موت بڑا دُکھ تے تکلیف دیندی اے۔ ایسے لئی بائبل چ ایہنوں دُشمن کہیا گیا اے۔ (‏1-‏کُرنتھیوں 15:‏26‏)‏ سبق نمبر 27 چ اَسی سکھیا سی کہ یہوواہ ساڈے ایس دُشمن دا ناں‌نشاں مٹا دَوے گا۔ پر کیہہ ساڈے اوہناں پیارے دوستاں تے رشتے‌داراں لئی کوئی امید ہے وے جیہڑے مر گئے نیں؟ ایہدا جواب سانوں ایس سبق چ ملے گا۔ اَسی سکھاں گے کہ یہوواہ اوہناں لکھاں کروڑاں لوکاں نُوں زندہ کرے گا جیہڑے مر گئے نیں۔ اوہ اوہناں نُوں ہمیشاں تک خوشیاں بھری زندگی گزارن دا موقع دے گا۔ کیہہ اِنج واقعی ہوئے گا؟ نالے جیہڑے لوک زندہ ہون گے، اوہ رہن گے کتھے، زمین تے یاں اسمان تے؟‏

1.‏ یہوواہ خدا ساڈے اوہناں عزیزاں لئی کیہہ کرنا چاہندا اے جیہڑے مر گئے نیں؟‏

یہوواہ خدا مرے ہوئے لوکاں نُوں زندہ کرن دی دلی خواہش رکھدااے۔ خدا دا وفادار بندہ ایوب ایس گل تے پکا ایمان رکھدا سی کہ جدوں اوہ مر جائے گا تے خدا اوہنوں بھلے گا نئیں۔ سگوں اوہنے تے بڑے یقین نال کہیا کہ اَے خدا تُوں مینوں بلا‌ئیں گا تے میں قبر چوں تینوں جواب دَواں گا۔‏‏—‏ایوب 14:‏13-‏15 نُوں فٹ‌نوٹ چوں پڑھو۔‏ a

2.‏ اَسی ایہہ ایمان کیوں رکھ سکنے آں کہ مُردے زندہ ہون گے؟‏

جدوں یسوع مسیح زمین تے سی تے اوہنے خدا دی طاقت نال مُردیاں نُوں زندہ کیتا۔ اوہنے 12 سالاں دی اِک بچی نُوں تے اِک بیوہ دے پُتر نُوں زندہ کیتا۔ (‏مرقس 5:‏41، 42؛‏ لُوقا 7:‏12-‏15‏)‏ بعد چ یسوع دا دوست لعزر وی مر گیا۔ یسوع چار دن بعد اوہدی قبر تے پونچیا۔ اوہنے خدا کولوں دُعا کیتی تے فیر قبر وَل ویکھ کے اوہنے اُچی ساری کہیا، لعزر باہر نکل آ۔ تے فیر لعزر قبر چوں نکل آیا۔‏ (‏یوحنا 11:‏43، 44‏)‏ لعزر نُوں زندہ ویکھ کے اوہدے دوست تے رشتے‌دار بوہت ای خوش ہوئے۔‏

3.‏ ساڈے جیہڑے عزیز مر گئے نیں اوہ زندہ ہون توں بعد کتھے رہن گے؟‏

یہوواہ خدا نے اپنے کلام چ ایہہ وعدہ کیتا اے کہ مُردے جی اُٹھن گے۔ ‏(‏اعمال 24:‏15‏)‏ پر جیہڑے لوکاں نُوں یسوع نے زندہ کیتا سی اوہ زندہ ہون توں بعد اسمان تے نئیں گئے سن۔ (‏یوحنا 3:‏13‏)‏ اوہ بوہت خوش سن کہ اوہناں نُوں زمین تے دُبارہ رہن دا موقع مِل گیا اے۔ ایسے طرحاں یسوع بوہت چھیتی لکھاں کروڑاں لوکاں نُوں زندہ کرے گا تاکہ اوہ زمین تے ہمیشاں تک خوشیاں بھری زندگی گزارن۔ انسان تے مرن والے لوکاں نُوں وقت دے نال نال بُھل جاندے نیں پر یہوواہ خدا اوہناں نُوں یاد رکھدا اے۔ اوہ اوہناں نُوں ضرور زندہ کرے گا۔—‏یوحنا 5:‏28، 29‏۔‏

 ہور سوچ‌وچار لئی

4.‏ یسوع نے ثابت کیتا کہ اوہ مُردیاں نُوں زندہ کر سکدا اے

ایس گل بارے ہور سکھو کہ جدوں یسوع دا دوست لعزر فوت ہویا تے یسوع نے کیہہ کیتا۔ یوحنا 11:‏14،‏ 38-‏44 نُوں پڑھو تے فیر ایہناں سوالاں تے گل بات کرو:‏

• ایس گل دا کیہہ ثبوت اے کہ لعزر واقعی مر گیا سی؟—‏39 ایت نُوں ویکھو۔‏

• جے لعزر اسمان تے چلا گیا ہوندا تے یسوع اوہنوں زندہ کر کے واپس زمین تے کیوں لیاندا؟‏

ویڈیو چلاؤ‏۔‏

5.‏ بے‌شمار انساناں نُوں زندہ کیتا جائے گا

زبور 37:‏29 نُوں پڑھو تے فیر ایس سوال تے گل بات کرو:‏

• کروڑاں لوک جیہڑے زندہ ہون گے، اوہ کتھے رہن گے؟‏

یسوع اوہناں لوکاں نُوں وی زندہ کرے گا جیہڑے یہوواہ دی عبادت نئیں کردے سن۔ اعمال 24:‏15 نُوں پڑھو تے فیر ایس سوال تے گل بات کرو:‏

• تُسی کنہوں مُردیاں چوں زندہ ہوندیاں ویکھنا چاہندے او؟‏

• مُردیاں دے زندہ ہون دی امید توں فلیسٹی دے ماں پیو نُوں تسلی تے حوصلہ کیویں ملیا اے؟‏

 خلاصہ

بائبل چ خدا وعدہ کردا اے کہ اوہ لکھاں کروڑاں مُردیاں نُوں زندہ کرے گا۔ اوہ اوہناں نُوں خوشیاں بھری زندگی دینا چاہندا اے۔ ایس لئی اوہنے یسوع مسیح نُوں مُردیاں نُوں زندہ کرن دا اِختیار دِتا اے۔‏

دہرائی

• یہوواہ خدا تے یسوع مسیح مُردیاں نُوں زندہ کرن بارے کیہو جیہامحسوس کردے نیں؟‏

• جیہڑے لکھاں کروڑاں لوکاں نُوں زندہ کیتا جائے گا اوہ کتھے رہن گے؟ زمین تے یاں اسمان تے؟ تُسی جیہڑا جواب دِتا اے اوہدی وجہ کیہہ اے؟‏

• تُسی ایہہ کیوں من دے او کہ تواڈے اوہ دوست تے رشتے‌دار زندہ ہو جان گے جیہڑے مر گئے نیں؟‏