Gufua guana hana lamba nu gikenene giavula. Gishina giene Biblia yana tamega gufua egi mbalagaji. (1 Kolinto 15:26) Mu Longo dia 27, tualongugile egi Yehowa mbawukatula mbalagaji yene. Uvi itshi mbayibuila athu anyi afuile gale? Mu longo edi, uza mulonguga ndaga jiavula jiatadila felela diko diabonga dia Yehowa​—mbawufuzumuna athu avula afile gale ha guheta monyo wa ivo nu ivo. Ndaga yene mbayikalegewa diago ba? Athu ene mbaafuzumuga ha gujinga mu dilu nga ha mavu?

1. Itshi Yehowa wana tshigina gutshita mukunda nu athu tuakhalele muzumba anyi afuile gale?

Yehowa udi nu nzala ya gufuzumuna athu afuile gale ha gujinga luko. Yobo wakhalele nu gutshigina gudi Nzambi, hene wakhalele musha mutshima egi Nzambi mbagashigo gumujimbila gula wafua. Wawambelele Nzambi egi: ‘Mbawungutamega, ame mbangutaya [mu Malumba].’​—Tanga Yobo 14:13-15.

2. Luholo lutshi tudi mujiya egi athu a gufua mbaafuzumuga?

Tangua Yesu wakhalele hazmavu, Nzambi wamuhanele ngolo jia gufuzumuna athu a gufua. Yesu wafuzumuine mona mukhetu wa ivo 12 nu mun’a mukhetu wa gafunda wa yala. (Mako 5:41, 42; Luka 7:12-15) Gungima, Lazalo futa dia Yesu wafuile. Ikhale Lazalo wakhalele watagenesa gale masugu nguana mu malumba, uvi Yesu wamufuzumuine. Yesu watshitshile gisambu gudi Nzambi, gungima watamegele mu dijui diakola gu khanda yakhalele malumba egi: “Lazalo, zoga!” Gungima, “muthu yonu wafile, wazogele” nu monyo! (Yone 11:43, 44) Enya fami ya Lazalo nu mafut’enji akhalele diago nu gusuanguluga!

3. Felela ditshi didi guene mukunda nu athu wakhalele muzumba anyi afuile gale?

Biblia yana zuela egi: ‘Athu mbaafuzumuga.’ (Makalegelo 24:15) Athu anyi Yesu wafuzumuine mu tangua dikulu, ayilego mu dilu. (Yone 3:13) Uvi waafuzumuine ha gujinga ha mavu; athu ene asuangulugile diago. Luholo lumoshi nji, gualeha ndo Yesu mbawufuzumuna bamilio a athu ha guheta monyo wa ivo nu ivo mu phaladiso ha mavu. Yesu wazuelele egi: “Athu agasue adi mu malumba,” Nzambi mbawaafuzumuna, ikhale tuabuitshile gale athu ene mutshima, handaga Nzambi yowu genji wana guatangiza.​—Yone 5:28, 29.

 TUKAMBE GUJIYA NDAGA JIAVULA

4. Yesu wamonesele egi wajiya gufuzumuna athu a gufua

Longuga ndaga jiavula jiatshitshile Yesu mukunda nu futa dienji Lazalo. Tanga Yone 11:14, 38-44, gungima zuelelenu mihu eyi:

• Luholo lutshi tudi mujiya egi Lazalo wafile diago?​—Tala verse 39.

• Gula Lazalo wayile mu dilu, udi mutangiza egi Yesu wakhalele naye gumufuzumuna ha gujinga luko ha mavu ba?

Tala VIDEO.

5. Athu avula mbaafuzumuga!

Tanga Ngimbo 37:29, gungima zuelelenu muhu owu:

• Bamilio a athu mbaafuzumuga mbaajinga gui?

Yesu mbagashigo mufuzumuna phamba athu anyi akhalele mukombelela Yehowa. Tanga Makalegelo 24:15, gungima zuelelenu muhu owu:

• Wana tshigina gumona nanyi mu lusugu lua gufuzumuga?

• Luholo lutshi felela dia gufuzumuga diahanele mvuaji jia Phelicity gikhesa?

 NDAGA WALONGUGA

Biblia yana zuela egi athu avula anyi afile gale mbaafuzumuga. Yehowa wana tshigina egi athu ene ajinge luko, hene wahanele Yesu ngolo jia guafuzumuna.

Mihu ya Guvutugila

• Luholo lutshi Yehowa nu Yesu ana gudivua gu ndaga yatadila gufuzumuna athu a gufua?

• Athu avula anyi mbaafuzumuga mbaajinga mu dilu nga ha mavu? Mukunda natshi wazuela ngenyi?

• Itshi idi gugutshiginyisa egi athu wakhalele muzumba anyi afile gale mbaafuzumuga?