti Job 14:13-15).
2. ¿Kén tikmatij iga yej miktokej wel isaskej seuʼ biáj?
Kua̱ Jesús onoya nigaj pan Ta̱jli, Dios kimaʼ poder iga wel makixiti yej miktokej. Inó̱n iga Jesús kixitij se̱ taolintsi̱n yej kipiaya 12 años wan no̱ ipiltsi̱n se̱ viuda (Marcos 5:41, 42; Lucas 7:12-15). De ompa iamigoj Lázaro miguiʼ. Wan aunke panojkaya cuatro días iga miguiʼ, Jesús wel kixitij. Kua̱ tamiʼ tajtoj wan Dios, tachaʼ kan tokto̱ya Lázaro wan kijtoj: «¡Lázaro, xiki̱sa ompa!». Wan «Lázaro yej miktoyay, ki̱saʼ», ¡isaʼ seuʼ biáj! (Juan 11:43, 44). ¿Kén momachi̱lijkej ifamiliaj Lázaro wan iamigojwan?
3. ¿Wel isaskej seuʼ biáj mofamiliaj wan moamigojmej yej mikikejya?
La Biblia kijtowa iga «Dios yawi ki-ojpa-ixiti̱tij yej miktokej» (Hechos 24:15). Yej Jesús kixitij ikia ayá̱ yajkij al cielo (Juan 3:13). Nochimej yo̱lpa̱kikej iga isakej seuʼ biáj nigaj pan Ta̱jli. Wan áchisan poliwi iga Jesús yawi kixiti̱ti miles de millones de personas yej miktokej iga mayo̱lpa̱kikan iga nochipa pan Monsajta̱jli. Jesús kijtoj iga nochi yej Dios kejla̱ntoʼ, isaskej seuʼ biáj, aunke sekin ni-ágajo kejla̱ntokej (Juan 5:28, 29, TNM, nota).
MATIMOMACHTI̱KAN MA̱J DE INÍ̱N TEMA
Matikitakan te̱ kine̱xtiá iga yej miktokej wel isaskej seuʼ biáj wan iga yej kijtowa la Biblia yawi mochi̱wati. Wan no̱ matikitakan ken inó̱n te̱yo̱ltaliá wan te̱maka esperanza.
4. Jesús kine̱xtij iga wel kixitiá yej miktokej
Xikita te̱ má̱j kichij Jesús iga iyamigoj Lázaro. Xiktajto̱ltikan Juan 11:14 wan 38-44, wan xitajto̱kan de iní̱n:
-
¿Kén tikmatij iga Lázaro miktoya? (Xikitakan el versículo 39).
-
Si katka Lázaro yajka al cielo, ¿ticre̱rowa iga yajki ye̱kti iga Jesús makiwajliga sej nigaj pan Ta̱jli?
5. ¡Komatimej isaskej seuʼ biáj!
Xiktajto̱ltikan Salmo 37:29, wan xitajto̱kan de iní̱n:
-
¿Ka̱n mocha̱nti̱skej los miles de millones de personas yej isaskej seuʼ biáj?
Jesús aya̱san kixitis yej tekipanowa̱yaj iga Jehová; kixitis no̱ seuʼmej personas. Xiktajto̱ltikan Hechos 24:15, wan xitajto̱kan de iní̱n:
-
¿A̱ʼ yéj tiknekiá xikita iga maisa seuʼ biáj?
Xitajla̱miki pan iní̱n: Iga Jesús makixiti yej miktokej yawi pux fácil ken kua̱ se̱ te̱taj kixitiá ipiltsi̱n yej kochtoʼ.
6. Te̱yo̱ltaliá wan te̱maka esperanza iga tikmatij iga isaskej yej miktokej
Komatimej kiyo̱lta̱lijkej yej panoj wan itaochin Jairo yej moijtowa pan la Biblia. Xiktajto̱ltikan yej panoj inó̱n biáj pan Lucas 8:40-42 wan 49-56.
Achto iga Jesús makixiti itaochin Jairo, yéj kijlij: «Amo ximajmawi, ximoconfia̱ro ipan nej» (xikitakan el versículo 50). ¿Kén wel mitspale̱wiá iga tikmati iga wel isaskej seuʼ biáj yej miktokej...
-
... kua̱ mamiki ágaj de mofamiliaj o moamigojwan?
-
... kua̱ mo-vida onoʼ en peligro?
Xikitakan el VIDEO, wan xitajto̱kan de iní̱n:
-
¿Kén kiyo̱lta̱lijkej itajmej Phelicity iga kimatij iga yej miktokej wel isaskej seu biáj?
YEJ SEKIN KIJTOWAJ: «Awel nicre̱rowa iga yej miktokej mai̱sakan seuʼ biáj nigaj pan Ta̱jli».
-
¿Te̱ tikijtowa téj?
-
¿Katiapa texto bíblico wel mitspale̱wiá iga xikne̱xti iga yej miktokej wel isaskej seuʼ biáj nigaj pan Ta̱jli?
TE̱ TIMOMACHTIJ
La Biblia kijtowa iga miles de millones yej miktokej isaskej seuʼ biáj. Jehová kinektoʼ makixiti yej miktokej wan kimaʼ poder Jesús iga wel makixiti yej miktokej.
Matikejla̱mikikan te̱ timomachtijkej
-
¿Kén tikmatij iga Jehová wan Jesús kinektokej makixitikan yej miktokej?
-
¿Ka̱n mocha̱nti̱skej los miles de millones de personas yej isaskej: pan el cielo, o nigaj pan Ta̱jli? ¿Té íga ijkó̱n tikijtowa?
-
¿Té íga tonoʼ seguro iga mofamiliaj wan amigojwan wel isaskej seu’ biáj?
XIKMATI MA̱J
Xiktajto̱lti sekin tejté̱ yej wel mitspale̱wiá kua̱ miki ágaj yej pux tiknekiá.
«Ayuda para quienes están de duelo» (¡Despertad!, núm. 3 2018)
¿Wel mitspale̱wiá la Biblia kua̱ miki ágaj yej pux tiknekiá?
Xikita kén wel tikpale̱wiá ko̱kone̱tsitsin kua̱ miki ágaj yej pux kinekiáj.
¿Isas ágaj pan el cielo? ¿Isaskej nochimej yej miktokej?
«¿Kén ya̱ti kua̱ Dios kixitis yej miktokej?» (Artículo de jw.org)
