Ked neko merela amendar, amen osetinaja but bari dukh. Odolese, i Biblija phenela so o meribe tano amaro dušmani (1. Korinćanima 15:26). Ki 27. lekcija, dikhljam so o Jehova ka cidel o meribe. Ama, so ka ovel okolencar kola već mulje? Ki akija lekcija, ka sikljova pobuter ando jekh but šužo obećanje. O Jehova dinđa po lafi so ka irini e mulen ko životi. Šaj li odova ćaće te ovel? Da li on ka živinen ko nebo ili ki phuv?

1. So o Jehova mangela te ćerel aso amare mangle kola mulje?

O Jehova jedva ađićeri te irini len ko životi. Jekh verno manuš kova vićinđa pe Jov hine sigurno so o Devel na ka bistrel le ked ka merel. Ov phenđa e Devlese: „Tu ka vićine man, a me ka šunav tut [ando grobo].“ (Čitinen Jov 14:13-15.)

2. Sar đanaja so okola kola mulje palem ka živinen?

Ked o Isus hine ki phuv, o Devel dinđa le moć te vazdel okolen kola mulje. O Isus vazdinđa jekha ćhaja koja hine la 12 berš hem jekhe udovicake ćhave (Marko 5:41, 42; Luka 7:12-15). Palo odova, mulo hem e Isuseso amal, o Lazar. Iako nakhlje štar dive sar mulo, o Isus vazdinđa le. Ov molinđa pe e Devlese hem phenđa: „Lazare, ikljov!“ Palo odova „o manuš kova hine mulo ikljilo.“ O Lazar uštilo! (Jovan 11:43, 44). Zamislin samo kobor e Lazaresi porodica hem olese amala hine bahtale!

3. So ka ovel okolencar kola mulje?

I Biblija phenela so o „Devel ka uskrsnini [e manušen]“ (Dela apostolska 24:15). O manuša kas o Isus uskrsninđa na đelje te živinen ko nebo (Jovan 3:13). Ov uskrsninđa len te živinen ki phuv hem on hine bahtale sebepi odova. Isto ađahar, pana hari o Isus ka uskrsnini milijarde manušen te živinen ko raj ki phuv. Ov phenđa so sa okola soj tane ko e Devleso sećanje ka oven uskrsnime, čak o manuša kolendar amen ni na šunđam (Jovan 5:28, 29).

 SIKLJOV POBUTER

4. O Isus mothovđa so šaj te vazdel e mulen

Dikh so o Isus ćerđa aso po amal, o Lazar. Čitinen Jovan 11:14, 38-44, hem palo odova vaćeren ando akala pućiba:

• Sar đanaja so o Lazar ćaće mulo? (Dikhen o 39. stih)

• So mislineja, ako o Lazar palo meribe đelo ko nebo, da li bi o Isus irini le palem te živini ki phuv?

Dikhen o VIDEO.

5. But manuša ka uskrsninen

Čitinen Psalam 37:29, hem palo odova vaćeren ando akava pućibe:

• Kaj ka živinen sa odola manuša kola ka uskrsninen?

O Isus na ka uskrsnini samo e manušen kola služinđe e Jehovase, već hem avere manušen. Čitinen Dela apostolska 24:15, hem palo odova vaćeren ando akava pućibe:

• Kas jedva ađićereja te dikhe?

• Sar i nada ko uskrsenje zorjaćerđa e Felisitake roditeljen?

 SO SIKLJILJAM

I Biblija vaćeri so milijarde manuša ka oven uskrsnime. O Jehova mangela te irini len ko životi hem ov dinđa moć e Isusese te vazdel len.

Te ponovina

• Sar đanaja so o Jehova hem o Isus jedva ađićerena te vazden e mulen?

• Kaj ka živinen o manuša kola ka uskrsninen – ko nebo ja ki phuv? Sose mislineja ađahar?

• So uverini tut so amare mangle kola mulje palem ka živinen?