Morto ta causa hopi tristeza y dolor. Pesey, Bijbel ta yama morto un enemigo. (1 Corintionan 15:26) Den les 27, bo a siña cu Jehova lo caba cu e enemigo ey. Pero kico lo pasa cu hende cu a muri caba? Den e les aki, lo bo siña tocante un otro bunita promesa di Jehova. Jehova lo lanta miles di miyones di hende for di morto pa nan por disfruta di bida pa semper. Si, e lo resucita nan! Esey por sosode di berdad? Jehova lo resucita nan pa biba den cielo of riba Tera?

1. Kico Jehova kier haci pa nos sernan keri cu a muri?

Jehova ta anhela pa lanta hende cu a muri for di morto. Job, un homber cu tabatin hopi fe, tabata sa sigur cu Dios lo no lubid’e ora cu e muri. El a bisa Dios: “Lo bo yama, y lo mi contesta bo [for di den Graf].”—Lesa Job 14:13-15.

2. Con nos por sa cu Jehova por resucita hende cu a muri?

Ora Hesus tabata riba Tera, Dios a dun’e poder pa resucita hende. Hesus a lanta un mucha muher di 12 aña y e yiu homber di un viuda for di morto. (Marco 5:41, 42; Lucas 7:12-15) Despues, Hesus su amigo Lazaro a muri. Aunke Lazaro tabatin cuater dia morto y a ser dera, toch Hesus a lant’e for di morto. Hesus a haci oracion na Dios y bisa: “Lazaro, bin pafo!” Anto “e homber cu tabata morto a bin pafo.” Lazaro a biba atrobe. (Juan 11:43, 44) Imagina bo con contento Lazaro su famia y amigonan tabata!

3. Bo sernan keri cu a muri lo bolbe biba?

Bijbel ta priminti: “Lo bay tin un resureccion.” (Echonan 24:15) E hendenan cu Hesus a resucita ora e tabata riba Tera no a bay cielo. (Juan 3:13) Ora Hesus a lanta nan for di morto, nan tabata contento cu nan por a sigui biba aki riba Tera. Di mes manera, pronto Hesus lo resucita miles di miyones di hende pa disfruta di bida pa semper den Paradijs riba Tera. El a bisa cu tur hende cu ta den Dios su memoria lo ser resucita, hasta esnan cu kisas niun hende no ta corda mas.—Juan 5:28, 29.

 KICO MAS NOS POR SIÑA?

4. Hesus a demostra cu e por resucita hende morto

Haya sa kico Hesus a haci pa su amigo Lazaro. Lesa Juan 11:14, 38-44. Despues, analisa e siguiente preguntanan:

• Con nos sa cu Lazaro tabata morto di berdad? —Wak versiculo 39.

• Si Lazaro a bay cielo, bo ta kere cu Hesus lo a sac’e for di cielo pa lag’e biba aki riba Tera?

Pasa e VIDEO.

5. Hopi hende lo ser resucita

Lesa Salmo 37:29. Despues, analisa e siguiente pregunta:

• Unda e miles di miyones di hende cu resucita lo biba?

No ta hende cu a sirbi Jehova so Hesus lo resucita. Lesa Echonan 24:15. Despues, analisa e siguiente pregunta:

• Ken abo lo tin gana di mira atrobe?

• Con e speransa di resureccion a consola y anima Phelicity su mayornan?

 RESUMEN

Bijbel ta priminti cu miles di miyones di hende cu a muri lo ser resucita. Jehova kier pa nan biba atrobe, y el a duna Hesus poder pa resucita nan.

Repaso

• Con nos por sa cu Jehova y Hesus ta anhela pa lanta hende for di morto?

• Unda e miles di miyones di hende cu resucita lo biba, den cielo of aki riba Tera? Dicon bo ta bisa esey?

• Kico ta convence abo cu bo sernan keri por biba atrobe?