LECCIÓN 30
¡Reʼ taqeh afamilia kamnaq nakiwuktiik cho!
Reʼ kimik iruyeew tiʼkiil kʼuxliis. Ruum reʼ Santo Laj Huuj iruqʼor chi reʼ kimik jeʼ rukabʼ jenaj ixowaal (1 Corintios 15:26). Pan lección 27, xatijej chi reʼ Jehová narusacham wach i ajixowaal wilih. ¿Xa reʼ laʼ chajariik narukʼuljiik kuukʼ taqeh i xikimik chik? Chupaam i tijinik wilih naʼanabʼeem jenaj chik uyʼinik iruyeew qeh i Jehová, chi naruwuksam i kʼihaal chi kʼachareel reh chi ne inkisuqkileej i juneliik kʼacharik. ¡Nakiwuktiik cho! ¿Korik na chi narukʼuljiik i wilih? ¿Nakikʼachariik na pan taxaaj oon ayuʼ wach akʼal?
1. ¿Chajariik iraaj ruyeʼem i Jehová keh i qafamilia reʼ xikimik chik?
Reʼ Jehová iraaj ruyeʼem kikʼachariik taqeh kamnaq. Reʼ Job wilik naq rukojbʼal, chʼiklik naq rukʼux chi na naq rukapebʼjiik ruum i Dios atoobʼ ta kamnaq naq chik eh wilik pan «muqʼuumbʼal». Ruum aj reʼ xuqʼor reh i Dios: «Reʼ hat nakiin aqʼoreem eh reʼ hin nakaat nuchaqʼweem» (chawil Job 14:13-15, TNM).
2. ¿Chaaj woʼ reet qehtʼal chi reʼ taqeh kamnaq nakiwuktiik cho?
Noq reʼ Jesús xwihʼik wach akʼal, xyeʼarik rajaawriik ruum i Dios reh ruksjiik taqeh kamnaq. Ruum aj reʼ, reʼ Jesús xuyeew woʼ chik rukʼachariik i kʼisa xqʼun ajkabʼlaj haabʼ eh xuyeew woʼ rukʼachariik i rakʼuun ixoq kamnaq rubʼahiil (Marcos 5:41, 42; Lucas 7:12-15). Chi riij i reʼ, reʼ ramigo Lázaro xkimik. Atoobʼ ta kijibʼ qʼiij naq chik irukʼam chi kamnaq i Lázaro eh muqlik naq chik, reʼ Jesús xuksaj cho. Noq rubʼanam chik rutiij chuwach i Dios kow xukʼer ruchiiʼ: «¡Lázaro, eleen cho!». Eh «reʼ i kamnaq xelik woʼ cho», ¡kʼachlik naq! (Juan 11:43, 44). ¿Inakapaaj na i suqkiil kʼuxliis xkikʼraaj i rufamilia eh taqeh ramigo i Lázaro?
3. ¿Nakiwukʼtiik na chi kʼacharik taqeh afamilia kamnaq?
Reʼ Santo Laj Huuj iruqʼor chi reʼ taqeh kamnaq «naa woʼ chik kiwuktiik chaloq chi kʼachlik kiwach» (Hechos 24:15). Reʼ taqeh xuksaj i Jesús maʼ reʼ ta naq pan taxaaj wilkeebʼ (Juan 3:13). Chi kunchelaal xa suq naq chik kikʼux chi kʼacharik woʼ chik wach akʼal. Jeʼ rukabʼ xkʼuljik chupaam taqeh i qʼiij reʼreʼ, maʼ najt ta chik iraaj chi reʼ Jesús naruksam i kʼihaal chi kʼachareel reh chi ne inkisuqkileej i juneliik kʼacharik noq xa holohik chik i akʼal. Reʼ Jesús xuqʼor chi chuʼnchel taqeh kamnaq nakibʼiram i ruqʼorbʼal, reʼ wilih iraaj ruqʼorom chi reʼ taqeh kamnaq reʼ wilkeebʼ pan rukapebʼaal i Dios nakiwuktiik cho eh jeʼ woʼ taqeh kamnaq reʼ maʼ inkʼulik ta chik pan qakʼux (Juan 5:28, 29).
CHATZʼIR RIIJ I KʼAHCHIʼ ATIJEM
Naqilom juʼjun taqeh ehtalil irukʼuhtaaj i Santo Laj Huuj chi reʼ taqeh kamnaq ne irubʼan chi ne kiwuktik cho eh chi reʼ wilih narojiik eloq wach. Eh naqilom chi reʼ kiwuktik taqeh kamnaq ne iruyeew rukowiil akʼux eh awuyʼinik.
4. Reʼ Jesús xukʼuhtaaj chi wilik rajaawriik reh ruksjiik taqeh kamnaq
Chanabʼeej kʼisinoq chik chi riij i xubʼan i Jesús chi riij i ramigo Lázaro. Chawil taq i Juan 11:14 eh 38-44, eh tiqʼoroq taq chi riij:
-
¿Jaruubʼ naq chik qʼiij irukʼam i Lázaro chi kamnaq? (Chawil taq i versículo 39).
-
Mi korik ta naq chi reʼ Lázaro xooj pan taxaaj noq xkimik, ¿holohik na xubʼan i Jesús chi xuqahsaj woʼ chik cho ayuʼ wach akʼal?
5. ¡Kʼih i nakiwuktiik cho chi kʼacharik!
Chawil taq i Salmo 37:29 eh tiqʼoroq taq chi riij:
-
¿Ahaʼ nakikʼachariik taqeh kʼihaal chi kʼachareel reʼ nakiwuktiik cho?
Reʼ Jesús naruksam cho taqeh i xiloqʼinik reh i Jehová eh naruksam woʼ cho taqeh i maʼ xiloqʼinik ta reh. Chawil taq i Hechos 24:15 eh tiqʼoroq taq chi riij:
-
Noq ne imponik i ruqʼijiil i kiwuktik taqeh kamnaq, ¿ajwach inawaaj awilom wach?
Reʼ Jesús maʼ kʼaxik ta chi reh ruksjiik jenoʼ kamnaq jeʼ rukabʼ noq maʼ kʼaxik ta chi reh jenoʼ ajabʼees ruksjiik i ruhalakʼuun noq wirik irubʼan.
6. Reʼ kiwuktik taqeh kamnaq ne iruyeew rukowiil akʼux eh awuyʼinik
Reʼ ehtalil chi riij i rixqʼuun i Jairo reʼ wilik pan Santo Laj Huuj iruyeew rukowiil kikʼux taqeh kiqʼebʼem i kifamilia pan kimik. Chawil chi riij i ehtalil wilih pan Lucas 8:40-42 eh 49-56.
Noq reʼ Jesús ko majaaʼ naq iruksaj i rixqʼuun i Jairo xuqʼor reh: «Maayohbʼisaj awiibʼ chayeew laʼ akʼux» (chawil taq i versículo 50). ¿Nikʼwach ne iruyeew rukowiil akʼux i hat i kiwuktik taqeh kamnaq...
-
... noq inkimik jenoʼ afamilia?
-
... noq wilik pan yohbʼaal akʼachariik?
Chawil taq i VIDEO eh tiqʼoroq taq chi riij:
-
¿Nikʼwach xukowej kikʼux taqeh rajaaw i Phelicity i kiwuktik taqeh kamnaq?
REʼ INKIQʼOR I JUʼJUN: «Maʼ inukoj ta wach chi reʼ taqeh kamnaq na woʼ chik kikʼachariik ayuʼ wach akʼal».
-
¿Chajariik inaqʼor i hat?
-
¿Ahaʼ wilik i texto ne inakoj reh rukʼuhtjiik chi reʼ taqeh kamnaq nakiwuktiik cho, reh kʼacharik ayuʼ wach akʼal?
KʼOLOQ PAN AKʼUX
Reʼ Santo Laj Huuj iruqʼor chi kʼih taqeh kʼachareel nakiwuktiik cho chi kʼacharik. Reʼ Jehová xa iraaj chik ruyeʼem kikʼachariik eh xuyeew rajaawriik i Jesús reh kuksjiik.
Reʼ xkahnik pan akʼux
-
¿Chaaj woʼ reet qehtʼal chi reʼ Jehová eh i Jesús xa inkaaj chik kuksam taqeh kamnaq reh kʼacharik?
-
¿Ahaʼ nakikʼachariik taqeh kʼihaal chi kʼachareel reʼ nakiwuktiik cho: pan taxaaj oon ayuʼ wach akʼal? ¿Chaaj woʼ reet jeʼ reʼ inakapaaj i hat?
-
¿Chaaj woʼ reet chʼiklik akʼux chi reʼ afamilia ne irubʼan chi ne kiwuktik cho chi kʼacharik?
CHAREQ RUMAN
Chawil juʼjun taqeh naʼojbʼal ne tirutobʼeej noq tiʼ akʼux.
«Reʼ wilih ne intobʼinik keh ajwach inkimik jenoʼ kifamilia» (¡Despertad!, núm. 3 reh 2018)
¿Reʼ Santo Laj Huuj ne na irutobʼeej jenoʼ xkimik i rufamilia?
Chawil nikʼwach ne inatobʼeej jenoʼ halakʼun noq inkimik ajwach iraaj wach.
¿Wilik na jenoʼ naruwuktiik reh kʼacharik pan taxaaj? ¿Wilik na jenoʼ maʼ na ta ruwuktiik chi kʼacharik?
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
