FAKAAKOAGA 30
To Liu e Tau Fakahele Haau ke Momoui!
Kua fakatupu he mate e maanu mo e momoko lahi. Kakano ia ati fakahigoa he Tohi Tapu e mate ko e fī. (1 Korinito 15:26) He Fakaakoaga 27, ne iloa e koe to utakehe e Iehova e fī ia. Ka ko e heigoa ka tupu ke he tau tagata ne fitā he mamate? He fakaakoaga nei, to iloa foki e koe e taha maveheaga ofoofogia ha Iehova, to liu fakamomoui e ia e tau tagata tokologa ke moua e moui tukulagi. To fakaliu tutū mai e ia a lautolu! Maeke mooli nakai e mena ia ke tupu? To fakaliu tu mai kia a lautolu ke momoui he lagi po ke lalolagi?
1. Ko e heigoa ha Iehova ne manako ke taute ma e tau fakahele ha tautolu ne mamate?
Manako a Iehova ke liu fakamomoui e tau tagata ne kua mamate. Ko e tagata fakamooli ko Iopu ne mauokafua to nakai nimo he Atua a ia ka mate. Pehē a ia ke he Atua: “Kia ui mai a koe, ti tali atu au kia koe [mai he Tukuaga].”—Totou Iopu 14:13-15.
2. Iloa fēfē e tautolu to fakaliu tu mai a lautolu ne kua mamate?
He nofo a Iesu he lalolagi, foaki age he Atua e malolō ki a ia ke fakaliu tu mai e tau tagata. Liu a Iesu fakamoui e tama fifine ne 12 e tau he moui mo e tama taane he fifine takape. (Mareko 5:41, 42; Luka 7:12-15) Fakamui, mate e kapitiga ha Iesu ko Lasalo. Pete he mate a Lasalo ti tanu ke fā e aho, liu a Iesu fakamoui a ia. Mole e liogi ha Iesu ke he Atua, ne ui fakaleo lahi e ia ke he tukuaga: “Lasalo na e, ati hau a ki fafo.” Ti “fano ai ki fafo a ia ne mate,” kua moui tuai a Lasalo! (Ioane 11:43, 44) Manamanatu ke he fiafia he magafaoa mo e tau kapitiga ha Lasalo!
3. Ko e heigoa e amaamanakiaga ma e tau fakahele haau ne kua mamate?
Mavehe he Tohi Tapu: “[To] liu foki tutu mai a lautolu kua mamate.” (Gahua 24:15) Ko lautolu ne fakaliu tu mai e Iesu he nofo a ia he lalolagi, kua nakai o atu ke he lagi. (Ioane 3:13) Fiafia a lautolu he liu momoui ke he lalolagi nei. Pihia foki, to nakai leva ti fakaliu tu mai e Iesu e tau tagata tokologa ke momoui tukulagi he lalolagi parataiso. Pehē a ia ko lautolu oti ne manatu he Atua to fakaliu tutū mai pete kua nakai fai tagata ne manatu a lautolu.—Ioane 5:28, 29.
KUMIKUMI FAKAHOKULO
Kumikumi ke he fakamooliaga he Tohi Tapu na maeke mo e to fakaliu tu mai a lautolu ne kua mamate. Fakaako ke he puhala kua maeke e fakaliu tu mai ke fakamafana a koe mo e fai amaamanakiaga.
4. Fakakite e Iesu na maeke a ia ke fakaliu tu mai a lautolu ne kua mamate
Fakaako atu foki ke he mena ne taute e Iesu ma e kapitiga haana ko Lasalo. Totou Ioane 11:14, 38-44, ti tutala ke he tau hūhū nei:
-
Iloa fēfē e tautolu na mate mooli a Lasalo?—Kikite e kupu 39.
-
Ane mai hake a Lasalo ke he lagi, manatu kia a koe to liuaki mai e Iesu a ia ke moui he lalolagi?
5. Tokologa ka fakaliu tu mai!
Totou Salamo 37:29, ti tutala ke he hūhū nei:
-
To nonofo i fe e tau tagata totou piliona ka fakaliu tutū mai?
To tokologa atu foki ka fakaliu tu mai e Iesu, nakai ko lautolu ni ne tapuaki ki a Iehova. Totou Gahua 24:15, ti tutala ke he hūhū nei:
-
Ko hai haau ne manako ke kitia ka fakaliu tu mai?
Manamanatu: Maeke a Iesu ke fakaliu tu mai taha tagata tuga e matua taane kua mukamuka ke fafagu e tama he mohe
6. Maeke e fakaliu tu mai ke fakamafana a koe mo e fai amaamanakiaga
Ko e tala he Tohi Tapu ke he tama fifine ha Iairo ne mafanatia mo e atihake e tokologa ne maanu. Totou e tala mooli ia he Luka 8:40-42, 49-56.
Ato fakaliu tu mai e Iesu e tama fifine ha Iairo, ne tala age a ia ke he matua taane he tama fifine: “Ua matakutaku a koe; kia tua a koe kuenaia.” (Kikite e kupu 50.) To lagomatai fēfē e amaamanakiaga he fakaliu tu mai ki a koe . . .
-
ka mate e fakahele?
-
ka tū hagahagakelea e moui haau?
Tā e VITIŌ, ti tutala ke he hūhū nā.
-
Fakamafana mo e fakamalolō fēfē he amaamanakiaga he liu tu mai e tau matua ha Phelicity?
PEHĒ FALU TAGATA: “Kua uka ke talitonu to fakaliu tu mai e tau tagata ne kua mamate.”
-
Fēfē e manatu haau?
-
Ko e heigoa e kupu Tohi Tapu ka fakaaoga e koe ke fakakite to fai fakaliu tu mai?
MANATU KATOA
Mavehe mai he Tohi Tapu ko e tau piliona tagata ne kua mamate to fakaliu tu mai. Manako a Iehova ke liu a lautolu ke momoui, ti tuku age e ia ki a Iesu e malolō ke fakaliu tu mai a lautolu.
Liu Fakamanatu
-
Fēfē e logonaaga ha Iehova mo Iesu ke liu fakamomoui a lautolu ne kua mamate?
-
To nonofo i fe e tau piliona tagata ka fakaliu tu mai—he lagi po ke lalolagi? Ko e ha ne talahau pihia a koe?
-
Ko e heigoa ati mauokafua a koe to liu e tau fakahele haau ke momoui?
KUMI FOKI
Fakaako ke he tau lakaaga aoga ma haau ke fahia ke he maanu.
Maeke mooli kia e tau matapatu fakaakoaga he Tohi Tapu ke lagomatai e tagata kua maanu?
Maeke fēfē e tau fanau ke fahia ka mate e fakahele?
To fai tagata nakai ka fakaliu tu mai ke he lagi? Ko hai ka nakai fakaliu tu mai?