LECCIÓN 30
¡Canguna llaquishca ailluuna cuti causarinungami!
Huañui ashca llaquichin, nanachin. Chiraigu Biblia nin huañui ñucanchira chijnij an nisha (1 Corintios 15:26). Lección 27ibi can ña yachashcangui Jehová huañuira tucuchingaraushcara. Chiraigu ¿imara tucunga ña huañushca runaunahua? Cai lecciombi yachangaraungui Jehová ashca huaranga huaranga runaunara causachingaraushcara unai unaigama causangahua. ¡Huañushcauna cutillara causarinunga! ¿Casna tucungachu? ¿Ahua pachai o cai allpai causarinunga?
1. Ñucanchi huañushca ailluunamanda ¿imara Jehová rurangaj munan?
Jehová yapa munanmi huañushcaunara cuti causachingaj. Job runa tucui shunguhua quirica pai huañujpi Jehová mana cungaringaraushcara. Diosta nica: “Can cayajpi ñucallara cutipashami” (leai Job 14:13-15).
2. ¿Imasnara yachanchi huañushcauna cuti causarina ushashcara?
Jesús allpai ashcai huañushcaunara causachina ushaira Dios cuca. Chiraigu Jesús 12 huata charij huahuara cuti causachica, huaccha huarmi churiras causachica (Marcos 5:41, 42; Lucas 7:12-15). Huasha paihua amigo Lázaro huañuca. Chuscu punzha huañushca huasha pambashca ajpis Jesús cutillara causachica. Oracionda Diosta rurashca huasha pambashca uctuma ricusha caparica: “Lázaro, pajllama llucshi”. Shina nijpi ‘huañushca Lázaro llucshicami’, ¡causaricami! (Juan 11:43, 44). Iyari, Lázaro amigoguna, familiaguna yapa cushi anuca.
3. ¿Camba llaquishca ailluuna cuti causarinungachu?
Biblia ninmi “huañushcauna causarinaungami” (Hechos 24:15). Ñaupa timpui Jesús cuti causachishcauna mana ahua pachama rinucachu (Juan 3:13). Paiguna yapa cushi anuca Jesús paigunara allpai causachishcamanda. Allpai causachishcasna Jesús huaranga huaranga runaunara cuti causachingami paraíso tucushca allpai causanuchu. Pai nica “tucui pambariajcuna” Dios pai iyaibi charishcauna causarinunga. Shinallara cungarishca runaunas Dios paihua iyaibi anujpi causarinungami (Juan 5:28, 29).
MAS YACHAI
Imarasha yachanchi Jesús cuti causachina ushaira charishcara pai rimashca pactachingaraushcaras Bibliai ricushun. Shinallara causarinai chapana iyai ñucanchira imasna yanapashcara ricushun.
4. Jesús huañushcaunara causachina ushashcara ricuchica
Jesús paihua amigo Lazaromanda rurashcara mas yachai. Leaichi Juan 11:14, 38-44, huasha catij tapuigunamanda rimaichi:
-
¿Imasnara yachanchi Lázaro sirtu pacha huañushca ashcara? (Versículo 39 ricuichi).
-
Lázaro ahua pachama rishcajpiga ¿iyaringuichu Jesús Lazarora cuti allpama apamunmacachu?
5. ¡Ashca runauna cuti causarinunga!
Leaichi Salmo 37:29, huasha catij tapuimanda rimaichi:
-
¿Maibira ashca huaranga huaranga causachishcauna causanunga?
Jesusga Jehová Diosta adurajcunara, shuj runaunaras causachingami. Leaichi Hechos 24:15, huasha catij tapuimanda rimaichi:
-
Causachina punzha pactajpi ¿pitara ricungaj munanguima?
Shu yaya paihua churi puñuriajta llicchachingaj ushashca shina Jesús huañushcaunara cuti causachingaj ushangallami.
6. Huañushcauna cuti causarinara yachana canda cushiyachin
Jairo ushimanda Bibliai cuintashcara leana, huañushca aillu charijcunara animachishca, cushiyachishcas. Cai sirtu pasashcara cuintashcamanda leaichi Lucas 8:40-42, 49-56.
Jairo ushira manara cuti causachishcallaira Jesús paita nica: “Ama manzhaichu, quirilla” (versículo 50 ricuichi).
-
¿Imasnara canda yanapana ushan cuti causarinamanda yachana camba aillu huañushcai?
-
¿Imasnara canda yanapana ushan cuti causarinamanda yachana can yapa llaqui pasaushcais?
VIDEORA ricuichi, huasha catij tapuimanda rimaichi:
-
¿Imasnara Phelicity yayaunara yanapashca huañushcauna cuti causarinamanda yachana?
RUNAUNA CASNA NINUJPI: “Huañushcauna cai allpai cuti causaringaraushcara quirina shinzhimi”.
-
¿Imara can iyangui?
-
¿Maican textora ricuchinguima cai allpai causarinas sirtu tianara?
IMARA YACHASHCANGUI
Biblia yachachinmi ashca huaranga huaranga runauna causarinungami. Jehová munanmi huañushcauna cuti causarinuchu, Jesusta causachina ushairas cushca.
Iyaringaj
-
¿Imasnara yachanchi Jehová, Jesuspas huañushcaunara cuti causachina munashcara?
-
Ashca huaranga huaranga causachishcauna ¿maibira causanunga: ahua pachai o allpai? ¿Imarasha casna iyangui?
-
¿Imarasha sirtu quiringui can llaquishca ailluuna cuti causarinara?
RICUNGUI
Llaqui pasaushas ñaupajma catingaj huaquin yanapaigunara leai.
“Aillu huañujpi llaqui pasaujcunara yanapaiguna” (¡Despertad!, núm. 3 2018)
¿Biblia yanapana ushanzhu aillu huañushcamanda llaqui pasaujta?
Ricui imasnara can yanapana ushangui shu huahua paihua llaquishca aillu o amigo huañushcai.
¿Maicans ahua pachama causangaj causarinungachu? ¿Maicans mana causachishca anungachu?
“Cuti causarina ¿imara nisha nin?” (jw.org partii tiaj tema)
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
