Mehla kin kahrehda pahtou oh nsensuwed. Ihme kahrehda Paipel kin kahdaneki mehla imwintihti. (1 Korint 15:26) Ke sukuhlkiher nan Iren Mehn Kasukuhl 27, me Siohwa pahn ketin kalowehdi imwintihti menet. Ahpw dahme pahn wiawihong aramas akan me melahr? Nan iren mehn kasukuhl wet, ke pahn sukuhlki pil ehu inou kaselel me Siohwa ketin wiahda. E pahn ketin kapwurehdo aramas lik kei ren pereperenki mour kohkohlahte. E pahn ketin kaiasirailda! Met uhdahn kak wiawi? Irail pahn iasadahng mour nanleng de nin sampah?

1. Dahme Siohwa ketin kupwurki wiahiong omw peneinei oh kompoakepahmw me melahr kan?

Siohwa ketin kupwurki kapwurehdo aramas melahr akan ren momour. Ohl pwoson men me adaneki Sohp likih me Siohwa sohte pahn likidmeliehla ih ni ahnsou me e mehla. E patohwanohng Koht: “Komw pahn ketin malipe ie, I ahpw pahn patohwan sapeng [sang nan Sousou].”​—Wadek Sohp 14:13-15.

2. Ia duwen atail ese me aramas melahr akan kak iasada?

Ni Sises eh ketiket nin sampah, Koht ketikihong ih manaman en kaiasada aramas. Sises ketin kamourada serepein men me sounpar 12 oh nein liohdi men pwutak men. (Mark 5:41, 42; Luk 7:12-15) Mwuhr, kompoakepahn Siseso Lasarus, ahpw mehla. Mendahki Lasarus melahr oh seridier rahn pahieu, Sises ketin kamourada ih. Mwurin eh kapakap ong Koht, Sises ahpw mahsenlahng ni sousowo: “Lasarus, pedoido!” Oh “ohl me melahro ahpw pedoido.” Lasarus mourda! (Sohn 11:43, 44) Medewehla peren me en Lasarus peneinei oh kompoakepah kan ahneki!

3. Mie koapworopwor ong me melahr kan me ke kin poakohng?

Paipel inoukihda: “E pahn mie kaiasada.” (Wiewia 24:15) Irail akan me Sises ketin kaiasada mahso sohte kohdahla nanleng. (Sohn 3:13) Irail perenki ar kak pwurehng mourda nin sampah. Pil duwehte met, ni ahnsou keren Sises pahn ketin kaiasada aramas lik kei ren pereperenki mour kohkohlahte nan paradais nin sampah. E mahsanih me “koaros me mihmi nan sousoun kataman kan,” pil irail kan me aramas akan manokehla, Koht ketin tamataman irail oh pahn ketin kaiasirailda.​—Sohn 5:28, 29.

 KALAUDEHLA OMW ESE MET

4. Sises ketin kadehdehda me e kak kaiasada me melahr kan

Kalaudehla omw ese dahme Sises ketin wiahiong kompoakepaho Lasarus. Wadek Sohn 11:14, 38-44, oh mwuri koasoiapene peidek pwukat:

• Ia duwen atail ese me Lasarus uhdahn mehla?​—Kilang iretikitik 39.

• Ma Lasarus kohdahla nanleng, ke medewe Sises pahn ketin kamourada ih nin sampah?

Kilang KISIN KASDO.

5. Me tohto pahn iasada!

Wadek Melkahka 37:29, oh mwuri koasoiapene peidek wet:

• Ia wasa aramas lik kan pahn kousoan ie ni ar iasada?

Sises pahn ketin kaiasada aramas tohtohie, kaidehn irail kante me kin kaudokiong Siohwa. Wadek Wiewia 24:15, oh mwuri koasoiapene peidek wet:

• Ihs me ke men tuhwong me pahn pwurehng mourda?

• Ia duwen koapworopwor en kaiasada eh kansenamwahwih oh kangoange en Phelicity pahpa oh nohno?

 DAHME KE SUKUHLKIER

Paipel inoukihda me aramas lik kan me melahr pahn iasada. Siohwa ketin kupwurki ren pwurehng mour, oh e ketikihongehr Sises manaman en kaiasirailda.

Kousapahl

• Ia duwen atail ese me Siohwa oh Sises ketin kasikasik kamourada me melahr akan?

• Ia wasa aramas lik kan me iasada pahn kousoan ie​—nanleng de sampah? Dahme ke ndahki met?

• Dahme kamehlelehiong uhk me irail kan me ke poakohng kak pwurehng mourda?