PFUNZIRO 30
Wanthu Omwe Mumbawafuna Omwe Adafa An’dzakhala Pomwe na Moyo.
Kufedwa kumbawawa kwene-kwene. Ndipopa Bibliya limbacemera infa kuti nyamadulanthaka. (1 Akolinto 15:26) Mu pfunziro 27 tidapfunza kuti Yahova an’dzakunda nyamadulanthaka umweyu. Tsono n’ciyani cin’dzacitika kuna wanthu wale omwe adafa kale? Mu pfunziro lino mun’pfunza bzinthu bzinango bzabwino bzomwe Yahova an’dzacita kutsogoloku bzomwe ni kulamusa wanthu azinji kwene-kwene omwe adafa kuti akhale pomwe na moyo pa dziko la pantsi mpaka kale-kale. Kodi bzin’dzacitikadi? Kodi wanthu omwe an’dzalamusidwawo, an’dzalamusidwa kuti akakhale kudzulu ayai pa dziko la pantsi pano?
1. Kodi Yahova an’funa kucitira ciyani wanthu omwe adafa?
Yahova akufunisisa kupasa pomwe moyo wanthu omwe adafa. Munthu wakukhulupirika wakucemeredwa Djobi akhana citsimikizo cakuti Mulungu angadadzamuyebwa lini akadzafa. Iye adati kwa Mulungu: “Mun’dzandicemera ndipo ine ndin’dzatawira [kucokera ku thenje].” — Werengani Djobi 14:13-15.
2. Kodi timbadziwa tani kuti anyakufa an’dzalamusidwa?
Pomwe Jezu akhali pa dziko la pantsi pano, Mulungu adamupasa mphanvu yakulamusa anyakufa. Jezu adalamusa kamtsikana ka magole 12 na mwana wacimuna wa mkazi mamsiwa. (Marko 5:41, 42; Luka 7:12-15) Patsogolo pace xamwali wace wa Jezu Lazaro adasaika. Napo kuti Lazaro akhali kale m’thenje kwa ntsiku zinai, tsono Jezu adamulamusa acikhala pomwe na moyo. Pomwe adamala kucita mpembo Jezu adakuwa aciti: “Lazaro bula!” Ndipo “munthu omwe akhadafayo adabula” na moyo. (Juwau 11:43, 44) Ndokumbukirani momwe adzinza na axamwali wa Lazaro adakondwera!
3.Kodi ni cidikhiro ciponi comwe anaco wanthu omwe adafa?
Bibliya limbalewa kuti: “Kun’dzakhala kumuka kwa anyakufa.” (Mabasa 24:15) Wanthu omwe Jezu adawalamusa pomwe iye akhali pa dziko la pantsi pano alibe kuyenda kudzulu. (Juwau 3:13) Iye adawalamusira pa dziko la pantsi pano ndipo anyakulamusidwawo adakomedwa na bzimwebzo. Tsapanopapa, Jezu an’dzalamusa pomwe wanthu azinji kuti adzakhale na moyo wakusaya kumala m’paraizo pa dziko la pantsi pano. Iye adalewa kuti “wentse omwe ali m’thenje” napo wale omwe adayebwedwa na wanthu, Yahova akuwakumbukira ndipo an’dzawalamusa.— Juwau 5:28, 29.
FUFUDZANI BZINANGO
Onani umboni bomwe bukulatiza kuti anyakufa an’dzalamusidwa. Ndipo onanimbo momwe nkhani imweyi ingakutsangalazireni na kukupasani cidikhiro.
4. Jezu adalatiza kuti angamuse anyakufa
Pfunzani bzizinji bzomwe Jezu adacitira xamwali wace Lazaro. Werengani Juwau 11:14, 38-44, ndipo mukamala cezeranani mibvunzo ikutewerayi:
-
Kodi timbadziwa tani kuti Lazaro akhadafadi? — Onani vesi 39.
-
Bzingadakhala kuti Lazaro akhadayenda kudzulu, mukukumbuka kuti Jezu angadamucosa kudzuluko acimulamusa kuti akhale pomwe na moyo pa dziko la pantsi pano?
5. Wanthu azinji an’dzalamusidwa!
Werengani Salimo 37:29, ndipo mukamala cezeranani mbvunzo wakutewerayu:
-
Kodi wanthu azinji omwe an’dzalamusidwa an’dzakhala kuponi?
Wanthu omwe Jezu an’dzawalamusa an’dzakhala azinji kuposa wanthu omwe akutumikira Yahova ntsiku zino. Werengani Mabasa 24:15, ndipo mukamala cezeranani mbvunzo wakutewerayu:
-
Kodi wanthu akadzalamusidwa mbani omwe imwepo mun’funa kudzamuwona?
Kumbukirani ibzi: Ninga momwe pai ambalamusira mwakusaya kunesa mwana wace omwe adagona, Jezu an’dzalamusambo mwakusaya kunesa wanthu omwe adafa
6. Nkhani ya kulamusidwa kwa anyakufa ingakutsangalazeni na kukupasani cidikhiro
Nkhani ya m’Bibliya yakulewa bza kulamusidwa kwa mwana wacikazi wa Jairo imbatsangalaza na kulimbikisa wanthu azinji omwe afedwa. Werengani nkhani yomwe idacitikayi pa Luka 8:40-42, 49-56.
Pomwe akanati kulamusa mwana wacikazi wa Jairo, Jezu adauza Jairoyo kuti: “Leka kugopa, ndokhala na cikhulupiro basi.” (Onani vesi 50.) Kodi cidikhiro cakuti anyakufa an’dzalamusidwa cingakuthandizeni tani . . .
-
pomwe munthu omwe mumbamufuna wafa?
-
pomwe moyo wanu uli pa ngozi?
Onani VIDIYO, ndipo mukamala cezeranani mbvunzo wakutewerayu.
-
Kodi nkhani yakuti anyakufa an’dzalamusidwa idalimbikisa tani na kutsangalaza abereki wa Felisiti?
WANTHU WINANGO AMBALEWA KUTI: “Mpsakunesa kukhulupira kuti anyakufa angadzakhale pomwe na moyo.”
-
Kodi munti tani?
-
Kodi ni cinembo ciponi comwe mungaciphatise basa kuti mulatize kuti anyakufa an’dzalamusidwadi?
KODI MWAPFUNZA CIYANI?
Bibliya limbalewa kuti wanthu azinji omwe adafa an’dzalamusidwa. Yahova an’funa kuti iwo adzakhale pomwe na moyo, ndipopa adapasa Jezu mphanvu ya kulamusa wanthuwo.
Mibvunzo yakubwerezera
-
Kodi Yahova na Jezu ambabva tani pa nkhani ya kulamusa wanthu omwe adafa?
-
Kodi wanthu azinji omwe an’dzalamusidwa an’dzakhala kudzulu ayai pa dziko la pantsi pano? Thangwe ranyi mukulewa tenepo?
-
Kodi n’ciyani comwe cimbakutsimikizirani kuti wanthu omwe mumbawafuna omwe adafa an’dzakhala pomwe na moyo?
ONANI POMWE IBZI
Onani bzinthu bzomwe mungacite mukakhala mudasunama thangwe ra kufedwa.
Kodi mitemo ya m’Bibliya ingathandizedi munthu omwe adasunama?
Kodi n’ciyani comwe cingathandize wana akafedwa munthu omwe ambamufuna?
Kodi alipo omwe an’dzalamusidwa kuti akakhale kudzulu? Mbani omwe an’dzalamusidwa lini?
“Kodi Mafala Yakuti Kumuka kwa Anyakufa Yambathandauza Ciyani?” (Nkhani ya pa jw.org)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
