Gning kwé mbwo pégé péʼé, pégé pou mmʉôgté tèʼ. Aa yèe ta Biible gôôn ngié légwé aa ngang mbou (1 Korénto 15:26). Pégé kaa tsèe two léziʼi 27, njouʼ ngié Jéova gé gʉo piaga légwé. A gé ping gʉo lékô nti pʉa pié po la laʼ nkwété? A gé wo na sôôn léziʼi, o ying nkuiʼi nziʼi ménkaʼa mié é pou si tèʼ, émié é gnia paʼ Jéova gé gʉo ying naa léwô mbwo mémiléyaa pʉa pié po la kwété. A gé gʉo zimé wôb! Ta aa kouaʼ no nénʉ? Mépfo gé gʉo zimé tʉo lépwo ka ndoumo ssé tsétsaʼ?

1. Jéova né nkouŋo lé gʉo lékô nti pʉa pégé pié é la kwété?

Jéova né suièté lé zim mépfo. Tsoo gning wuié a la gwiée zuiŋé ntʉm a gouʼ tèʼ, mé toŋo yé lé Job, la né nzsé ngié ngouo Ssé lé laʼ ndégé yé wô, paʼ a lôôn nkwé. A la gôôn mbwo Ssé ngié: «O gé gʉo toŋo wôôn, méng zuiŋé [tsèe lési]» (toŋo Job 14:13-15).

2. Pégé gʉo lékô ta nzsé ngié mépfo gé laʼa lièeʼ ping ta ying wo wo?

Fʉʼ yié Yéeso laa ndoumo ssé tsétsaʼ, Ssé naa pawa mbwo yé lé zim mépfo. Yéeso la zimé tsoo mouô manzuiée a gwiée ngouʼ 12, po ming tso mpfôg manzuiée (Malékousé 5:41, 42; Loukasé 7:12-15). Tam la gʉo ntchʉa atsoo chou Yéeso wuié mé toŋo yé ngié Naazalo gʉo nkwé. Ta mboo paʼ Naazalo la kwé mé touŋo yé a gʉo lièʼ lékoua, Yéeso la zimé yé na légwé. Yéeso la gʉo préya mbwo Ssé, ndôgô nghié ntétʉ ntoŋo ntchwo lési ngié: «Naazalo, kuiè né pii!» «Ampfo kuiè» ngouo wo! (Jang 11:43, 44). Naʼ kouangté lékag wuié méchouou Naazalo laa tsiŋé nda yôb la gwiée!

3. Aa kô yié o né nzuiʼté nti méfa pou pié é la kwété?

Biible gôôn ngié: «Ssé gé laʼ zim mépfo» (Mégang ntoum 24:15). Pʉa pié Yéeso la zim la té gʉa né tʉoo lépwo fʉʼ yié po la kwé wô (Jang 3:13). Po la gwiée lékag lé ying ntsuié ndoumo ssé tsétsaʼ. Ndésém pouʼou, Yéeso gé gʉo zim mémiléyông pʉa pié é la kwété ta po gwiée lékag lé laʼ nzôgô ntsuié ndoumo ssé tsétsaʼ tsèe paladisé. A la gôôn ngié «mépfo ssé ntsém pié é nouŋé tsèe mési» gé gʉo zim, mboo pʉa pié mé té ying nkimté wôb wô gé gʉo zim, nti noué poo tsèe ménkouaŋa Ssé (Jang 5:28, 29).

 YING NKUIʼI NZIʼI

4. Yéeso la gnia ngié a kouʼou lé zim mépfo

Pégé yiing nkuiʼi nziʼi mmo yié Yéeso la gʉo mbwo chou wé Naazalo. Toŋo Jang 11:14, 38-44, mbing ngôôn no na môôn ménzaté:

• Akô gniè ngié Naazalo la kouaʼ nkwé? (lié nkang 39).

• Naazalo laa péʼé nkwé ngʉa né né tʉoo lépwo, mba o kouang ngié Yéeso lôôn gé zimé yé ndoumo ssé tsétsaʼ kée?

Tsôʼô VIDÉO.

5. Pʉa ta ngiôôn gé gʉo zimé na légwé!

Toŋo Zôbô ntsé 37:29, mbing ngôôn no na yôôn nzaté:

• Pʉa pié po gé gʉo zimé na légwé gé laʼ tsuié nzôô?

Yéeso té gʉo zim po ndaʼ pʉa pié po lôôn ngouʼté Jéova wô. Toŋo Mégang ntoum 24:15, mbing ngôôn no na yôôn nzaté:

• O né ntsôôn lé ngia wô wuié a gé gʉo zimé na légwé?

• Lénéŋé né nzuiʼté lézimé na légwé la suiété létʉm méta Félicity mbing nkuingté wôb lékô?

 TA O ZIʼII KÔ?

Biible gôôn ngié mémiléyaa pʉa gé gʉo zimé na légwé. Jéova né suièté lé ying nnaa wôb léwô, a la ping nnaa pawa mbwo Yéeso lé zim mépfo.

Ta o né nkimté?

• Jéova po Yéeso kouaŋa lé zim mépfo péʼé, njouʼ lékô?

• Mémiléyaa pʉa pié po gé gʉo zimé na légwé gé gʉo tsuié nzôô? Atʉo lépwo ka ndoumo ssé tsétsaʼ? O gôôn pouʼou nti kô?

• Nti kô o kouaʼ nzuing té mʉʼté ngié pʉa pou pié o kouŋo wôb pié é la kwété gé gʉo zimé na légwé?