Castanchi wanuptenga pasaypa laquicunchi. Chaypaj parlarmi Bibliapis nin wanuyga juc enemigo japuy cashganta (1 Corintios 15:26). 27 caj yachacuycho mayna yachacushcanqui Diosninchi wanuyta ilgächinanpaj. Pero capaz tapucuycanquiraj ‘¿wanushga cajcunawan imaraj pasanga?’ nir. Caychomi yachacunqui, imanotaj Tayta Jehová cawarachimunga chaychicaj wanushga cajcunata mushoj Pachachona cawapäcunanpaj. ¡Cawarimunga! Cushicuypaj ¿au? ¿Y maycho cawananpätaj cawapäcamunga?

1. Wanushga castanchicunaraycur, ¿imataraj Jehová ruranga?

Jehovaga mayna munaycan castanchicunata cawarachimunanpaj. Job runapis alapa yäracurmi seguro caycargan wanuptinpis Dios mana gongaycunanpaj, chaymi Jehovata nergan: “Cawarimunäpaj captenga”, “gayamaptiqui contestamushaj” (leiriy Job 14:13-15).

2. ¿Rasunpachuraj wanushgacuna cawapäcamunga?

Pachacho caycarga Diospa poderninwanmi Jesusga wanushgacunata cawarachimurgan. Juc cuticho 12 watayoj warmi wamrata y juc viudapa wamrantapis sharcarachimurgan (Marcos 5:41, 42; Lucas 7:12-15). Amigun Lazarutapis chuscu junajna pamparaycaptin cawarachimurganmi. Diosta mañacuycurmi, fuertipa gayargan: “¡Lázaro, yargamuy!” nir. Chaypitana “wañusha jitaraycashanpita Lazaroga uchcupita llojshimuran” (Juan 11:43, 44). Mayraj cushicärergan chaycho caycaj castancuna y amiguncuna.

3. ¿Cawarimungachuraj wanushga castanchicuna?

Wanushgacunataga Diosninchi “cawarachimongami”, chaytami Biblia wilacun (Hechos 24:15). Jesús cawarachimushgan runacunaga manami cieluchochu carcaycargan (Juan 3:13). Cushishgalami sharcapäcamurgan cay Pachacho yapay cawapäcunanpaj, chaynolami shamoj tiempucho cawarimojcunapis cushishgala carcaycanga cay Pacha paraisuna captin. Jesusmi nergan “pamparaycajcuna”, Diospa yarpaynincho caycajcuna lapan cawarimunanpa cajta (Juan 5:28, 29).

 SHUMAJ YACHACURCUNAPAJ

4. Wanushgacunata Jesús cawarachimushganga rasunpami

Lazaruta Jesús cawarachimushganpita maslata yachacuy. Leipäcuy Juan 11:14 y 38-44 y caycunapita parlapacäriy:

• ¿Imanirtaj ninchi Lazaruga rasunpa wanushganta? (39 caj versiculuta ricapäcuy).

• Wanurir cieluchona Lázaro ali täcuycaptenga, ¿imaparaj Jesusga cay Pachaman cutichimunman cargan?

VIDEUTA ricapäcuy.

5. ¡Maychicaj runacuna yapay cawarimunga!

Leipäcuy Salmo 37:29 y caypita parlapacäriy:

• ¿Maychotaj cawapäcunga lapan cawarimojcuna?

Jesusga manami Diosta sirvejcunalatachu cawarachimunga, waquin runacunatapis sharcachimungami. Leipäcuy Hechos 24:15 y caypita parlapacäriy:

• Wanushgacuna cawarimushgan wichancho, ¿pitaraj ricayta munanquiman?

• Videucho taytacunataga, ¿imanotaj yanapashga wanushgacuna cawarimunanpaj yachacärishgan?

 ICHIC YACHACUY

Bibliaga wilacun mana atipaypaj maychicaj runacuna yapay cawarimunanpaj. Jehovapa poderninwanmi Jesusga chayta ruranga.

Yarpänapaj

• ¿Imanirtaj ninchi Jehovawan Jesusga mayna munarcaycan wanushgacunata sharcachimunanpaj?

• Wanushgacuna cawarircamur, ¿maychoraj cawanga?, ¿cieluchochuraj o Pachachochuraj?, ¿imanirtaj chayta ninqui?

• ¿Imanirtaj gampis yäracunquiman castayquicuna yapay sharcamunanpaj?