Ora tu nꞌa mä amigohu̱ o nꞌa mä familiahu̱, bi hänkägihu̱ ndunthi rä dumu̱i. Po rängeꞌä rä Biblia enä ge rä du näꞌä nꞌa mä nkontrahu̱ (1 Corintios 15:26). Ha rä lección 27 dä pädihu̱ ge rä Zi Dada Jeoba ma dä hñäki rä du, pa njabu̱ yä jäꞌi ya nunka dä du. Pe, ¿te ma dä thogi ko nuꞌu̱ yä zi jäꞌi ya xä du? Ha nunä lección ma gä pädihu̱ mä nꞌa rä promesa näꞌä xä ja rä Zi Dada Jeoba: ¡Näꞌä ma dä gu̱tsꞌi nuꞌu̱ yä miyontho yä jäꞌi xä du pa dä mꞌu̱i pa nzäntho! ¿Xa mäjuäni ma dä thogi njabu̱? ¿Xi habu̱ ma dä mꞌu̱i nuꞌu̱ ma dä nangi de rä du: Ha mähetsꞌi o ha rä Xiꞌmhai?

1. ¿Te ne dä me̱fi rä Zi Dada Jeoba po nuꞌu̱ yä jäꞌi xä du?

Rä Zi Dada Jeoba ne dä gu̱tsꞌi nuꞌu̱ xä du pa dä mꞌu̱i mänꞌaki. Mäyaꞌmu̱ nꞌa rä zi ñꞌo̱ho̱ mrä thuhu Job, mi pädi xä ñho ge Äjuä ma dä beni ꞌne ma dä gu̱tsꞌi de rä du. Näꞌä bi ꞌñembäbi Äjuä: «Nuꞌi ma gi nzokägi, ꞌne nuga ma gä thädi» (hñeti Job 14:13-15).

2. ¿Hanja di pädihu̱ ge nuꞌu̱ xä du, xa mäjuäni ma dä nuhu mänꞌaki?

Nuꞌmu̱ rä Hesu bi mꞌu̱kua ha rä Xiꞌmhai, rä Zi Dada Jeoba bi umbäbi rä tsꞌe̱di pa bi gu̱tsꞌi rꞌa yä jäꞌi de rä du. Por ejemplo, bi gu̱tsꞌi de rä du nꞌa rä zi nxutsi näꞌä mi pe̱ꞌtsi 12 nje̱ya (Marcos 5:41, 42). ꞌNehe, rä Biblia pede ge rä Hesu bi gu̱tsꞌi de rä du rä tꞌu̱ nꞌa rä zi biuda (Lucas 7:12-15). Nꞌa rä pa, ꞌnehe bi du nꞌa rä amigo rä Hesu näꞌä mrä thuhu Lázaro. Mäske ya mi o̱tꞌe goho mä pa de xki du ꞌne xki tꞌagi Lázaro, rä Hesu bi gu̱tsꞌi de rä du. Rä Hesu mꞌe̱tꞌo bi xatuäbi Äjuä, ꞌnepu̱ bi ꞌñenä: «¡Lázaro, guä po̱ni!». Nubye̱, «Lázaro ꞌmestho bä po̱ni» (Juan 11:43, 44). ¿Dä za gi imäjinä hängu bi johya rä familia ꞌne yä amigo Lázaro ora bi hyandi ge bi bo̱ni de rä ntꞌagi?

3. ¿Te ma dä thogi ko nuꞌu̱ ri familia ꞌne nuꞌu̱ ri amigo xä du?

Rä Biblia di promete ge «ma dä nangi» nuꞌu̱ xä du (Hechos 24:15, TNM). ¿Gi kamfri ge nuꞌu̱ yä zi jäꞌi bi gu̱tsꞌi rä Hesu de rä du, ya xki ma ha mähetsꞌi, ꞌnepu̱ bä tsii mänꞌaki nuua ha rä Xiꞌmhai? ¡Hinä! (Juan 3:13). Hänge mi nuhu nuꞌu̱ yä zi jäꞌi de rä du, xa bi johya bi mꞌu̱kua mänꞌaki ha rä Xiꞌmhai. Ha näꞌä tiempoꞌä, rä Hesu bi gu̱tsꞌi de rä du ho̱nse̱ nꞌa hängutho yä jäꞌi. Pe mänꞌitꞌho, ma dä gu̱tsꞌi yä miyontho nuꞌu̱ yä jäꞌi xä du pa dä mꞌu̱i mänꞌaki nuua ha rä Xiꞌmhai. Rä Hesu bi ꞌñenä ge «nuꞌu̱ o ha yä ntꞌagi ꞌne ꞌmu̱i ha rä mfeni Äjuä» ma dä nangi de rä du (Juan 5:28, 29, TNM). Ndunthi de nuꞌu̱ yä zi jäꞌi xä du, ya hinto beni. Pe nuꞌu̱ ꞌmu̱i ha rä mfeni Äjuä ꞌne ma dä nangi mänꞌaki pa dä ꞌmu̱i ha rä Xiꞌmhai.

 HANJA DÄ ZA DÄ MAXꞌÄꞌI RÄ NOYA ÄJUÄ

4. Rä Hesu bi ꞌñudi ge pe̱ꞌtsi rä tsꞌe̱di pa dä gu̱tsꞌi nuꞌu̱ xä du

Ma gä pädihu̱ mä nꞌa tu̱i te bi me̱fi rä Hesu po näꞌä rä amigo mrä thuhu Lázaro. Hñetihu̱ Juan 11:14, 38-44, ꞌnepu̱ thädihu̱ nuya yä ntꞌani:

• ¿Hanja di pädihu̱ ge Lázaro mäjuäni xki du? (Hyandihu̱ mänꞌaki rä versículo 39).

• Ndunthi yä jäꞌi kamfri ge gatꞌho nuꞌu̱ yä jäꞌi tu, pa ha mähetsꞌi. Pe mu̱ Lázaro ya xki ma ha mähetsꞌi, ¿gi kamfri ge rä Hesu ma xä goꞌtsi de gehni?

Yꞌe̱tsꞌihu̱ rä BIDEO.

5. ¡Xi ndunthi yä jäꞌi ma dä nuhu de rä du!

Hñetihu̱ Salmo 37:29, ꞌnepu̱ thädihu̱ nunä rä ntꞌani:

• ¿Habu̱ ma dä mꞌu̱i nuꞌu̱ yä miyontho yä jäꞌi ma dä nuhu de rä du?

Rä Hesu hingä ho̱nse̱ ma dä gu̱tsꞌi de rä du nuꞌu̱ yä jäꞌi bi bädi ꞌne bi me̱päbi rä Zi Dada Jeoba. ꞌNehe ma dä gu̱tsꞌi nuꞌu̱ himbi bädi te udi rä Noya Äjuä. Hñetihu̱ Hechos 24:15, TNM, ꞌnepu̱ thädihu̱ nunä rä ntꞌani:

• ¿Toꞌo gi hohmä dä nuhu de rä du pa gi hyandi mänꞌaki?

• ¿Hanja xä matsꞌi rä dada ꞌne rä nänä Phelicity dä bädi ge rä Zi Dada Jeoba ma dä gu̱tsꞌi nuꞌu̱ yä jäꞌi xä du?

 NÄꞌÄ DÄ PÄDIHU̱

Rä Biblia udi ge yä miyontho nuꞌu̱ yä jäꞌi ma dä nuhu de rä du. Rä Zi Dada Jeoba xa ne dä gu̱tsꞌi nuꞌu̱ xä du, ꞌne näꞌä xä umbäbi rä tsꞌe̱di rä Hesu pa go dä nkargoꞌä dä gu̱tsꞌi nuꞌu̱ yä zi jäꞌi xä du.

Pa gä benihu̱

• ¿Hanja di pädihu̱ ge rä Zi Dada Jeoba ꞌne rä Hesu xa ne dä gu̱tsꞌi nuꞌu̱ yä zi jäꞌi xä ñꞌähä ha rä du?

• ¿Habu̱ ma dä mꞌu̱i nuꞌu̱ yä miyontho yä jäꞌi ma dä nuhu de rä du: Ha mähetsꞌi o ha rä Xiꞌmhai? ¿Por hanja gi kamfri njabu̱?

• ¿Te jaꞌi gi mꞌu̱i kombensido ge nuꞌu̱ ri zi jäꞌi xä du, ma dä nuhu mänꞌaki?