ΜΑΘΗΜΑΣ 30
Το Αγαπημέ Τζενέ Μπορίνενα τι Ξανατζουβντιόν!
Ο μεριπέ ανέλα μπουτ ντουκχ ντα κερκιπέ κο γκι. Οτθάρ η Αγία Γραφή βακερέλα ότι ο μεριπέ ισί ντουσμάνι. (1 Κορινθίους 15:26) Κο Μάθημας 27, σικλιλάν ότι ο Ιεχωβά κα νικίνελ ανταλέ ντουσμανίς. Αλλά σο κα αβέλ-πες ι τζενέντζαρ σο ακανά ισί μουλέ; Ανταλέ μαθημάστε, κα σικλιός πο μπουτ εκχέ γιαβερέ μπουτ σουκάρ λαφίσκε σο ντινάς ο Ιεχωβά—ο Ιεχωβά ντέλα πο λάφι ότι κα ξανανέλ κι ζωή δισεκατομμύρια τζενέν για τι τζουβντιόν ευτυχισμέ για πάντα. Κα τζουβντιαρέλ-λεν! Αβέλα-πες ανταβά; Κα αναστίντιβεν για τι τζουβντιόν κο ουρανός ή κι πφουβ;
1. Σο μανγκέλα τι κερέλ ο Ιεχωβά αμαρέ αγαπημέ τζενένγκε σο μουλέ;
Ο Ιεχωβά μπεσέλα σαρ σαρ τι ξανανέλ κι ζωή ι τζενέν σο μουλέ. Εκ πιστός τζενό, ο Ιώβ, ισινέ ντιπ σίγουρος ότι ο Ντεβέλ να κα μπιστρέλας-λες κάνα κα μερέλας. Βακερντάς κο Ντεβέλ: «Κα ντες βίκος ντα με κα απαντίναβ τούκε [κατά Μεζάρι]».—Διαβάνεν Ιώβ 14:13-15.
2. Σαρ τζανάσα ότι μπορίνενα τι ξανατζουβντιόν ο μουλέ;
Κάνα ο Ιησούς ισινέ κι πφουβ, ο Ντεβέλ ντινάς-λες ι ζορ τι τζουβντιαρέλ τζενέν. Ο Ιησούς αντάς πάλι κι ζωή εκχέ τσσαγιά σο ισινέ 12 μπρεσένγκι ντα ι τσσαβές σο τθερέλας εκ χήρα. (Μάρκος 5:41, 42· Λουκάς 7:12-15) Πο σοράν, μουλό ο αμάλ ι Ιησούσκο, ο Λάζαρος. Παρόλο σο ο Λάζαρος ισινέ μουλό σταρ ντιβές ντα πραχουντέας-λες, ο Ιησούς αντάς-λες πάλι κι ζωή. Ο Ιησούς κερντάς προσευχή κο Ντεβέλ ντα σοράν βακερντάς ζουρανές κάρινγκ κο μεζάρι: «Λάζαρε, έλα αβρί!» Ντα «ο τζενό σο πριν ισινέ μουλό νικίστιλο αβρί»—τζουβντό! (Ιωάννης 11:43, 44) Σκέφτινε καζόμ χαρά λιντέ ο τζενέ ντα ο αμαλά ι Λαζαρόσκε!
3. Καγιά ελπίδα υπαρχίντιβελα τι αγαπημέ τζενένγκε σο μουλέ;
Η Γραφή ντέλα πο λάφι ότι οντουλά σο μουλέ «κα τζουβντιόν πάλι». (Πράξεις 24:15) Ο τζενέ σο τζουβντιαρντάς ο Ιησούς κάνα ισινέ κι πφουβ, να γκιλέας κο ουρανός κάνα μουλέ. (Ιωάννης 3:13) Χαιρισάλε σο τζουβντιλέ πάλι ατθέ κι πφουβ. Αντικάς-ντα, ο Ιησούς κα ανέλ πάλι κι ζωή ατζεχάνικ δισεκατομμύρια τζενέν για τι τζουβντιόν ευτυχισμέ για πάντα κο παράδεισος κι πφουβ. Βακερντάς ότι «σαρέ οντουλά σο ισί κο μεζάρια»—ατζέ-ντα οντουλά σο μπέκιμ τι μπιστάρντιλε κατά τζενέ αλλά ισί αντρέ κι γκοντί κι Ντεβλέσκι—κα αναστίντιβεν.—Ιωάννης 5:28, 29.
ΧΑΝΤΖΟΥΒ ΠΟ ΑΧΟΡΤ
Σίκλιουβ κατά Γραφή σόσκε μπορίνασα τι αβάς σίγουροι ότι ο Ιησούς τθερέλα ι ζορ τι τζουβντιαρέλ τζενέν ντα κα κερέλ-λες. Ντικχ σαρ μπορίνελα τι κοβλιαρέλ τι ντουκχ ντα τι ντελ-τουτ ελπίδα η ανάσταση.
4. Ο Ιησούς σικαντάς ότι μπορίνελα τι τζουβντιαρέλ ι μουλέν
Σίκλιουβ πο μπουτ οντουλέσκε σο κερντάς ο Ιησούς πι αμαλέσκε ι Λαζαρόσκε. Διαβάνεν Ιωάννης 11:14, 38-44 ντα σοράν συζητίνεν ο ερωτήσεις:
-
Σαρ τζανάσα ότι ο Λάζαρος ισινέ μπαγιά μουλό; —Ντικχέν ο εδάφιος 39.
-
Άμα ο Λάζαρος γκιλόας κο ουρανός, πακιάσα ότι ο Ιησούς κα ανέλας-λες κι ζωή για τι τζουβντιόλ κι πφουβ;
5. Κα αναστίντιβεν μπουτ τζενέ!
Διαβάνεν Ψαλμός 37:29 ντα σοράν συζητίνεν ι ερώτηση:
-
Κάι κα τζουβντιόν ο δισεκατομμύρια τζενέ σο κα αναστίντιβεν;
Ο Ιησούς να κα ανέλ πάλι κι ζωή σάντε ι τζενέν σο πακιάνας κο Ιεχωβά, αλλά μπουτέ γιαβερέν-ντα. Διαβάνεν Πράξεις 24:15 ντα σοράν συζητίνεν ι ερώτηση:
-
Κας κα μανγκέας τι ντικχές τι τζουβντιόλ πάλι;
Σκέφτινε ακαβά: Καζόμ εύκολος ισί εκχέ νταντέσκε τι τζανγκαβέλ πι τσσαβές σο σοβέλα, αζόμ εύκολος ισί ι Ιησούσκε-ντα τι τζουβντιαρέλ εκχέ τζενές
6. Η ανάσταση μπορίνελα τι κοβλιαρέλ τι ντουκχ ντα τι ντελ-τουτ ελπίδα
Η ιστορία ι Γραφιάκι ι Ιαειρόσκε τσσαγιάκε κοβλιαρντάς ι ντουκχ μπουτέ τζενένγκι σο χασαρντέ τζενέν κο μεριπέ ντα ντινάς-λεν ζορ. Διαβάνεν ανταγιά αληθινή ιστορία κο Λουκάς 8:40-42, 49-56.
Πριν τι αναστίνελ ι Ιαειρόσκε τσσαγιά, ο Ιησούς βακερντάς λάκε νταντέσκε: «Μα ντάρα, σάντε τθερ πίστη». (Ντικχέν ο εδάφιος 50) Σαρ μπορίνελα τι βοηθίνελ-τουτ η ελπίδα ότι κα τζουβντιόν ο μουλέ . . .
-
άμα χασαρντάν εκχέ αγαπημέ τζενές κο μεριπέ;
-
άμα τι ζωή ισί σε κίνδυνος;
Ντικχέν ο ΒΙΝΤΕΟΣ ντα σοράν συζητίνεν ι ερώτηση:
-
Σαρ η ελπίδα ότι κα τζουβντιόν ο μουλέ ντινάς ζορ κο ντατ ντα κι ντάι κι Φελισιτιάκε ντα κοβλιαρντάς λένγκι ντουκχ;
ΜΕΡΙΚΑ ΤΖΕΝΕ ΒΑΚΕΡΕΝΑ: «Μακάρι τι τζουβντιόν ο μουλέ, αλλά να αβένα-πες ανταλά πράγματα».
-
Τούι σο πακιάσα;
-
Καλέ εδαφιόσαρ κα σικαβέας ότι κα τζουβντιόν ο μουλέ;
ΧΑΝΙΚ ΛΑΦΙΝΤΖΑΡ
Η Γραφή ντέλα πο λάφι ότι δισεκατομμύρια τζενέ σο μουλέ κα αβέν πάλι κι ζωή. Ο Ιεχωβά μανγκέλα τι ξανατζουβντιόν ντα ντινάς ι ζορ κο Ιησούς τι αναστίνελ-λεν.
Σο Σικλιλάν;
-
Σαρ τζανάσα ότι ο Ιεχωβά ντα ο Ιησούς μπεκλεντίνενα σαρ σαρ τι τζουβντιαρέν ι μουλέν;
-
Κάι κα τζουβντιόν ο δισεκατομμύρια τζενέ σο κα αναστίντιβεν, κο ουρανός ή κι πφουβ; Σόσκε βακερέσα-λες ανταβά;
-
Σο κερέλα-τουτ τι αβές σίγουρος ότι το αγαπημέ τζενέ κα ξανατζουβντιόν;
ΡΟΝΤΕ
Σίκλιουβ σο μπορίνεσα τι κερές για τι νταϊντίνες τι ντουκχ άμα χασαρντάν εκχέ τζενές κο μεριπέ.
«Βοήθεια Οντουλένγκε σο Χασαρντέ Εκχέ Τζενές κο Μεριπέ» (Ξύπνα!, Αρ. 3 2018)
Μπορίνενα ο αρχές ι Γραφιάκε τι βοηθίνεν μπαγιά οντουλέν σο χασαρντέ εκχέ τζενές;
Σαρ μπορίνενα ο χουρντέ τι νταϊντίνεν πουμαρί ντουκχ κάνα μερέλα λένταρ εκ τζενό σο μανγκένα-λες;
Κα αναστίντιβελ καέκ τζενό κο ουρανός; Καλά τζενέ να κα αναστίντιβεν;