O meriben anel bari dukh the žaľa. Avka, sar narado dikhas nalačhe manušes, so amen ča dukhavel, mek buter narado dikhas o meriben, bo hino igen nalačho! Avka pal leste pisinel e Biblija. (1. Korinťanom 15:26) Andre 27 lekcija sikhľiľam, hoj o Jehovas o meriben odčhivela. Aľe, so ela ole savore manušenca, so imar mule? Andre kadi lekcija pes dodžanaha, savo šukar lav diňa o Jehovas, hoj but but manuša, so mule, pale dživena pro furt. O Del len uštavela andal o meriben! Čačes pes oda ačhela? Ena uštade, kaj te dživen andro ňebos abo pre phuv?

1) So o Jehovas kamel te kerel predal ola, so amenge mule?

O Jehovas pes našťi doužarel, sar uštavela upre le dženen andal o meriben, kaj pale te dživen. Jekh verno murš o Jób sas peske isto, hoj kana merela, o Del pre leste na bisterela. Phenďa le Devleske: „[Tu] vičineha a me tuke odphenava [andal o hrobos].“ (Pregen Jób 14:13–15)

2) Sar džanas, hoj ola, so mule, čačes pale dživena?

Sar dživelas o Ježiš pre phuv, o Del leske diňa zor te uštavel le manušen andal o meriben. O Ježiš uštaďa andal o meriben 12 beršeskera čhajora the jekha vdovakere čhavores. (Marek 5:41, 42; Lukáš 7:12–15) Paľis muľa o Lazar, saves o Ježiš rado dikhelas. O Lazar sas mulo the parundo imar 4 ďivesa, aľe o Ježiš les uštaďa, kaj pale te dživel. O Ježiš mangľa le Devles a paľis vičinďa: „Lazar, av avri!“ a „o murš, so sas mulo, avľa avri“ džido! (Ján 11:43, 44) Save bachtale sas le Lazaroskeri fameľija the kamarata!

3) So lačho užarel olen, so tuke mule?

E Biblija amenge phenel: „Ena uštade andal o meriben.“ (Skutky 24:15) Ola, so o Ježiš uštaďa andal o meriben, na sas vičimen pale pre phuv andal o ňebos. (Ján 3:13) Na sas smutna, hoj musaj pale te dživen pre phuv, radisaľonas! Tiš o Ježiš uštavela upre igen but milijoni aver manušen, kaj pale te dživen pro furt andro rajos pre phuv. Phenďa, hoj „savore, so hine andro pametna hrobki“, čiže andre Devleskeri goďi, pale dživena. The ajse manuša, pre save imar bisterďam. (Ján 5:28, 29)

 DODŽAN TUT BUTER

4) O Ježiš sikaďa, hoj les hin zor te uštavel andal o meriben

Dodžan tut, so o Ježiš kerďa predal o Lazar, saves rado dikhelas. Pregen Ján 11:14, 38–44 a paľis vakeren jekhetane:

• Sar džanas, hoj o Lazar sas čačes mulo? (Dikh o tekstos 39.)

• Te bi o Lazar pal o meriben dživelas andro ňebos, cirdelas bi les o Ježiš, kaj pale te dživel pre phuv?

Mukh o VIDEJO.

5) Pherdo nipi ušťena upre andal o meriben!

Pregen Žalm 37:29 a paľis vakeren jekhetane:

• Kaj dživena ola pherdo nipi, so ušťena andal o meriben?

O Ježiš uštavela upre andal o meriben buter džene, na ča olen, so sas verna le Jehovaske. Pregen Skutky 24:15 a paľis vakeren jekhetane:

• Kas kames tu pale te dikhel?

• E daj o dad našade la čhajora. So lenge pomožinel te ľikerel avri kadi bari dukh?

 SO SIKHĽIĽAM

E Biblija sikavel, hoj but milijoni manuša, so mule, pale dživena. O Jehovas len igen rado dikhel a diňa zor le Ježišoske, kaj len te uštavel andal o meriben.

So bi phenehas

• So o Jehovas the o Ježiš kamen te kerel predal ola, so mule?

• Kaj dživena ola pherdo džene, so ušťena andal o meriben, andro ňebos či adaj pre phuv? Soske avka phenes?

• Soske sal tuke isto, hoj pale aveha olenca, so tuke mule?