О мерибе анела бари дукх хем бари жал. Адалеске и Библија башо мерибе вакерела кај тано душмани (1. Коринќаните 15:26). Ки лекција 27 сиклилем кај о Јехова ка уништинел акале душмане. Ама, со ка овел е манушенцар кола со више муле? Ки акаја лекција, ту ка сикљове повише башо панда јекх бут шужо ветување таро Јехова. Ов ветинѓа кај ка воскреснинел милијарде манушен, јавере лафенцар ка иранел лен палем ко живото те шај те овел лен прилика те живинен засекогаш. Ама, дали о воскресение чаче ка овел? Дали о мануша ка воскреснинен те живинен упре ко небо или теле ки Пхув?

1. Со мангела те керел о Јехова амаре мангленге со муле?

О Јехова едвај аџикерела те иранел палем ко живото амаре манглен со муле. Јекх верно мануш кова со викинела пе сине Јов сине уверимо кај о Девел нане те бистрел ле кеда ка мерел. Ов вакерѓа е Девлеске: „Ту ка викине ман, а ме ка одговоринав туке [таро гробо]“. (Читин Јов 14:13-15.)

2. Котар џанаја кај о муле шај те воскреснинен?

Кеда о Исус сине ки Пхув, о Девел денѓа ле моќ те воскреснинел е манушен. О Исус воскреснинѓа јекхе чхаја со сине ла 12 берш хем јекхе удовицакере чхаве (Марко 5:41, 42; Лука 7:12-15). Покасно, лескоро амал о Лазар муло. Иако о Лазар сине муло хем парумо више штар диве, о Исус воскреснинѓа ле. Откеда молинѓа пе е Девлеске, о Исус викинѓа: „Лазар, икљов! Хем „о муло иклило“ — џивдо! (Јован 11:43, 44). Замислин туке само кобор сине бахтале е Лазарескири фамилија хем лескере амала!

3. Сави надеж иси тле мангленге со муле?

И Библија ветинела кај „о Девел ка воскреснинел [е мулен]“ (Дела 24:15). Окола колен со о Исус воскреснинѓа кеда сине ки Пхув на геле упре ко небо (Јован 3:13). О Исус воскреснинѓа лен те живинен акате ки Пхув хем ола сине бахтале башо адава. Слично аѓаар, о Исус панда хари ка воскреснинел милијарде манушен те живинен вечно ко рај ки Пхув. Ов вакерѓа кај о Девел ка сетинел пе ко са окола сој тане ко гробо хем кај ка овен воскресниме. О Девел чак ка сетинел пе ко мануша коленге со никој више на сетинела пе (Јован 5:28, 29).

 ДОЗНАЈН ПОВИШЕ

4. О Исус докажинѓа кај шај те воскреснинел е мулен

Дознајн повише башо адава со керѓа о Исус пле амалеске е Лазареске. Читин Јован 11:14, 38-44, а пало адава керен лафи башо акала пучиба:

• Котар џанаја кај о Лазар чаче сине муло? (Дикх о стихо 39.)

• Со мислинеа, ако о Лазар гело ко небо дали о Исус би иранела ле сине те живинел теле ки Пхув?

Дикх о ВИДЕОКЛИПИ.

5. Бут џене ка овен воскресниме!

Читин Псалм 37:29, а пало адава керен лафи башо акава пучибе:

• Коте ка живинен о милијарде мануша со ка овен воскресниме?

О Исус нане те воскреснинел само околен со служинѓе е Јеховаске него хем бут јаверен. Читин Дела 24:15, а пало адава керен лафи башо акава пучибе:

• Кој мангеа те воскреснинел те шај палем те дикхе ле?

• Сар и надеж башо воскресение утешинѓа хем охрабринѓа е Фелиситакере родителен?

 СО СИКЛИЛЕМ

И Библија ветинела кај милијарде мануша кола со муле ка овен воскресниме. О Јехова мангела ола палем те живинен хем денѓа моќ е Исусеске те воскреснинел лен.

Сар ка одговорине?

• Котар џанаја кај о Јехова хем о Исус едвај аџикерена те воскреснинен е мулен?

• Коте ка живинен о милијарде мануша со ка воскреснинен — ко небо или ки Пхув? Соске мислинеа аѓаар?

• Со уверинела тут кај тле мангле ка живинен палем?